തിരുവനന്തപുരം: കേരള പോലീസ് എ.ഐ.ജി ജി. പൂങ്കുഴലി കേന്ദ്ര ഡെപ്യൂട്ടേഷനിൽ സി.ബി.ഐയിലേക്ക് (CBI) മാറ്റപ്പെടുന്നു. ഇതുസംബന്ധിച്ച് കേന്ദ്ര ആഭ്യന്തര മന്ത്രാലയം ഔദ്യോഗിക ഉത്തരവ് പുറത്തിറക്കി. അഞ്ച് വർഷമാണ് ഡെപ്യൂട്ടേഷൻ കാലാവധി നിശ്ചയിച്ചിരിക്കുന്നത്. ഉത്തരവിന്റെ അടിസ്ഥാനത്തിൽ അടുത്ത ഒരു മാസത്തിനകം അവർ സി.ബി.ഐയിൽ ഔദ്യോഗികമായി ചുമതലയേൽക്കും.
മുൻ എം.എൽ.എ രാഹുൽ മാങ്കൂട്ടത്തിൽ പ്രതിയായ ബലാത്സംഗക്കേസിലെ മുഖ്യ അന്വേഷണ ഉദ്യോഗസ്ഥയാണ് ജി. പൂങ്കുഴലി. എന്നാൽ സി.ബി.ഐയിൽ ജോയിൻ ചെയ്യുന്നതിന് മുൻപായി അവർ ഈ കേസിലെ കുറ്റപത്രം കോടതിയിൽ സമർപ്പിക്കുമെന്നാണ് വിവരം. രാഹുൽ മാങ്കൂട്ടത്തിലിനെതിരെ ആകെ മൂന്ന് ബലാത്സംഗ കേസുകളാണ് രജിസ്റ്റർ ചെയ്തിട്ടുള്ളത്. ഇതിൽ ഒരു കേസിൽ മാത്രമാണ് ഇതുവരെ കുറ്റപത്രം സമർപ്പിച്ചിട്ടുള്ളത്. ബാക്കി കേസുകളുടെ അന്വേഷണവും നിലവിൽ അന്തിമ ഘട്ടത്തിലാണ്.
ഐ.പി.എസ് ഉദ്യോഗസ്ഥർ കേന്ദ്ര ഡെപ്യൂട്ടേഷനിൽ പോകുന്നത് സർവീസിന്റെ ഭാഗമായുള്ള നിർബന്ധിത നടപടിയുടെ ഭാഗമായാണെന്നും, ഡെപ്യൂട്ടേഷൻ കേസ് അട്ടിമറിക്കാനുള്ള നീക്കമല്ലെന്നും ഔദ്യോഗിക അധികൃതർ വ്യക്തമാക്കിയിട്ടുണ്ട്.
