വാഷിംഗ്ടൺ: ഇറാനുമായുള്ള യുദ്ധം എട്ടാം ദിവസത്തിലേക്ക് കടക്കവെ, ഇറാൻ ഭരണകൂടത്തിന് കടുത്ത മുന്നറിയിപ്പുമായി അമേരിക്കൻ പ്രസിഡന്റ് ഡൊണാൾഡ് ട്രംപ് രംഗത്തെത്തി. ഇറാൻ ഉടൻ കീഴടങ്ങാൻ തയ്യാറായില്ലെങ്കിൽ നിലവിലെ ഭരണകൂടത്തെ പൂർണ്ണമായും താഴെയിറക്കുമെന്നും ‘ഇറാൻ എന്ന രാഷ്ട്രത്തെ അതിന്റെ പഴയ പ്രതാപത്തിലേക്ക് തിരികെ കൊണ്ടുവരാൻ’ താൻ പ്രതിജ്ഞാബദ്ധനാണെന്നും ട്രംപ് പ്രഖ്യാപിച്ചു. സിഎൻഎൻ റിപ്പോർട്ട് പ്രകാരം, വൈറ്റ് ഹൗസിൽ നടത്തിയ പ്രസംഗത്തിൽ ഇറാന്റെ ആണവ കേന്ദ്രങ്ങളെയും തന്ത്രപ്രധാനമായ സൈനിക താവളങ്ങളെയും ലക്ഷ്യം വെച്ചുള്ള ആക്രമണങ്ങൾ തുടരുമെന്ന് അദ്ദേഹം വ്യക്തമാക്കി. അമേരിക്കൻ സൈനികർക്കോ താവളങ്ങൾക്കോ നേരെയുള്ള ചെറിയൊരു പ്രകോപനം പോലും സഹിക്കില്ലെന്നും അദ്ദേഹം കൂട്ടിച്ചേർത്തു.
അതേസമയം, അമേരിക്കയുടെ ആക്രമണങ്ങൾക്ക് മറുപടിയായി ഇസ്രായേലിലെ ജനവാസ മേഖലകളിലും അമേരിക്കയുടെ സഖ്യരാജ്യങ്ങളായ ഖത്തർ, യുഎഇ എന്നിവിടങ്ങളിലും ഇറാൻ വലിയ രീതിയിലുള്ള സൈനിക നീക്കങ്ങൾ തുടരുകയാണ്. ഇറാന്റെ തിരിച്ചടികളിൽ ഇതുവരെ നിരവധി ആളുകൾ കൊല്ലപ്പെടുകയും മിഡിൽ ഈസ്റ്റിലെ ഊർജ്ജ വിതരണ ശൃംഖല താറുമാറാകുകയും ചെയ്തിട്ടുണ്ട്. ഇതിനിടയിൽ, അമേരിക്കൻ ജനതയോട് ഇറാൻ ഭരണകൂടത്തിന് എതിരായി രംഗത്തിറങ്ങാൻ ട്രംപ് ആഹ്വാനം ചെയ്തു. ഇറാൻ ഭരണകൂടം തകരുന്നതോടെ ലോകം കൂടുതൽ സുരക്ഷിതമാകുമെന്നും അദ്ദേഹം അവകാശപ്പെട്ടു. അമേരിക്കൻ കോൺഗ്രസിൽ ട്രംപിന് അനുകൂലമായി യുദ്ധ പ്രമേയം പാസാക്കിയതും അദ്ദേഹത്തിന്റെ കൈകൾക്ക് കരുത്തുപകർന്നിട്ടുണ്ട്.
യൂറോപ്യൻ രാജ്യങ്ങളും ഐക്യരാഷ്ട്രസഭയും സമാധാന ശ്രമങ്ങൾക്കായി മുന്നോട്ടു വരുന്നുണ്ടെങ്കിലും, നിരുപാധികം കീഴടങ്ങുക എന്ന ട്രംപിന്റെ വാശി ചർച്ചകൾക്കുള്ള സാധ്യത മങ്ങിച്ചു. യുദ്ധം രൂക്ഷമായതോടെ ഗൾഫ് രാജ്യങ്ങളിലേക്കുള്ള ഭക്ഷ്യ ഇറക്കുമതിയും വ്യോമഗതാഗതവും വലിയ പ്രതിസന്ധി നേരിടുകയാണ്. ഹോർമുസ് കടലിടുക്ക് വഴിയുള്ള കപ്പൽ ഗതാഗതം തടസ്സപ്പെട്ടത് ആഗോള വിപണിയിൽ എണ്ണവില കുതിച്ചുയരാൻ കാരണമായിട്ടുണ്ട്. വരും ദിവസങ്ങളിൽ ഇറാന്റെ തിരിച്ചടി ഭയന്ന് മിഡിൽ ഈസ്റ്റിലെ അമേരിക്കൻ എംബസികളിൽ സുരക്ഷാ ജാഗ്രത വർധിപ്പിച്ചിരിക്കുകയാണ്.
