കൊച്ചി: കേരളത്തെ നടുക്കിയ അട്ടപ്പാടി മധു വധക്കേസിൽ പ്രതികളുടെ ശിക്ഷ ഏഴ് വർഷം കഠിനതടവിൽ നിന്നും ജീവപര്യന്തമായി ഉയർത്തി ഹൈക്കോടതി ഡിവിഷൻ ബെഞ്ചിന്റെ ചരിത്രപരമായ വിധി. പ്രതികൾക്ക് വിചാരണക്കോടതി നൽകിയ ശിക്ഷ അപര്യാപ്തമാണെന്നും അത് ജീവപര്യന്തമായി ഉയർത്തണമെന്നും ആവശ്യപ്പെട്ട് സംസ്ഥാന സർക്കാരും മധുവിന്റെ അമ്മ മല്ലിയും നൽകിയ അപ്പീലുകൾ പൂർണ്ണമായി അംഗീകരിച്ചാണ് ഹൈക്കോടതിയുടെ ഈ കർശന നടപടി. അതേസമയം, കേസിന്റെ ഗുണദോഷങ്ങളും തെളിവുകളും വിശദമായി പരിശോധിച്ച കോടതി, വിചാരണക്കോടതി മുൻപ് ശിക്ഷിച്ച പ്രതികളുടെ അപ്പീൽ ഹരജികൾ തള്ളിക്കളഞ്ഞു. ശിക്ഷാ വർദ്ധനവിന് പുറമെ പ്രതികൾ ഓരോരുത്തരും 50,000 രൂപ വീതം പിഴയൊടുക്കണമെന്നും കോടതി ഉത്തരവിട്ടിട്ടുണ്ട്.
കേസിലെ പ്രധാന പ്രതികളായ മരക്കാർ (രണ്ടാം പ്രതി), ശംസുദ്ധീൻ (മൂന്നാം പ്രതി), രാധാകൃഷ്ണൻ (നാലാം പ്രതി), അബൂബക്കർ (അഞ്ചാം പ്രതി), സിദ്ധീഖ് (ആറാം പ്രതി), ഉബൈദ് (ഏഴാം പ്രതി), നജീബ് (എട്ടാം പ്രതി), ജയ്ജുമോൻ (ഒൻപതാം പ്രതി), സജീവ് (പത്താം പ്രതി), സതീഷ് (പതിനൊന്നാം പ്രതി), ഹരീഷ് (പന്ത്രണ്ടാം പ്രതി), ബിജു (പതിമൂന്നാം പ്രതി), മുനീർ (പതിനാലാം പ്രതി) എന്നിവരുൾപ്പെടെയുള്ള പന്ത്രണ്ട് പേർക്കാണ് ഇനി ജീവിതകാലം മുഴുവൻ ജയിൽശിക്ഷ അനുഭവിക്കേണ്ടി വരിക. എന്നാൽ, കേസിലെ ഒന്നാം പ്രതിയായിരുന്ന ഹുസൈനെ മതിയായ തെളിവുകളുടെ അഭാവം ചൂണ്ടിക്കാട്ടി ഹൈക്കോടതി വെറുതെവിട്ടു. ഹുസൈനെതിരെയുള്ള കുറ്റം സംശയാതീതമായി തെളിയിക്കാൻ പ്രോസിക്യൂഷന് സാധിച്ചില്ലെന്ന വിലയിരുത്തലിലാണ് കോടതി നടപടി. കേസിലെ പതിനാറാം പ്രതിക്ക് ഒരു വർഷത്തെ തടവുശിക്ഷയാണ് കോടതി വിധിച്ചിരിക്കുന്നത്.
2018 ഫെബ്രുവരി 22-നാണ് കേരള മനസ്സാക്ഷിയെ പിടിച്ചുലച്ച ക്രൂരത അട്ടപ്പാടിയിൽ അരങ്ങേറിയത്. ചിണ്ടക്കി ഊരിലെ മല്ലന്റെയും മല്ലിയുടെയും മകനായ ആദിവാസി യുവാവ് മധുവിനെ അരിയും പലചരക്ക് സാധനങ്ങളും മോഷ്ടിച്ചെന്ന് ആരോപിച്ചാണ് ഒരു കൂട്ടം ആളുകൾ കാട്ടിൽ നിന്ന് ക്രൂരമായി പിടികൂടിയത്. തുടർന്ന് ഇരുകൈകളും പിന്നിലേക്ക് കെട്ടി, ആൾക്കൂട്ട വിചാരണ നടത്തുകയും ക്രൂരമായി മർദ്ദിച്ച് അവശനാക്കിയ ശേഷം അട്ടപ്പാടിയിലെ റോഡിലൂടെ നടത്തിക്കുകയുമായിരുന്നു. ക്രൂരമായ മർദ്ദനമേറ്റ മധു പോലീസ് വാഹനത്തിൽ ആശുപത്രിയിലേക്ക് കൊണ്ടുപോകുന്നതിനിടയിലാണ് മരണപ്പെട്ടത്. വിചാരണക്കോടതി പ്രതികൾക്ക് നൽകിയ ഏഴ് വർഷത്തെ തടവ് മധുവിന്റെ കുടുംബത്തിന് നീതി ഉറപ്പാക്കാൻ പോന്നതല്ലെന്ന ബോധ്യത്തിലാണ് തങ്ങൾ ഹൈക്കോടതിയെ സമീപിച്ചതെന്നും, ഇപ്പോഴത്തെ വിധിയിലൂടെ നീതി പൂർണ്ണമായി ലഭിച്ചുവെന്നും മധുവിന്റെ കുടുംബം പ്രതികരിച്ചു.
