മിയാമി: സൂപ്പർ താരം കിലിയൻ എംബാപ്പെ ലോകകപ്പ് ചരിത്രത്തിൽ ഏറ്റവും കൂടുതൽ ഗോൾ നേടുന്ന താരമെന്ന റെക്കോർഡ് കുറിച്ച ആവേശപ്പോരാട്ടത്തിൽ ഫ്രാൻസിനെ നാലിനെതിരെ ആറ് ഗോളുകൾക്ക് തകർത്ത് ഇംഗ്ലണ്ട് 2026 ലോകകപ്പിൽ മൂന്നാം സ്ഥാനം സ്വന്തമാക്കി. മിയാമിയിലെ കടുത്ത ചൂടിൽ നടന്ന ലൂസേഴ്സ് ഫൈനലിൽ ഇരു ടീമുകളുടെയും പരിശീലകർ പ്രമുഖ താരങ്ങൾക്ക് വിശ്രമം അനുവദിച്ചാണ് ടീമിനെ ഇറക്കിയത്. ഇംഗ്ലണ്ട് പരിശീലകൻ തോമസ് ടുഹൽ തന്റെ സ്റ്റാർട്ടിങ് ഇലവനിൽ നിന്ന് ഹാരി കെയിൻ, ജൂഡ് ബെല്ലിങ്ഹാം എന്നിവരെ ഒഴിവാക്കിയപ്പോൾ, ഫ്രഞ്ച് കോച്ച് ദിദിയർ ദെഷാംപ്സ് തന്റെ അവസാന മത്സരത്തിൽ ബ്രാഡ്ലി ബാർക്കോള, ഉസ്മാൻ ഡെംബെലെ എന്നിവരെ ബെഞ്ചിലിരുത്തി. കളിയുടെ മൂന്നാം മിനിറ്റിൽ ആഴ്സണൽ മധ്യനിര താരം ഡെക്ലാൻ റൈസ് ദൂരത്തുനിന്നുതിർത്ത ഷോട്ടിലൂടെ ഇംഗ്ലണ്ടിനെ മുന്നിലെത്തിച്ചു. തൊട്ടുപിന്നാലെ എസ്രി കോൻസ ഹെഡറിലൂടെ ലീഡ് 2-0 ആക്കി ഉയർത്തി. ഫ്രാൻസിന്റെ തിരിച്ചടിക്കാനുള്ള ശ്രമങ്ങളെ ഇംഗ്ലണ്ടിന്റെ രണ്ടാം ഗോൾകീപ്പർ ഡീൻ ഹെൻഡേഴ്സൺ മികച്ച സേവുകളിലൂടെ തടഞ്ഞു. എന്നാൽ, കൗണ്ടർ അറ്റാക്കിലൂടെ ബുകായോ സാക്ക മൂന്നാം ഗോളും, ഒന്നാം പകുതിയുടെ ഇഞ്ചുറി ടൈമിൽ തന്റെ രണ്ടാം ഗോളും നേടിയതോടെ ആദ്യ പകുതിയിൽ ഇംഗ്ലണ്ട് 4-0 ന് മുന്നിലെത്തി.
ആദ്യ പകുതിയിലെ കനത്ത തകർച്ചയെ തുടർന്ന് ഫ്രഞ്ച് കോച്ച് ദെഷാംപ്സ് നാല് മാറ്റങ്ങളോടെയാണ് രണ്ടാം പകുതിയിൽ ടീമിനെ ഇറക്കിയത്. പകരക്കാരനായി എത്തിയ ഉസ്മാൻ ഡെംബെലെ, ഡയോട്ട് ഉപമെക്കാനോ, ലൂക്കാസ് ഡിഗ്നെ, ബാർക്കോള എന്നിവർ കളിക്ക് വേഗത കൂട്ടി. വൈകാതെ ടൂർണമെന്റിലെ തന്റെ ഒൻപതാം ഗോൾ നേടി കിലിയൻ എംബാപ്പെ ഫ്രാൻസിന് ആദ്യ ഗോൾ സമ്മാനിച്ചു. ഇതോടെ ഗോൾഡൻ ബൂട്ട് റേസിൽ ലയണൽ മെസ്സിയെ അദ്ദേഹം മറികടന്നു. തൊട്ടുപിന്നാലെ ബാർക്കോള ഫ്രാൻസിന്റെ രണ്ടാം ഗോളും സ്കോർ ചെയ്തു. തുടർന്ന് ഒലീസെയുടെ പാസിൽ നിന്ന് എംബാപ്പെ തന്റെ രണ്ടാം ഗോൾ നേടി ലോകകപ്പ് ചരിത്രത്തിൽ ആകെ 22 ഗോളുകളുമായി എക്കാലത്തെയും മികച്ച ഗോൾവേട്ടക്കാരനെന്ന ചരിത്ര റെക്കോർഡ് സ്വന്തമാക്കി. എന്നാൽ, സമനിലയ്ക്കായുള്ള ഫ്രാൻസിന്റെ ശ്രമങ്ങൾക്കിടെ ഡിജെഡ് സ്പെൻസിനെ ബോക്സിൽ വീഴ്ത്തിയതിന് ഇംഗ്ലണ്ടിന് അനുകൂലമായി പെനാൽറ്റി ലഭിച്ചു. കിക്ക് എടുത്ത സാക്ക ഹാട്രിക് തികച്ചുകൊണ്ട് ഇംഗ്ലണ്ടിന്റെ ലീഡ് 5-3 ആക്കി. കളി അവസാനിക്കാൻ മിനിറ്റുകൾ ബാക്കിനിൽക്കെ ഡെംബെലെ ഫ്രാൻസിന്റെ നാലാം ഗോൾ നേടിയെങ്കിലും, പകരക്കാരനായി ഇറങ്ങിയ ജൂഡ് ബെല്ലിങ്ഹാം തകർപ്പൻ സോളോ ഗോളിലൂടെ ഇംഗ്ലണ്ടിന്റെ ഗോൾപട്ടിക 6-4 ൽ പൂർത്തിയാക്കി. ഒരു ലോകകപ്പിൽ 7 ഗോളുകൾ നേടുന്ന ആദ്യ ഇംഗ്ലണ്ട് താരമെന്ന ബഹുമതിയും ഇതോടെ ബെല്ലിങ്ഹാം സ്വന്തമാക്കി.
ഈ വിജയത്തോടെ 1966-ൽ കിരീടം നേടിയതിന് ശേഷമുള്ള തങ്ങളുടെ ഏറ്റവും മികച്ച ലോകകപ്പ് നേട്ടമാണ് ഇംഗ്ലണ്ട് സ്വന്തമാക്കിയത്. അതേസമയം, 2018-ൽ ഫ്രാൻസിനെ ലോകകപ്പ് വിജയത്തിലേക്കും നാല് വർഷം മുൻപ് റണ്ണേഴ്സ് അപ്പാക്കാനും നയിച്ച ദിദിയർ ദെഷാംപ്സിന്റെ പരിശീലകനായുള്ള അവസാന മത്സരം കനത്ത പരാജയത്തോടെ അവസാനിച്ചു. സെമിഫൈനലിൽ സ്പെയിനോട് പരാജയപ്പെട്ടായിരുന്നു ഫ്രാൻസിന്റെ പുറത്താകൽ. ഞായറാഴ്ച ന്യൂജേഴ്സിയിലെ ഈസ്റ്റ് റഥർഫോർഡിൽ നടക്കുന്ന കലാശപ്പോരാട്ടത്തിൽ നിലവിലെ ചാമ്പ്യന്മാരായ അർജന്റീന യൂറോപ്യൻ ചാമ്പ്യന്മാരായ സ്പെയിനെ നേരിടും.
