ടെഹ്റാൻ: ഹോർമുസ് കടലിടുക്കിലൂടെയുള്ള വാണിജ്യ കപ്പലുകളിൽ നിന്ന് ടോൾ പിരിക്കാനുള്ള ഒമാന്റെ നീക്കത്തെച്ചൊല്ലി അമേരിക്കയുമായുള്ള നയതന്ത്ര തർക്കം രൂക്ഷമാകുന്നു. ഒമാനെതിരെ കടുത്ത ഉപരോധ ഭീഷണിയുമായി യു.എസ് രംഗത്തെത്തിയതോടെ, അയൽരാജ്യത്തിന് പൂർണ്ണ പിന്തുണ പ്രഖ്യാപിച്ച് ഇറാൻ രംഗത്തെത്തി. ഇരുരാജ്യങ്ങളിലെയും വിദേശകാര്യ മന്ത്രിമാർ ഫോണിലൂടെ നടത്തിയ ചർച്ചയിൽ നിലവിലെ സുരക്ഷാ സാഹചര്യം വിലയിരുത്തി. തന്ത്രപ്രധാനമായ ഹോർമുസ് കടലിടുക്കുമായി ബന്ധപ്പെട്ട വിഷയങ്ങൾ ചർച്ച ചെയ്തതായും, മേഖലയിലെ മറ്റ് അയൽരാജ്യങ്ങളെയും ചർച്ചകളിൽ ഉൾപ്പെടുത്താൻ ഉദ്ദേശിക്കുന്നതായും ഇറാൻ വിദേശകാര്യ മന്ത്രി വ്യക്തമാക്കി.
ഹോർമുസ് കടലിടുക്ക് ഒരു അന്താരാഷ്ട്ര ജലപാതയാണെന്നും കപ്പലുകളുടെ സഞ്ചാര സ്വാതന്ത്ര്യത്തിൽ വിട്ടുവീഴ്ചയില്ലെന്നുമാണ് അമേരിക്കയുടെ കർശന നിലപാട്. ടോൾ പിരിക്കാനുള്ള ഒമാന്റെ ഏതൊരു ശ്രമവും അനുവദിക്കില്ലെന്നും, ഇതിനെ പിന്തുണയ്ക്കുന്ന രാജ്യങ്ങൾക്കെതിരെയും നടപടിയുണ്ടാകുമെന്നും യു.എസ് മുന്നറിയിപ്പ് നൽകി. വൈറ്റ് ഹൗസിൽ നടന്ന കാബിനറ്റ് യോഗത്തിൽ പ്രസിഡന്റ് ഡോണൾഡ് ട്രംപ് ഒമാനെതിരെ കടുത്ത ഭാഷയിലാണ് പ്രതികരിച്ചത്. അന്താരാഷ്ട്ര നിയമങ്ങൾ പാലിക്കാൻ ഒമാൻ തയ്യാറായില്ലെങ്കിൽ സൈനിക നടപടി ഉൾപ്പെടെയുള്ള പ്രത്യാഘാതങ്ങൾ നേരിടേണ്ടി വരുമെന്ന ട്രംപിന്റെ മുന്നറിയിപ്പ് വലിയ അന്താരാഷ്ട്ര വിവാദങ്ങൾക്ക് വഴിവെച്ചിരിക്കുകയാണ്.
അമേരിക്കയും ഇറാനും തമ്മിലുള്ള തർക്കങ്ങളിൽ ഇതുവരെ സമാധാനപരമായ മധ്യസ്ഥത വഹിച്ചുവന്ന ഒമാനും യു.എസും തമ്മിലുള്ള ബന്ധത്തിൽ വിള്ളൽ വീണത് മിഡിൽ ഈസ്റ്റിൽ പുതിയ നയതന്ത്ര പ്രതിസന്ധിക്ക് കാരണമായിട്ടുണ്ട്. ഈ തർക്കം മേഖലയിലെ വാണിജ്യ ഗതാഗതത്തെയും സുരക്ഷയെയും എപ്രകാരം ബാധിക്കുമെന്ന കാര്യത്തിൽ ലോകരാജ്യങ്ങൾ ആശങ്കയിലാണ്.
