ന്യൂഡൽഹി: പ്രധാനമന്ത്രി നരേന്ദ്ര മോദിയുടെ ഔദ്യോഗിക വസതിക്ക് സമീപമുള്ള നൂറ് വർഷം പഴക്കമുള്ള ചരിത്രപ്രസിദ്ധമായ പള്ളി പൊളിച്ചുമാറ്റാൻ നീക്കം നടക്കുന്നതായി പരാതി. റേസ് കോഴ്സ് റോഡിലെ പള്ളി ആറ് ദിവസത്തിനകം ഒഴിഞ്ഞുകൊടുക്കണമെന്ന് ആവശ്യപ്പെട്ട് ഡൽഹി ലാൻഡ് ആൻഡ് ഡെവലപ്‌മെന്റ് വകുപ്പ് ഉദ്യോഗസ്ഥർ തനിക്ക് നോട്ടീസ് നൽകിയതായി പള്ളി ഇമാം മുഹമ്മദ് ഹാറൂൺ ഒരു വീഡിയോ സന്ദേശത്തിലൂടെ വെളിപ്പെടുത്തി. ഒക്ടോബർ ഏഴിന് തന്നെ പള്ളിയിലെ വൈദ്യുതി, ജല കണക്ഷനുകൾ അധികൃതർ വിച്ഛേദിച്ചതായും അദ്ദേഹം വ്യക്തമാക്കി. പള്ളിയും പരിസരവും സംരക്ഷിക്കുന്നതിനായി നിയമപോരാട്ടത്തിനും ജനങ്ങളുടെ പിന്തുണയ്ക്കും ആഹ്വാനം ചെയ്താണ് ഇമാം രംഗത്തെത്തിയിരിക്കുന്നത്.
അടിസ്ഥാന സൗകര്യങ്ങൾ പൂർണ്ണമായി നിഷേധിക്കപ്പെട്ടതോടെ പള്ളിയിലെ ദൈനംദിന കർമ്മങ്ങൾ നടത്തുവാൻ കഴിയാത്ത സാഹചര്യമാണുള്ളത്. കുടിവെള്ളം പോലും എത്തിക്കാൻ കഴിയാത്തവിധം പ്രവേശനം തടസ്സപ്പെടുത്തിയിരിക്കുകയാണ്. പ്രതിസന്ധി ഘട്ടത്തിൽ ഡൽഹി വഖഫ് ബോർഡിനെ പലതവണ സമീപിച്ചിട്ടും മുനിസിപ്പൽ കൗൺസിലിന് കത്തെഴുതുകയെന്ന പേരിൽ നാമമാത്രമായ നടപടികളിൽ അവർ ഒതുങ്ങിനിൽക്കുകയാണുണ്ടായതെന്ന് ഇമാം കുറ്റപ്പെടുത്തി. വഖഫ് ബോർഡിന്റെ പിന്തുണ ലഭിക്കാത്തതിനെത്തുടർന്ന് താൻ സ്വന്തം നിലയിൽ ഹൈക്കോടതിയെ സമീപിച്ചെങ്കിലും, വഖഫ് ബോർഡിന്റെ ഔദ്യോഗിക അനുമതിയില്ലാത്തതിനാൽ വിധി എതിർക്കപ്പെടുകയായിരുന്നു. ഈ പള്ളി യാതൊരുവിധ അനധികൃത നിർമ്മിതിയോ കയ്യേറ്റമോ അല്ലെന്നും, എൻ.ഡി.എം.സിയുടെ ഹെറിറ്റേജ് ലിസ്റ്റിൽ ഉൾപ്പെടുത്തിയിട്ടുള്ളതും ഇന്ത്യയ്ക്ക് സ്വാതന്ത്ര്യം ലഭിക്കുന്നതിനും മുൻപ് തന്നെ നിലവിലുള്ളതുമാണെന്ന് അദ്ദേഹം ചൂണ്ടിക്കാട്ടി.
സംഭവത്തിൽ ആഴത്തിലുള്ള ആശങ്ക രേഖപ്പെടുത്തി ഓഖ്ല എം.എൽ.എ അമാനത്തുല്ല ഖാൻ ഇമാമുമായി ഫോണിൽ സംസാരിക്കുകയും നേരിട്ട് പള്ളി സന്ദർശിക്കുമെന്ന് ഉറപ്പ് നൽകുകയും ചെയ്തിട്ടുണ്ട്. പ്രധാനമന്ത്രിയുടെ വസതിക്ക് സമീപമുള്ള ഈ പള്ളിക്ക് പുറമെ, റേസ് കോഴ്സ് റോഡിന് സമീപം വർഷങ്ങളായി താമസിച്ചുവന്നിരുന്ന ചേരി നിവാസികളെ ഒഴിപ്പിക്കാനും ഡൽഹി ഹൈക്കോടതി അനുമതി നൽകിയിട്ടുണ്ട്. ഇവിടെനിന്ന് ഒഴിപ്പിക്കപ്പെടുന്ന കുടുംബങ്ങളെ ഏകദേശം 45 കിലോമീറ്ററോളം അകലെയുള്ള സാവ്ദ ഗേവ്ര പുനരധിവാസ കേന്ദ്രത്തിലേക്ക് മാറ്റാനാണ് നിലവിലെ ഉത്തരവ്.
