ടെഹ്റാൻ/വാഷിംഗ്ടൺ: പശ്ചിമേഷ്യയെ സമ്പൂർണ്ണ യുദ്ധഭീതിയിലാഴ്ത്തിക്കൊണ്ട് തെക്കൻ ഇറാനിലെ നിർണ്ണായക അടിസ്ഥാന സൗകര്യങ്ങളെ ലക്ഷ്യമിട്ട് തുടർച്ചയായ ആറാം രാത്രിയും അമേരിക്കയുടെ അതിശക്തമായ വ്യോമാക്രമണം. വ്യാഴാഴ്ച അന്താരാഷ്ട്ര സമയം വൈകിട്ട് ആറ് മണിയോടെയാണ് യുഎസ് സൈന്യം പുതിയ റൗണ്ട് ആക്രമണം ആരംഭിച്ചത്. ഇതിന് പിന്നാലെ ഇറാന്റെ തന്ത്രപ്രധാന ദ്വീപായ ക്വെഷ്ം, പ്രമുഖ തുറമുഖ നഗരങ്ങളായ ബന്ദർ അബ്ബാസ്, ചബഹാർ, ബന്ദർ ഇ ഖമീർ, കൂടാതെ ഇറാൻഷഹർ എന്നിവിടങ്ങളിൽ കനത്ത സ്ഫോടനങ്ങൾ ഉണ്ടായതായി പ്രാദേശിക മാധ്യമങ്ങൾ റിപ്പോർട്ട് ചെയ്തു. ഇറാൻഷഹറിലെ ഒരു വിമാനത്താവളത്തിന് നേരെ യുഎസ് മിസൈൽ ആക്രമണം ഉണ്ടായതായും, ബന്ദർ അബ്ബാസിലെ കമ്മ്യൂണിക്കേഷൻ ടവർ തകർത്തതിനെ തുടർന്ന് ആ പ്രദേശമാകെ വൈദ്യുതി ബന്ധം വിച്ഛേദിക്കപ്പെട്ടതായും ഇറാന്റെ തസ്നീം വാർത്താ ഏജൻസി റിപ്പോർട്ട് ചെയ്തു. ബന്ദർ ഇ ഖമീറിലെ ഒരു പ്രധാന പാലത്തിന് നേരെയും യുഎസ് ആക്രമണം ഉണ്ടായതായി ഫാർസ് ഏജൻസി വ്യക്തമാക്കി. കഴിഞ്ഞ മാസം ഇരുരാജ്യങ്ങളും ഒപ്പുവെച്ച താൽക്കാലിക ധാരണാപത്രം പരസ്പരം ലംഘിച്ചെന്ന് ആരോപിച്ച് ഒരാഴ്ചയായി തുടരുന്ന സംഘർഷത്തിന്റെ ഏറ്റവും ഭീകരമായ ഘട്ടമാണിത്.
അമേരിക്കയുടെ ഈ കടുത്ത ആക്രമണങ്ങൾക്ക് മറുപടിയായി ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സ് ബഹ്റൈനിലെ യുഎസ് സൈനിക താവളങ്ങൾക്ക് നേരെ വ്യോമാക്രമണം നടത്തി. അഹ്വാസ് നഗരത്തിലെ കുട്ടികളുടെ കാൻസർ ആശുപത്രിയെപ്പോലും ഒഴിപ്പിക്കാൻ ഇടയാക്കിയ അമേരിക്കയുടെ ‘മൃഗീയമായ’ ആക്രമണത്തിനുള്ള പ്രതികാരമാണിതെന്ന് ഐ.ആർ.ജി.സി പ്രസ്താവിച്ചു. ബഹ്റൈന് പുറമെ കുവൈറ്റ്, ജോർദാൻ എന്നീ രാജ്യങ്ങളിലെ യുഎസ് താവളങ്ങൾക്ക് നേരെയും തങ്ങൾ ആക്രമണം നടത്തിയതായി ഇറാൻ അവകാശപ്പെട്ടു. കുവൈറ്റിലെ സുപ്രധാന കേന്ദ്രങ്ങളെ ലക്ഷ്യമിട്ട് ഇറാൻ 32 ഡ്രോണുകൾ അയച്ചതായും ഇവ വലിയ തോതിൽ ഭൗതിക നാശനഷ്ടങ്ങൾ ഉണ്ടാക്കിയതായും കുവൈറ്റ് സൈന്യം സ്ഥിരീകരിച്ചു. യുഎസ് തങ്ങളുടെ ആക്രമണം നിർത്തിയില്ലെങ്കിൽ ഇറാന്റെ തിരിച്ചടി പുതിയ മേഖലകളിലേക്ക് വ്യാപിപ്പിക്കുമെന്ന് ഇറാൻ സൈനിക വക്താവ് മുഹമ്മദ് അക്രമിനിയ മുന്നറിയിപ്പ് നൽകി. കടുത്ത അനിശ്ചിതത്വം നിലനിൽക്കുന്ന സാഹചര്യത്തിൽ ഖത്തർ ഉൾപ്പെടെയുള്ള ഗൾഫ് രാജ്യങ്ങൾ തങ്ങളുടെ വ്യോമപ്രതിരോധ സംവിധാനങ്ങളും സുപ്രധാന അടിസ്ഥാന സൗകര്യങ്ങളുടെ സുരക്ഷയും ശക്തമാക്കിയിട്ടുണ്ടെന്ന് ദോഹയിൽ നിന്നും അൽ ജസീറ റിപ്പോർട്ട് ചെയ്യുന്നു.
ഇറാന്റെ ഊർജ്ജ പ്ലാന്റുകളും പാലങ്ങളും തകർക്കുമെന്ന യുഎസ് പ്രസിഡന്റ് ഡൊണാൾഡ് ട്രംപിന്റെ ഭീഷണിക്ക്, മേഖലയിലെ യുഎസ് താവളങ്ങളുടെ ഇൻഫ്രാസ്ട്രക്ചർ തകർത്തുകൊണ്ട് ‘അതിശക്തമായ തിരിച്ചടി’ നൽകുമെന്ന് ഇറാന്റെ ബ്രിഗേഡിയർ ജനറൽ ഇബ്രാഹിം സോൽഫഗാരിയും വ്യക്തമാക്കിയിരുന്നു. എന്നാൽ വ്യാഴാഴ്ച വൈറ്റ് ഹൗസ് പ്രസ് സെക്രട്ടറി കരോലിൻ ലീവിറ്റ് നേരിയ നയതന്ത്ര സൂചനകൾ നൽകി രംഗത്തെത്തി. ട്രംപ് ഇറാന്റെ നടപടികൾക്ക് കടുത്ത തിരിച്ചടി നൽകുമെങ്കിലും ഒപ്പം തന്നെ നയതന്ത്ര ചർച്ചകൾക്ക് എപ്പോഴും തയ്യാറാണെന്ന് അവർ വ്യക്തമാക്കി. ഹോർമോസ് കടലിടുക്കിലൂടെയുള്ള കപ്പലുകൾക്ക് നേരെ ഇറാൻ ആക്രമണം നടത്തുന്നത് അമേരിക്ക വെച്ചുപൊറുപ്പിക്കില്ലെന്നും, എങ്കിലും യുഎസുമായി ധാരണയിലെത്താൻ ഇറാൻ താല്പര്യം പ്രകടിപ്പിച്ചിട്ടുണ്ടെന്നും അവർ കൂട്ടിച്ചേർത്തു.
എന്നാൽ അമേരിക്കയുമായി ചർച്ചകൾക്ക് തങ്ങൾക്ക് നിലവിൽ യാതൊരു പദ്ധതിയുമില്ലെന്നും, രാജ്യത്തിന്റെ പ്രതിരോധത്തിൽ മാത്രമാണ് ശ്രദ്ധയെന്നുമാണ് ഇറാന്റെ വിദേശകാര്യ മന്ത്രാലയം വ്യക്തമാക്കിയത്. ഇരുവിഭാഗവും തങ്ങളുടെ ആവശ്യങ്ങൾക്ക് മുന്നിൽ മറു വിഭാഗം ആദ്യം കീഴടങ്ങണം എന്ന വാശിയിലാണ് ഈ സൈനിക നീക്കങ്ങൾ തുടരുന്നതെന്ന് ജോർജ്ജ് വാഷിംഗ്ടൺ യൂണിവേഴ്സിറ്റിയിലെ പൊളിറ്റിക്സ് പ്രൊഫസർ സിന അസോദി വിലയിരുത്തുന്നു. അമേരിക്ക ഇറാന്റെ ചർച്ചാ പ്രവേശനവും കീഴടങ്ങലും ആഗ്രഹിക്കുമ്പോൾ, യുഎസ് നാവിക ഉപരോധം പൂർണ്ണമായി പിൻവലിക്കുകയും ധാരണാപത്രം പൂർണ്ണമായി നടപ്പിലാക്കുകയുമാണ് ഇറാന്റെ ആവശ്യമെന്നും അദ്ദേഹം ചൂണ്ടിക്കാട്ടി.
