ടെഹ്റാൻ/മനാമ: പശ്ചിമേഷ്യയെ വൻ യുദ്ധഭീതിയിലാഴ്ത്തിക്കൊണ്ട് ശനിയാഴ്ച ബഹ്റൈന് നേരെ ഇറാന്റെ കൂട്ടത്തോടെയുള്ള ഡ്രോൺ ആക്രമണം. ഇതോടൊപ്പം തന്നെ തന്ത്രപ്രധാനമായ ഹോർമുസ് കടലിടുക്കിൽ മറ്റൊരു വാണിജ്യ കപ്പലിന് നേരെയും ആക്രമണമുണ്ടായി. ഇറാന്റെ സൈനിക താവളങ്ങൾക്ക് നേരെ അമേരിക്ക വ്യോമാക്രമണം നടത്തി മണിക്കൂറുകൾക്കകമാണ് ഗൾഫ് മേഖലയിലെ സാഹചര്യങ്ങൾ പൂർണ്ണമായും വഷളാക്കിക്കൊണ്ട് ഇറാന്റെ ഈ ശക്തമായ തിരിച്ചടി. തങ്ങളുടെ രാജ്യത്തെ ലക്ഷ്യമിട്ട് നിരവധി ഇറാനിയൻ ഡ്രോണുകൾ എത്തിയതായും, ഈ ആക്രമണം പൗരന്മാരുടെയും താമസക്കാരുടെയും സുരക്ഷയ്ക്ക് നേരെയുള്ള കടുത്ത ഭീഷണിയാണെന്നും ബഹ്റൈൻ വിദേശകാര്യ മന്ത്രാലയം ഔദ്യോഗികമായി സ്ഥിരീകരിച്ചു.
മേഖലയിലെ അമേരിക്കൻ വിദേശകാര്യ സെക്രട്ടറി മാർക്കോ റൂബിയോയുടെ പങ്കാളിത്തത്തോടെ ഗൾഫ് സഹകരണ കൗൺസിൽ വിദേശകാര്യ മന്ത്രിമാരുടെ അടിയന്തര യോഗം ബഹ്റൈനിൽ സമാപിച്ചതിന് തൊട്ടുപിന്നാലെയാണ് ഇറാന്റെ ആക്രമണം ഉണ്ടായത്. ഇറാന്റെ ആക്രമണങ്ങൾ അവസാനിപ്പിക്കണമെന്നും ഹോർമുസ് കടലിടുക്ക് പൂർണ്ണമായി തുറന്നുനൽകണമെന്നും ഈ യോഗം ആവശ്യപ്പെട്ടിരുന്നു. ഇതിന് പിന്നാലെ, മേഖലയിലെ ‘അമേരിക്കൻ സൈന്യത്തിന്റെ’ കേന്ദ്രങ്ങൾ എന്ന് വിശേഷിപ്പിച്ച നിരവധി താവളങ്ങൾക്ക് നേരെ തങ്ങൾ ആക്രമണം നടത്തിയതായി ഇറാന്റെ റെവല്യൂഷണറി ഗാർഡ് കോർപ്സ് അവകാശപ്പെട്ടു. ഇറാന്റെ മിസൈൽ-ഡ്രോൺ കേന്ദ്രങ്ങൾക്കും കോസ്റ്റൽ റഡാർ സംവിധാനങ്ങൾക്കും നേരെ അമേരിക്ക നടത്തിയ ശക്തമായ ബോംബാക്രമണത്തിനുള്ള മറുപടിയാണ് ഇതെന്നാണ് ഇറാൻ വ്യക്തമാക്കുന്നത്. താൽക്കാലിക വെടിനിർത്തൽ കരാർ ലംഘിച്ച് ഈ ആഴ്ച ആദ്യം വാണിജ്യ കപ്പലിന് നേരെ ഇറാൻ നടത്തിയ ഡ്രോൺ ആക്രമണത്തിനാണ് യു.എസ് സൈന്യം തിരിച്ചടി നൽകിയത്. തർക്കങ്ങളുണ്ടെങ്കിൽ ഫോണിലൂടെ ചർച്ചയ്ക്ക് തയ്യാറാകണമെന്നും എന്നാൽ അക്രമത്തെ അക്രമം കൊണ്ട് തന്നെ നേരിടുമെന്നും യു.എസ് വൈസ് പ്രസിഡന്റ് ജെ.ഡി വാൻസ് ഇറാനോട് ആവശ്യപ്പെട്ടു.
ഇതിനിടെ, ശനിയാഴ്ച ഹോർമുസ് കടലിടുക്കിൽ വെച്ച് ഒരു എണ്ണക്കപ്പലിന് നേരെ ആക്രമണം ഉണ്ടായതായി യുണൈറ്റഡ് കിംഗ്ഡം മാരിടൈം ട്രേഡ് ഓപ്പറേഷൻസ് റിപ്പോർട്ട് ചെയ്തു. കപ്പലിലെ ജീവനക്കാർ സുരക്ഷിതരാണെന്നും പരിസ്ഥിതി നാശനഷ്ടങ്ങൾ ഒന്നും റിപ്പോർട്ട് ചെയ്തിട്ടില്ലെന്നും വ്യക്തമാക്കിയെങ്കിലും ആക്രമണത്തിന്റെ ഉത്തരവാദിത്തം ആരും ഏറ്റെടുത്തിട്ടില്ല. ഒമാൻ തീരത്തുകൂടിയുള്ള കപ്പൽ ഗതാഗത ഇടനാഴി വിപുലീകരിക്കുന്നതായി യു.എസ് നാവികസേനയുടെ പിന്തുണയുള്ള ജോയിന്റ് മാരിടൈം ഇൻഫർമേഷൻ സെന്റർ പ്രഖ്യാപിച്ചതിന് തൊട്ടുപിന്നാലെയാണ് ഈ പുതിയ ആക്രമണം. മേഖലയിൽ വാണിജ്യ കപ്പലുകൾക്ക് നേരെയുള്ള ഭീഷണി ഇപ്പോഴും കനത്തതാണെന്നും, മൈനുകൾ നീക്കം ചെയ്യുന്ന സൈനിക നടപടികൾ ശ്രദ്ധിക്കണമെന്നും കപ്പലുകൾക്ക് ജാഗ്രതാ നിർദ്ദേശം നൽകിയിട്ടുണ്ട്. അന്താരാഷ്ട്ര കപ്പൽപ്പാതയായ ഹോർമുസ് കടലിടുക്കിലൂടെ പോകുന്ന കപ്പലുകളിൽ നിന്ന് ട്രാൻസിറ്റ് ഫീസ് ഈടാക്കുമെന്ന ഇറാന്റെ ഭീഷണിയെ അമേരിക്കയും ഗൾഫ് രാജ്യങ്ങളും തള്ളിക്കളഞ്ഞിരുന്നു. നിലവിൽ 60 ദിവസത്തെ താൽക്കാലിക ചട്ടക്കൂടിനുള്ളിൽ നിന്നുകൊണ്ട് യുറാനിയം സമ്പുഷ്ടീകരണവും കപ്പൽ ഗതാഗത സ്വാതന്ത്ര്യവും സംബന്ധിച്ച് യു.എസും ഇറാനും തമ്മിൽ സമാധാന ചർച്ചകൾ തുടരുന്നതിനിടയിലാണ് ഈ കനത്ത സൈനിക വിള്ളൽ ഉണ്ടായിരിക്കുന്നത്.
