വാഷിംഗ്ടൺ/ന്യൂയോർക്ക്: ഇറാൻ തനിക്കെതിരെ വധശ്രമത്തിന് മുതിരുകയോ തന്നെ വധിക്കുകയോ ചെയ്താൽ, ചരിത്രത്തിൽ രാജ്യം ഇന്നേവരെ കണ്ടിട്ടില്ലാത്ത വിധം അതിശക്തമായ ബോംബാക്രമണത്തിലൂടെ അവരെ തകർക്കാൻ താൻ സൈന്യത്തിന് പ്രത്യേക നിർദ്ദേശം നൽകിയിട്ടുണ്ടെന്ന് യുഎസ് പ്രസിഡന്റ് ഡൊണാൾഡ് ട്രംപ്. അമേരിക്കൻ മാധ്യമമായ ‘ന്യൂയോർക്ക് പോസ്റ്റിന്’ നൽകിയ അഭിമുഖത്തിലാണ് ട്രംപ് ഈ അതീവ ഗുരുതരമായ വെളിപ്പെടുത്തൽ നടത്തിയത്. ഇറാന്റെ പരമോന്നത നേതാവ് അലി ഖൊമേനിയുടെ സംസ്കാര ചടങ്ങുകൾക്കിടെ ട്രംപിനെ വധിക്കാൻ ആഹ്വാനം ചെയ്യുന്ന ബാനറുകൾ പ്രത്യക്ഷപ്പെട്ടതിനെക്കുറിച്ചുള്ള സൂചനകളോടെയാണ് യുഎസ് പ്രസിഡന്റിന്റെ ഈ പ്രതികരണം.
താൻ ദീർഘകാലമായി ഇറാന്റെ വധപ്പട്ടികയിൽ (Kill list) ഒന്നാം സ്ഥാനത്തുണ്ടെന്നും അത്തരം ഭീഷണികളാണ് തങ്ങൾ ഇപ്പോൾ നേരിട്ടുകൊണ്ടിരിക്കുന്നതെന്നും ട്രംപ് അഭിമുഖത്തിൽ വ്യക്തമാക്കി. “ഒരു കാര്യം ഞാൻ വ്യക്തമാക്കാം, എനിക്ക് എന്തെങ്കിലും സംഭവിച്ചാൽ, ഇറാൻ മുൻപ് ഒരിക്കലും കണ്ടിട്ടില്ലാത്ത തരത്തിലുള്ള അതിശക്തമായ ബോംബാക്രമണം അവിടെ നടത്താൻ ഞാൻ കൃത്യമായ നിർദ്ദേശങ്ങൾ നൽകിക്കഴിഞ്ഞു,” ട്രംപ് പറഞ്ഞു. ഇറാന്റെ ഭരണകൂടം വർഷങ്ങളായി താൻ കൊല്ലപ്പെടാൻ ആഗ്രഹിക്കുന്നുണ്ടെന്നും, താൻ മരിച്ചാൽ ജനങ്ങൾ തന്നെ ഓർക്കുമെന്നും മിസ് ചെയ്യുമെന്നും കരുതുന്നതായി അദ്ദേഹം കൂട്ടിച്ചേർത്തു.
ഇരുരാജ്യങ്ങളും തമ്മിലുള്ള താൽക്കാലിക വെടിനിർത്തൽ ധാരണകൾ അവസാനിച്ചതായി പ്രഖ്യാപിച്ചതിന് പിന്നാലെ ഇറാന്റെ തീരദേശ നഗരങ്ങളിലും തുറമുഖങ്ങളിലും അമേരിക്കൻ വ്യോമസേന ശക്തമായ ബോംബാക്രമണം നടത്തുന്ന പശ്ചാത്തലത്തിലാണ് ട്രംപിന്റെ ഈ പ്രസ്താവന വരുന്നത്. തനിക്കെതിരെ ഇറാൻ പുതിയ വധശ്രമങ്ങൾ ആസൂത്രണം ചെയ്യുന്നതായി ഇസ്രായേൽ രഹസ്യാന്വേഷണ ഏജൻസികൾ ഈയാഴ്ച അമേരിക്കയ്ക്ക് പുതിയ മുന്നറിയിപ്പ് നൽകിയിരുന്നു. മുൻപ് 2020-ൽ തന്റെ ആദ്യ ഭരണകാലത്ത് ഇറാന്റെ പ്രമുഖ ജനറൽ ഖാസിം സുലൈമാനിയെ വധിക്കാൻ ഉത്തരവിട്ടത് മുതൽ ഇറാന്റെ പ്രധാന ലക്ഷ്യം താനാണെന്ന് ട്രംപ് ഇതിന് മുൻപും പല വേദികളിലും ആവർത്തിച്ചിട്ടുണ്ട്.
