വാഷിംഗ്ടണ്‍: ഇസ്രായേൽ പാർലമെന്റ് തിരഞ്ഞെടുപ്പ് പടിവാതിൽക്കൽ എത്തിനിൽക്കെ, യു.എസ് പ്രതിരോധ സെക്രട്ടറി പീറ്റ് ഹെഗ്സെത്ത് രാജ്യത്ത് അപ്രഖ്യാപിത സന്ദർശനം നടത്തി. സന്ദർശന വേളയിൽ അദ്ദേഹം ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവുമായി നിർണ്ണായക കൂടിക്കാഴ്ച നടത്തി. മിഡിൽ ഈസ്റ്റ്, വടക്കുകിഴക്കൻ ആഫ്രിക്ക, ഏഷ്യയുടെ ചില ഭാഗങ്ങൾ എന്നിവ ഉൾപ്പെടുന്ന യു.എസ് സെൻട്രൽ കമാൻഡിന്റെ അധികാരപരിധിയിലുള്ള യു.എസ് സേനാംഗങ്ങളെ സന്ദർശിക്കാനാണ് താൻ എത്തിയതെന്ന് ഹെഗ്സെത്ത് സോഷ്യൽ മീഡിയയിലൂടെ വ്യക്തമാക്കി. എങ്കിലും, സന്ദർശനത്തെക്കുറിച്ചോ കൂടിക്കാഴ്ചയെക്കുറിച്ചോ ഇരുരാജ്യങ്ങളുടെയും ഔദ്യോഗിക കേന്ദ്രങ്ങൾ ഇതുവരെ പ്രസ്താവനകളൊന്നും പുറത്തിറക്കിയിട്ടില്ല. വാഷിംഗ്ടണിലെ ഇസ്രായേൽ എംബസിയും പെന്റഗണും ഈ വിഷയത്തിൽ പ്രതികരിക്കാൻ വിസമ്മതിച്ചതായി റോയിട്ടേഴ്സ് റിപ്പോർട്ട് ചെയ്യുന്നു.
അടുത്ത ആഴ്ച നടക്കാനിരിക്കുന്ന ഇസ്രായേൽ തിരഞ്ഞെടുപ്പിൽ യു.എസ് പ്രസിഡന്റ് ഡൊണാൾഡ് ട്രംപ് ബെഞ്ചമിൻ നെതന്യാഹുവിന് പരസ്യമായി പിന്തുണ പ്രഖ്യാപിച്ചതിന് തൊട്ടുപിന്നാലെയാണ് പ്രതിരോധ സെക്രട്ടറിയുടെ ഈ സന്ദർശനം എന്നത് ഏറെ രാഷ്ട്രീയ പ്രാധാന്യമുള്ളതാണ്. 2023 ഒക്ടോബർ 7-ലെ ഹമാസ് ആക്രമണത്തിനും ഗാസയിലെ തുടർന്നുള്ള സംഭവവികാസങ്ങൾക്കും ശേഷം ഇസ്രായേലിൽ നടക്കുന്ന ആദ്യ തിരഞ്ഞെടുപ്പാണിത്. ലെബനൻ, ഇറാൻ തുടങ്ങിയ രാജ്യങ്ങളിലേക്കും വ്യാപിച്ച സംഘർഷങ്ങൾ പശ്ചിമേഷ്യയെ വലിയ പ്രതിസന്ധിയിലാക്കിയിരിക്കുകയാണ്. നെതന്യാഹുവിന്റെ മത-ദേശീയവാദി സഖ്യത്തിന് ഇത്തവണ ഭൂരിപക്ഷം നഷ്ടപ്പെടാൻ സാധ്യതയുണ്ടെന്നാണ് അഭിപ്രായ സർവേകൾ വ്യക്തമാക്കുന്നത്. എങ്കിലും, പ്രതിപക്ഷത്തിനും ഒറ്റയ്ക്ക് സർക്കാർ രൂപീകരിക്കുക എളുപ്പമായിരിക്കില്ലെന്നും സർവേകൾ ചൂണ്ടിക്കാണിക്കുന്നു.
മാസങ്ങളായി ഇരുനേതാക്കൾക്കുമിടയിൽ നിലനിന്നിരുന്ന അഭിപ്രായവ്യത്യാസങ്ങൾക്കിടയിലാണ് ട്രംപിന്റെ പുതിയ പിന്തുണ നെതന്യാഹുവിന് രാഷ്ട്രീയമായി തുണയാകുന്നത്. ഇതിനിടെ, ഇറാനെതിരെ ഉടൻ തന്നെ ഇസ്രായേൽ ആക്രമണം ഉണ്ടായേക്കുമെന്ന അഭ്യൂഹങ്ങളും ശക്തമായിട്ടുണ്ട്. നെതന്യാഹുവിന്റെ രാഷ്ട്രീയ വിജയത്തിന് യുദ്ധം തുടരേണ്ടത് അനിവാര്യമാണെന്നും, ട്രംപിന്റെ തുടർച്ചയായ പ്രസ്താവനകൾ ഇതിന്റെ സൂചനയാണെന്നുമാണ് സമൂഹമാധ്യമങ്ങളിലെ വിലയിരുത്തൽ. എന്നാൽ, യു.എസിനെ അനാവശ്യമായ യുദ്ധത്തിലേക്ക് വലിച്ചിഴച്ചത് നെതന്യാഹു ആണെന്ന് തുറന്നടിച്ച യു.എസ് വൈസ് പ്രസിഡന്റ് ജെ.ഡി. വാൻസ്, നെതന്യാഹുവെ പിന്തുണയ്ക്കാൻ തയ്യാറായിട്ടില്ല. താൻ അമേരിക്കൻ സ്ഥാനാർത്ഥികളെ മാത്രമാണ് പിന്തുണയ്ക്കുന്നതെന്നും ഇസ്രായേൽ തിരഞ്ഞെടുപ്പിൽ ഇടപെടുന്നില്ലെന്നും അദ്ദേഹം വ്യക്തമാക്കി. ഹംഗേറിയൻ തിരഞ്ഞെടുപ്പിൽ വിക്ടർ ഓർബനെ പിന്തുണച്ചിട്ടുള്ള വാൻസ്, താൻ നിലവിൽ അമേരിക്കയിലെ ഇടക്കാല തിരഞ്ഞെടുപ്പുകളിലാണ് ശ്രദ്ധ കേന്ദ്രീകരിക്കുന്നതെന്നും കൂട്ടിച്ചേർത്തു.
