ന്യൂഡൽഹി: ജുഡീഷ്യൽ കസ്റ്റഡിയിൽനിന്ന് മോചിതരായതിന് പിന്നാലെ കോക്രോച്ച് ജനതാ പാർട്ടി (സി.ജെ.പി) നേതാക്കളായ സൗരവ് ദാസ്, അശുതോഷ് റങ്ക എന്നിവർക്ക് ഡൽഹി പോലീസിന്റെ സമൻസ്. വ്യാഴാഴ്ച രജൗരി ഗാർഡനിലെ ക്രൈംബ്രാഞ്ച് ഓഫീസിൽ നേരിട്ട് ഹാജരാകാനാണ് പോലീസ് നൽകിയിരിക്കുന്ന നിർദ്ദേശം.
സമാധാനം പാലിക്കാമെന്നും നിയമം അനുസരിക്കാമെന്നും രേഖാമൂലം ഉറപ്പുനൽകിയതിനൊപ്പം വ്യക്തിഗത ബോണ്ടും ജാമ്യക്കാരുടെ ബോണ്ടും സമർപ്പിച്ചതോടെയാണ് പ്രത്യേക എക്സിക്യൂട്ടീവ് മജിസ്ട്രേറ്റ് കോടതിയുടെ ഉത്തരവിനെത്തുടർന്ന് ഇരുവരും ജയിൽ മോചിതരായത്. എല്ലാ വാദംകേൾക്കൽ തീയതികളിൽ കോടതിയിൽ ഹാജരാകണമെന്നും ബോണ്ടിലെ നിബന്ധനകൾ കർശനമായി പാലിക്കണമെന്നും കോടതി നിർദ്ദേശിച്ചിട്ടുണ്ട്. ജന്തർമന്തറിനെ ഔദ്യോഗിക പ്രതിഷേധസ്ഥലമെന്ന പദവിയിൽനിന്ന് നീക്കിയ തീരുമാനം പിൻവലിക്കുന്നതുവരെ അവിടെ പ്രതിഷേധങ്ങൾക്ക് ആഹ്വാനം ചെയ്യില്ലെന്നും, ഭാവിയിലെ പ്രതിഷേധങ്ങൾ ഭരണഘടനാപരമായ ചട്ടക്കൂടിനുള്ളിൽ നിന്ന് മാത്രം നടത്തുമെന്നും അവർ കോടതിക്ക് മുമ്പാകെ രേഖാമൂലം ഉറപ്പുനൽകിയിട്ടുണ്ട്.
സമാധാനലംഘനത്തിനും ക്രമസമാധാന പ്രശ്നങ്ങൾക്കും സാധ്യതയുണ്ടെന്ന് ചൂണ്ടിക്കാട്ടി ഇരുവരുടെയും ജുഡീഷ്യൽ കസ്റ്റഡി മൂന്ന് ദിവസം കൂടി നീട്ടണമെന്ന് ഡൽഹി പോലീസ് നേരത്തേ കോടതിയിൽ ആവശ്യപ്പെട്ടിരുന്നു. കോടതിയിൽ നേതാക്കൾ നൽകിയ മൊഴികളും പിന്നീട് പുറത്തുവന്ന പ്രതികരണങ്ങളും തമ്മിൽ വൈരുധ്യമുണ്ടെന്നും പോലീസ് ആരോപിച്ചിരുന്നു. ഒക്ടോബർ 13-ന് മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ ജന്തർമന്തറിൽ നടന്ന പ്രതിഷേധവുമായി ബന്ധപ്പെട്ടാണ് ഇരുവരെയും പോലീസ് കസ്റ്റഡിയിലെടുത്തത്. ആ സമയത്ത് പ്രതിഷേധങ്ങൾക്കായി നിശ്ചയിച്ചിരുന്ന ഔദ്യോഗിക സ്ഥലമെന്ന പദവി ജന്തർമന്തറിന് ഉണ്ടായിരുന്നില്ലെന്നും, സ്വകാര്യ സ്ഥലത്തുകൂടി പ്രതിഷേധമേഖലയിലേക്ക് അതിക്രമിച്ചു കയറി സമാധാനവ്യവസ്ഥകൾ ലംഘിച്ചെന്നുമാണ് പോലീസിന്റെ ആരോപണം.
ജാമ്യക്കാരുടെ വിവരങ്ങൾ സമഗ്രമായി പരിശോധിച്ച് അടുത്ത വാദംകേൾക്കലിൽ റിപ്പോർട്ട് സമർപ്പിക്കാൻ അന്വേഷണ ഉദ്യോഗസ്ഥനോട് കോടതി ഉത്തരവിട്ടിട്ടുണ്ട്. കേസ് വ്യാഴാഴ്ച ഉച്ചയ്ക്ക് ശേഷം വീണ്ടും കോടതിയുടെ പരിഗണനയ്ക്ക് വരും.
