കണ്ണൂർ: പാർട്ടി അച്ചടക്കം ലംഘിച്ച് മാധ്യമങ്ങൾക്ക് മുന്നിൽ വിവാദ പ്രസ്താവനകൾ നടത്തുന്ന കോൺഗ്രസ് നേതാക്കൾക്ക് കടുത്ത താക്കീതുമായി കെ.പി.സി.സി അധ്യക്ഷനും മന്ത്രിയുമായ സണ്ണി ജോസഫ്. നേതാക്കളുടെ പരസ്യ പ്രതികരണങ്ങൾ പാർട്ടിക്ക് ഭൂഷണമല്ലെന്നും അത് മേലിൽ തുടരാൻ അനുവദിക്കില്ലെന്നും അദ്ദേഹം വ്യക്തമാക്കി. അഭിപ്രായങ്ങളും വിയോജിപ്പുകളും പാർട്ടി വേദികളിലാണ് ഉന്നയിക്കേണ്ടത്. പാർട്ടിക്ക് അവമതിപ്പുണ്ടാക്കുന്ന രീതിയിൽ പ്രതികരിക്കാൻ ആർക്കും അവകാശമില്ലെന്നും സണ്ണി ജോസഫ് വാർത്താസമ്മേളനത്തിൽ പറഞ്ഞു.
പാർട്ടിയും സർക്കാരും കൈക്കൊള്ളുന്ന നയപരമായ തീരുമാനങ്ങൾ അംഗീകരിക്കാൻ എല്ലാ നേതാക്കളും പ്രവർത്തകരും ഒരുപോലെ ബാധ്യസ്ഥരാണ്. വിവാദ പ്രസ്താവനകളിൽ നിന്ന് എല്ലാവരും വിട്ടുനിൽക്കണം. അല്ലാത്തപക്ഷം അച്ചടക്കലംഘനം ചൂണ്ടിക്കാട്ടി കേന്ദ്ര നേതൃത്വത്തിന് പരാതി നൽകേണ്ടി വരുമെന്നും ഇത് പാർട്ടിയിലെ എല്ലാവർക്കും ബാധകമാണെന്നും അദ്ദേഹം ഓർമ്മിപ്പിച്ചു. യു.ഡി.എഫ് കൺവീനർ അടൂർ പ്രകാശ് ഉന്നയിച്ച വിമർശനങ്ങൾക്ക് വ്യക്തിപരമായി മറുപടി നൽകാനില്ലെന്നും, എന്നാൽ നേതൃത്വത്തിന് തലവേദന സൃഷ്ടിക്കുന്ന പ്രസ്താവനകൾ തടയേണ്ടത് അധ്യക്ഷൻ എന്ന നിലയിൽ തന്റെ ഉത്തരവാദിത്തമാണെന്നും അദ്ദേഹം വ്യക്തമാക്കി. നിരന്തരമായ പരസ്യ പ്രസ്താവനകൾ പരിധിവിട്ട സാഹചര്യത്തിലാണ് ഇത്തരം നിർദ്ദേശം നൽകാൻ നിർബന്ധിതനായതെന്നും പ്രതികരണങ്ങൾ നേതാക്കളെ നേരിട്ട് അറിയിക്കുമെന്നും അദ്ദേഹം കൂട്ടിച്ചേർത്തു.
പിണറായി വിജയനെതിരായ സി.എം.ആർ.എൽ കേസ് വൈകിയതുമായി ബന്ധപ്പെട്ട് കോൺഗ്രസ് നേതാക്കൾക്കിടയിൽ ഭിന്നസ്വരങ്ങൾ ഉയരുകയും, അടൂർ പ്രകാശും കെ. സുധാകരനും നടത്തിയ പ്രസ്താവനകൾക്ക് മറുപടിയുമായി മന്ത്രി കെ. മുരളീധരൻ ഉൾപ്പെടെയുള്ളവർ രംഗത്തുവരികയും ചെയ്ത പശ്ചാത്തലത്തിലാണ് കെ.പി.സി.സി അധ്യക്ഷന്റെ ഈ ഉറച്ച നിലപാട്. അതിനിടെ, പിണറായി വിജയൻ പ്രതിയായ കേസിൽ നിയമം നിയമത്തിന്റെ വഴിക്ക് പോകട്ടെയെന്നും, കേസ് രജിസ്റ്റർ ചെയ്ത സ്ഥിതിക്ക് അത് അതിന്റെ രീതിക്ക് മുന്നോട്ടുപോകുമെന്നും സണ്ണി ജോസഫ് പ്രതികരിച്ചു. സി.എം.ആർ.എൽ കേസിൽ സർക്കാറിന്റെ നിലപാട് തികച്ചും പക്വതയോടെയുള്ളതാണെന്നും അദ്ദേഹം കൂട്ടിച്ചേർത്തു.
