ടെഹ്റാൻ/വാഷിംഗ്ടൺ: ഇറാന്റെ സൈനിക താവളങ്ങളെ ലക്ഷ്യമിട്ട് അമേരിക്കൻ സൈന്യം വീണ്ടും കടുത്ത വ്യോമാക്രമണ പരമ്പരകൾ അഴിച്ചുവിട്ടു. തങ്ങൾ മതി എന്ന് പറയുന്നതുവരെ ആക്രമണം തുടരുമെന്ന യുഎസ് പ്രസിഡന്റ് ഡൊണാൾഡ് ട്രംപിന്റെ പ്രഖ്യാപനത്തിന് തൊട്ടുപിന്നാലെയാണ് അമേരിക്കയുടെ പുതിയ റൗണ്ട് മിസൈൽ-വ്യോമാക്രമണങ്ങൾ ഉണ്ടായിരിക്കുന്നത്. ആക്രമണത്തിൽ ഇറാന്റെ തന്ത്രപ്രധാനമായ തീരദേശ നഗരങ്ങളിലും ദ്വീപുകളിലും വൻ സ്ഫോടനങ്ങൾ ഉണ്ടായതായി ഇറാനിയൻ ഔദ്യോഗിക മാധ്യമങ്ങൾ സ്ഥിരീകരിച്ചു.
ഹോർമോസ് കടലിടുക്കിനോട് ചേർന്ന് കിടക്കുന്ന തന്ത്രപ്രധാന ദ്വീപായ ക്വെഷ്ം, ഇറാന്റെ പ്രധാന നാവിക താവളവും തുറമുഖ നഗരവുമായ ബന്ദർ അബ്ബാസ്, ഒമാൻ കടലിടുക്കിന് സമീപമുള്ള ചബഹാർ തുറമുഖം എന്നിവിടങ്ങളിലാണ് യുഎസ് സൈന്യം ശക്തമായ ബോംബാക്രമണം നടത്തിയത്. ഈ മേഖലകളിലെ ഇറാന്റെ റഡാർ സംവിധാനങ്ങൾ, മിസൈൽ വിക്ഷേപണ തറകൾ, നാവിക കേന്ദ്രങ്ങൾ എന്നിവ തകർക്കുക എന്ന ലക്ഷ്യത്തോടെയായിരുന്നു അമേരിക്കൻ നീക്കം. ഇറാന്റെ ഭാഗത്തുനിന്നുള്ള എണ്ണക്കപ്പൽ പ്രതിരോധങ്ങളെയും ഡ്രോൺ ആക്രമണങ്ങളെയും പൂർണ്ണമായി നിർവീര്യമാക്കാൻ ഈ വ്യോമാക്രമണങ്ങളിലൂടെ സാധിച്ചെന്നാണ് യുഎസ് പ്രതിരോധ കേന്ദ്രങ്ങൾ നൽകുന്ന സൂചന. എന്നാൽ ആക്രമണത്തിൽ ഉണ്ടായ നാശനഷ്ടങ്ങളുടെയോ ആളപായങ്ങളുടെയോ കൃത്യമായ വിവരങ്ങൾ ഇറാൻ ഇതുവരെ പുറത്തുവിട്ടിട്ടില്ല.
