ടെഹ്റാൻ: ഫെബ്രുവരി 28-ന് ആരംഭിച്ച യുദ്ധം അവസാനിപ്പിക്കുന്നതിനായുള്ള ചർച്ചകളിൽ, അമേരിക്ക സമർപ്പിച്ച പുതിയ നിർദ്ദേശങ്ങളിൽ യാതൊരുവിധ വിട്ടുവീഴ്ചകളും അടങ്ങിയിട്ടില്ലെന്ന് ഇറാൻ ഔദ്യോഗിക മാധ്യമങ്ങൾ റിപ്പോർട്ട് ചെയ്തു. യുദ്ധം അവസാനിപ്പിക്കാൻ വാഷിംഗ്ടൺ മുന്നോട്ടുവെച്ച അഞ്ചിന നിർദ്ദേശങ്ങളിൽ, ഇറാന്റെ ആണവനിലയങ്ങളുടെ പ്രവർത്തനം ഒന്നായി പരിമിതപ്പെടുത്തണമെന്നും സമ്പുഷ്ടീകരിച്ച യുറേനിയം ശേഖരം മുഴുവൻ അമേരിക്കയ്ക്ക് കൈമാറണമെന്നും ആവശ്യപ്പെടുന്നുണ്ട്. എന്നാൽ ഇറാന്റെ മരവിപ്പിച്ച വിദേശ ആസ്തികളുടെ 25 ശതമാനം പോലും വിട്ടുകൊടുക്കാനോ യുദ്ധക്കെടുതികൾക്ക് നഷ്ടപരിഹാരം നൽകാനോ അമേരിക്ക തയ്യാറായിട്ടില്ലെന്ന് വാർത്താ ഏജൻസിയായ ഫാർസ് വെളിപ്പെടുത്തി. യുഎസ് മുന്നോട്ടുവെച്ച ഈ കടുത്ത നിബന്ധനകൾ ചർച്ചകളെ പൂർണ്ണമായും വഴിമുട്ടിക്കുന്നതാണെന്ന് മെഹർ വാർത്താ ഏജൻസി വിലയിരുത്തി.
ഇസ്രായേൽ ലെബനനിൽ നടത്തുന്ന സൈനിക നീക്കങ്ങൾ ഉൾപ്പെടെ എല്ലാ മുന്നണികളിലെയും യുദ്ധം അവസാനിപ്പിക്കണമെന്നും ഏപ്രിൽ 13 മുതൽ ഇറാന്റെ തുറമുഖങ്ങൾക്ക് മേൽ അമേരിക്ക ഏർപ്പെടുത്തിയ നാവിക ഉപരോധം പിൻവലിക്കണമെന്നുമാണ് ഇറാന്റെ പ്രധാന ആവശ്യം. കൂടാതെ തങ്ങളുടെ മേലുള്ള സാമ്പത്തിക ഉപരോധങ്ങൾ നീക്കണമെന്നും തന്ത്രപ്രധാനമായ ഹോർമുസ് കടലിടുക്കിന്റെ നിയന്ത്രണം തങ്ങൾ തന്നെ തുടരുമെന്നും ഇറാൻ വിദേശകാര്യ മന്ത്രാലയം വ്യക്തമാക്കി. അതേസമയം, ചർച്ചകൾ ആരംഭിച്ചാൽ മാത്രമേ ആക്രമണങ്ങൾ നിർത്തലാക്കൂ എന്ന വാശിയിലാണ് അമേരിക്ക.
മേഖലയിൽ സംഘർഷം നിലനിൽക്കുന്ന പശ്ചാത്തലത്തിൽ, ഇറാനെതിരെ വീണ്ടും ആക്രമണം നടത്താൻ തുനിയുന്ന അമേരിക്കൻ പ്രസിഡന്റ് ഡൊണാൾഡ് ട്രംപിന് ഇറാന്റെ സായുധ സേനാ വക്താവ് അബുൽഫസൽ ശേകർച്ചി കടുത്ത മുന്നറിയിപ്പ് നൽകി. അമേരിക്ക വീണ്ടും ആക്രമണത്തിന് മുതിർന്നാൽ രാജ്യം ഇതുവരെ കാണാത്ത രീതിയിലുള്ള ശക്തവും അപ്രതീക്ഷിതവുമായ തിരിച്ചടി നേരിടേണ്ടി വരുമെന്ന് അദ്ദേഹം ഓർമ്മിപ്പിച്ചു. ഇറാന്റെ എണ്ണ ഉൽപ്പാദന കേന്ദ്രങ്ങളെ ലക്ഷ്യം വെച്ചാണ് നീക്കമെങ്കിൽ, അമേരിക്കയ്ക്കോ ലോകത്തിലെ മറ്റ് രാജ്യങ്ങൾക്കോ ഈ മേഖലയിൽ നിന്നുള്ള എണ്ണ ദീർഘകാലത്തേക്ക് ലഭ്യമാകാത്ത വിധത്തിലുള്ള പ്രത്യാക്രമണം ഉണ്ടാകുമെന്ന് ഇറാന്റെ പാർലമെന്റ് ഡെപ്യൂട്ടി സ്പീക്കർ ഹമീദ്റേസ ഹാജിബാബായിയും മുന്നറിയിപ്പ് നൽകി.
