റിയാദ്: സൗദി അറേബ്യയിലെ അസീർ പ്രവിശ്യയിൽ വൻ മയക്കുമരുന്ന് വേട്ടയുമായി സൗദി ബോർഡർ ഗാർഡ് (സൗദി അതിർത്തി രക്ഷാസേന). രാജ്യത്തേക്ക് നിയമവിരുദ്ധമായി മയക്കുമരുന്ന് കടത്താൻ ശ്രമിച്ച മൂന്ന് എത്യോപ്യൻ സ്വദേശികളെ അതിർത്തി രക്ഷാസേന അറസ്റ്റ് ചെയ്തു. അസീർ പ്രവിശ്യയിലെ അൽ-റബൂവ സെക്ടറിൽ നടത്തിയ കർശനമായ പട്രോളിംഗിനിടയിലാണ് ഇവർ പിടിയിലായത്. ഇവരിൽ നിന്ന് 17 കിലോ ഹാഷിഷും 7,500 ആംഫെറ്റാമൈൻ ലഹരി ഗുളികകളും സുരക്ഷാസേന പിടിച്ചെടുത്തു. സൗദി അറേബ്യയുടെ അതിർത്തി സുരക്ഷാ നിയമങ്ങൾ പൂർണ്ണമായും ലംഘിച്ചുകൊണ്ടാണ് ഇവർ മയക്കുമരുന്ന് രാജ്യത്തേക്ക് കടത്താൻ ശ്രമിച്ചതെന്ന് അധികൃതർ വ്യക്തമാക്കി.
പിടിയിലായ പ്രതികൾക്കെതിരെയുള്ള പ്രാഥമിക നിയമനടപടികൾ അതിർത്തി രക്ഷാസേന പൂർത്തിയാക്കിയിട്ടുണ്ട്. പിടിച്ചെടുത്ത മയക്കുമരുന്ന് ശേഖരത്തോടൊപ്പം പ്രതികളെ തുടർനടപടികൾക്കായി രാജ്യത്തെ ബന്ധപ്പെട്ട ഉന്നത അന്വേഷണ ഉദ്യോഗസ്ഥർക്ക് കൈമാറി. മയക്കുമരുന്ന് കടത്തിനെതിരെയും വിതരണത്തിനെതിരെയും കർശന നിലപാടാണ് സൗദി ഭരണകൂടം സ്വീകരിച്ചിരിക്കുന്നത്. ലഹരിക്കടത്തുമായി ബന്ധപ്പെട്ട എന്തെങ്കിലും വിവരങ്ങൾ ശ്രദ്ധയിൽപ്പെട്ടാൽ ഉടനടി അധികൃതരെ അറിയിക്കാൻ പൊതുജനങ്ങളോട് ബോർഡർ ഗാർഡ് അഭ്യർത്ഥിച്ചു.
മക്ക, റിയാദ്, കിഴക്കൻ പ്രവിശ്യ എന്നിവടങ്ങളിലുള്ളവർക്ക് 911 എന്ന നമ്പറിലും, രാജ്യത്തിന്റെ മറ്റ് ഭാഗങ്ങളിലുള്ളവർക്ക് 999 എന്ന നമ്പറിലും വിവരങ്ങൾ അറിയിക്കാം. കൂടാതെ അതിർത്തി രക്ഷാസേനയുടെ പ്രത്യേക നമ്പറായ 994-ലോ, ജനറൽ ഡയറക്ടറേറ്റ് ഓഫ് നാർക്കോട്ടിക് കൺട്രോളിന്റെ 995 എന്ന നമ്പറിലോ, 995@gdnc.gov.sa എന്ന ഇമെയിൽ വിലാസത്തിലോ വിവരങ്ങൾ കൈമാറാവുന്നതാണ്. ഇത്തരം വിവരങ്ങൾ നൽകുന്നവരുടെ വിശദാംശങ്ങൾ പൂർണ്ണമായും രഹസ്യമായി സൂക്ഷിക്കുമെന്നും, അവർക്ക് യാതൊരുവിധ നിയമപരമായ ഉത്തരവാദിത്തവും ഉണ്ടാകില്ലെന്നും അധികൃതർ ആവർത്തിച്ചു വ്യക്തമാക്കി.
