ന്യൂയോർക്ക്: 2026 ഫിഫ ലോകകപ്പ് ഫൈനലിൽ സ്പെയിനോടേറ്റ പരാജയത്തിന് പിന്നാലെ എതിർതാരങ്ങളെ കൈയേറ്റം ചെയ്ത സംഭവത്തിൽ അർജന്റീന താരങ്ങൾക്കെതിരെ ലോക ഫുട്ബോൾ ഭരണസമിതിയായ ഫിഫ (FIFA) അന്വേഷണം പ്രഖ്യാപിച്ചു. ന്യൂജേഴ്സിയിലെ മെറ്റ്ലൈഫ് സ്റ്റേഡിയത്തിൽ നടന്ന ആവേശകരമായ ഫൈനലിൽ എതിരില്ലാത്ത ഒരു ഗോളിന് സ്പെയിൻ അർജന്റീനയെ പരാജയപ്പെടുത്തി കിരീടം ചൂടിയിരുന്നു. ഫെറാൻ ടോറസായിരുന്നു സ്പെയിനിന്റെ വിജയഗോൾ നേടിയത്. എന്നാൽ മത്സരത്തിന്റെ ഫുൾ ടൈം വിസിലിന് പിന്നാലെ ഗ്രൗണ്ടിൽ കടുത്ത സംഘർഷാവസ്ഥ ഉടലെടുക്കുകയായിരുന്നു. സ്പാനിഷ് നായകൻ റോഡ്രിയെ അർജന്റീന താരം നഹ്വൽ മൊളീന തള്ളിമാറ്റിയതോടെയാണ് പ്രശ്നങ്ങൾ തുടക്കം കുറിച്ചത്. തുടർന്ന് അർജന്റീനൻ മിഡ്ഫീൽഡർ ലിയാൻഡ്രോ പരേഡസ് സ്പാനിഷ് താരം എറിക് ഗാർസ്യയുടെ കഴുത്തിന് കുത്തിപ്പിടിക്കുകയും ഗാവിയെ തള്ളിയിടുകയും ചെയ്തു. അർജന്റീന സഹപരിശീലകൻ ഫാബിയൻ അയല സ്പാനിഷ് താരം ഡാനി ഓൽമോയുടെ കഴുത്തിന് പിടിക്കുന്ന ദൃശ്യങ്ങളും പുറത്തുവന്നിരുന്നു. ഒടുവിൽ അർജന്റീനൻ പരിശീലകൻ ലയണൽ സ്കലോനി ഇടപെട്ടാണ് രംഗം ശാന്തമാക്കിയത്.
ഫൈനൽ മത്സരത്തിലുണ്ടായ സംഘർഷങ്ങളെ തുടർന്ന് പരേഡസിന് റഫറി റെഡ് കാർഡും സ്കലോനി അടക്കമുള്ളവർക്ക് മഞ്ഞക്കാർഡും നൽകിയിരുന്നു. മത്സരത്തിന് തൊട്ടുമുൻപ് എൻസോ ഫെർണാണ്ടസും റെഡ് കാർഡ് വാങ്ങി പുറത്തുപോയിരുന്നു. റഫറിയുടെ റിപ്പോർട്ട് പരിശോധിച്ച ശേഷമാണ് ഫിഫ ഡിസിപ്ലിനറി കോഡിലെ ആർട്ടിക്കിൾ 36 പ്രകാരം അന്വേഷണത്തിന് പ്രത്യേക പ്രോസിക്യൂട്ടറെ നിയമിച്ചത്. മൊളീന, പരേഡസ്, അയല എന്നിവർ കുറ്റക്കാരാണെന്ന് കണ്ടെത്തിയാൽ മത്സരവിലക്ക് അടക്കമുള്ള കടുത്ത ശിക്ഷ നടപടികൾ അർജന്റീന നേരിടേണ്ടി വരും. ഇതിനുപുറമെ, ഇംഗ്ലണ്ടിനെതിരായ സെമി ഫൈനൽ ജയത്തിന് ശേഷം ‘മാൽവിനാസ് അർജന്റീനയുടേതാണ്’ എന്ന രാഷ്ട്രീയ പ്രാധാന്യമുള്ള ബാനർ ഉയർത്തി ആഘോഷിച്ച സംഭവത്തിലും അർജന്റീനയ്ക്കെതിരെ ഫിഫയുടെ വെവ്വേറെ അന്വേഷണം നടക്കുന്നുണ്ട്.
