ജെറൂസലേം/ഇസ്താംബുൾ: ഗസയിലേക്ക് മാനുഷിക സഹായങ്ങളുമായി പുറപ്പെടുകയും അന്താരാഷ്ട്ര സമുദ്രപരിധിയിൽ വെച്ച് ഇസ്രായേൽ സൈന്യത്തിന്റെ ആക്രമണത്തിന് ഇരയാകുകയും ചെയ്ത ‘ഗ്ലോബൽ സുമൂദ് ഫ്ലോട്ടില’യിലെ മുഴുവൻ വിദേശ സമാധാനപ്രവർത്തകരെയും ഇസ്രായേൽ നാടുകടത്തിയതായി ഔദ്യോഗിക സ്ഥിരീകരണം. ഇസ്രായേൽ കസ്റ്റഡിയിൽ ക്രൂരമായ പീഡനങ്ങൾ നേരിട്ട ആദ്യസംഘം വ്യാഴാഴ്ച തുർക്കിയെയിൽ തിരിച്ചെത്തി. ഗസയിലെ ഇസ്രായേൽ ഉപരോധം തകർക്കുക എന്ന ലക്ഷ്യത്തോടെ ലോകത്തിന്റെ വിവിധ ഭാഗങ്ങളിൽ നിന്നുള്ള നൂറുകണക്കിന് സന്നദ്ധപ്രവർത്തകരാണ് കപ്പലിൽ ഉണ്ടായിരുന്നത്. എന്നാൽ തിങ്കളാഴ്ച കടലിൽ വെച്ച് ഇവരെ സൈന്യം ബലമായി തടയുകയും ഗസയ്ക്ക് സമീപമുള്ള നെഗേവ് മരുഭൂമിയിലെ ക്റ്റ്സിയോട്ട് ജയിലിൽ അടയ്ക്കുകയുമായിരുന്നു.
തുർക്കിയെ വിദേശകാര്യ മന്ത്രാലയത്തിന്റെ വിവരങ്ങൾ പ്രകാരം, 85 തുർക്കി പൗരന്മാർ ഉൾപ്പെടെ 422 സമാധാനപ്രവർത്തകരെ അങ്കാറ ഏർപ്പെടുത്തിയ മൂന്ന് പ്രത്യേക വിമാനങ്ങളിലായി തെക്കൻ ഇസ്രായേലിൽ നിന്നും ഇസ്താംബുൾ വിമാനത്താവളത്തിൽ എത്തിച്ചു. കപ്പൽ കൂട്ടായ്മയായ ‘ഫ്രീഡം ഫ്ലോട്ടില കോളിഷൻ’ ഈ വിവരങ്ങൾ സ്ഥിരീകരിച്ചിട്ടുണ്ട്. പലരെയും അവരുടെ സ്വന്തം രാജ്യങ്ങളിലേക്ക് നേരിട്ടാണ് നാടുകടത്തിയത്. ഇസ്താംബുൾ വിമാനത്താവളത്തിലെ വി.ഐ.പി ടെർമിനലിൽ ഫലസ്തീൻ പതാകകളേന്തിയെത്തിയ വൻ ജനക്കൂട്ടമാണ് സന്നദ്ധപ്രവർത്തകരെ സ്വീകരിച്ചത്.
വിമാനമിറങ്ങിയ തുർക്കി പൗരനായ ബുലാൽ കിതായ് തങ്ങൾ നേരിട്ട ക്രൂരതകൾ വെളിപ്പെടുത്തി. സ്ത്രീകളും പുരുഷന്മാരും ഉൾപ്പെടെയുള്ള എല്ലാവരെയും ഇസ്രായേൽ സൈന്യം ക്രൂരമായി മർദ്ദിച്ചുവെന്നും ഫലസ്തീനികൾ എല്ലാ ദിവസവും അനുഭവിക്കുന്ന ദുരന്തമാണ് തങ്ങൾ നേരിട്ടതെന്നും അദ്ദേഹം പറഞ്ഞു. കൈകൾ പിന്നിലേക്ക് കെട്ടി, നെറ്റി നിലത്തു മുട്ടിച്ച നിലയിലുള്ള തടവുകാരുടെ ദൃശ്യങ്ങൾ ഇസ്രായേലിലെ തീവ്രവലതുപക്ഷ മന്ത്രി ഇറ്റാമർ ബെൻ ഗ്വീർ പങ്കുവെച്ചത് ആഗോളതലത്തിൽ വലിയ പ്രതിഷേധത്തിന് കാരണമായിരുന്നു. എന്നാൽ ഗാസയുടെ മേലുള്ള നിയമപരമായ നാവിക ഉപരോധം ലംഘിക്കാൻ ആരെയും അനുവദിക്കില്ലെന്നാണ് ഇസ്രായേൽ വിദേശകാര്യ മന്ത്രാലയ വക്താവ് ഓറെൻ മർമോർസ്റ്റൈൻ വ്യക്തമാക്കിയത്.
“ഫലസ്തീൻ ജനത ഒറ്റയ്ക്കല്ല, അന്താരാഷ്ട്ര സമുദ്ര അതിർത്തിയിൽ വെച്ച് അവർ ഞങ്ങളെ മർദ്ദിക്കുകയും അറസ്റ്റ് ചെയ്യുകയും ചെയ്തു, എന്നാൽ ഞങ്ങൾ പിന്മാറില്ല, ഞങ്ങൾ വീണ്ടും മടങ്ങിവരും,” എന്ന് ഇസ്താംബുളിലെത്തിയ ഒരു സന്നദ്ധപ്രവർത്തകൻ ആവേശത്തോടെ വിളിച്ചുപറഞ്ഞു. ഈജിപ്തിൽ നിന്നുള്ള പ്രവർത്തകരെ തബ അതിർത്തി വഴിയും ജോർദാനിൽ നിന്നുള്ളവരെ അഖബ വഴിയുമാണ് ഇസ്രായേൽ മടക്കി അയച്ചത്. രണ്ട് ദക്ഷിണ കൊറിയൻ പൗരന്മാരെ അവരുടെ രാജ്യത്തേക്ക് അയച്ചപ്പോൾ കപ്പലിലുണ്ടായിരുന്ന ഏക ഇസ്രായേൽ പൗരനെ ഇസ്രായേലിൽ തന്നെ റിലീസ് ചെയ്തു. അതിനിടെ, തടവിലാക്കപ്പെട്ട പലർക്കും കോടതികളിൽ നിയമസഹായം പോലും ലഭ്യമാക്കിയില്ലെന്ന് നിയമസംരക്ഷണ സംഘടനയായ അദാലയുടെ ലീഗൽ ഡയറക്ടർ സുഹാദ് ബിഷാര കുറ്റപ്പെടുത്തി.
റബ്ബർ ബുള്ളറ്റ് കൊണ്ട് വെടിയേറ്റ രണ്ട് സന്നദ്ധപ്രവർത്തകരെ ആശുപത്രിയിൽ പ്രവേശിപ്പിച്ചിരിക്കുകയാണ്. മറ്റുള്ളവർക്ക് വാരിയെല്ലുകൾക്ക് പരിക്കേറ്റിട്ടുണ്ട്. തന്നെയും മറ്റ് പ്രവർത്തകരെയും കൈകളിലും കാലുകളിലും ചങ്ങലയിട്ട് ക്രൂരമായി മർദ്ദിച്ച ശേഷമാണ് ഇസ്രായേൽ വിമാനത്തിൽ കയറ്റിവിട്ടതെന്ന് ഇറ്റാലിയൻ മാധ്യമപ്രവർത്തകനായ അലസ്സാൻഡ്രോ മാന്റോവാനിയും സാക്ഷ്യപ്പെടുത്തി. 2007 മുതൽ ഗസയിലേക്കുള്ള മുഴുവൻ പ്രവേശന കവാടങ്ങളും ഇസ്രായേലിന്റെ കർശന നിയന്ത്രണത്തിലാണ്. 2023 ഒക്ടോബർ ഏഴിന് ആരംഭിച്ച യുദ്ധത്തിന് ശേഷം ഗസയിൽ ആഹാരത്തിനും മരുന്നിനും കടുത്ത ക്ഷാമമാണ് നേരിടുന്നത്.
