ടെഹ്റാൻ: ഇറാൻ്റെ പരമാധികാരത്തിന്മേൽ അമേരിക്കയും ഇസ്രായേലും നടത്തുന്ന സംയുക്ത സൈനിക നീക്കങ്ങൾ രാജ്യത്തെ വിഭജിക്കാനും പ്രകൃതിവിഭവങ്ങൾ കൊള്ളയടിക്കാനുമുള്ള ഗൂഢാലോചനയുടെ ഭാഗമാണെന്ന് ഇറാൻ ഭരണകൂടം ആരോപിച്ചു. 2026 ഫെബ്രുവരി അവസാന വാരം ആരംഭിച്ച ഈ യുദ്ധം ഇറാൻ്റെ എണ്ണ ഉൽപ്പാദന മേഖലകളെ ലക്ഷ്യമിട്ടുള്ളതാണെന്നും ഇതിലൂടെ ഇറാൻ്റെ സമ്പദ്വ്യവസ്ഥയെ തകർക്കുകയാണ് യുഎസ് ലക്ഷ്യമെന്നും ഇറാൻ വിദേശകാര്യ മന്ത്രാലയം വ്യക്തമാക്കി. ഇറാൻ്റെ എണ്ണ കയറ്റുമതിയുടെ 90 ശതമാനവും കൈകാര്യം ചെയ്യുന്ന ഖാർഗ് ദ്വീപ് പിടിച്ചെടുക്കാൻ അമേരിക്കൻ സൈന്യം നീക്കം നടത്തുന്നുവെന്ന റിപ്പോർട്ടുകൾ പുറത്തുവന്നതിന് പിന്നാലെയാണ് തെഹ്റാന്റെ ഈ കടുത്ത പ്രതികരണം.
കഴിഞ്ഞ കുറച്ചു ദിവസങ്ങളായി ഇറാനിലെ പ്രധാന നഗരങ്ങളിലും എണ്ണ ശുദ്ധീകരണ ശാലകളിലും യുഎസ്-ഇസ്രായേൽ വ്യോമസേനകൾ ശക്തമായ ആക്രമണമാണ് നടത്തുന്നത്. രാജ്യത്തെ വിഭജിച്ച് ആഭ്യന്തര കലാപമുണ്ടാക്കാനാണ് വാഷിംഗ്ടൺ ശ്രമിക്കുന്നതെന്നും, എന്നാൽ തങ്ങളുടെ അതിർത്തികൾ സംരക്ഷിക്കാൻ ഇറാൻ ഏതറ്റം വരെയും പോകുമെന്നും ഇറാൻ ഭരണകൂടം മുന്നറിയിപ്പ് നൽകി. ഇറാൻ്റെ പരമോന്നത നേതാവ് അലി ഖൊമേനിയുടെ വധത്തിന് ശേഷം മേഖലയിൽ സംഘർഷം അതിരൂക്ഷമായി തുടരുകയാണ്. ഇതിനോടുള്ള തിരിച്ചടിയെന്നോണം ഹോർമുസ് കടലിടുക്ക് ഇറാൻ ഭാഗികമായി അടച്ചതോടെ ആഗോള എണ്ണ വിപണിയിൽ വൻ വിലക്കയറ്റമാണ് ഉണ്ടായിരിക്കുന്നത്.
യുദ്ധം ഒമ്പതാം ദിവസത്തിലേക്ക് കടക്കുമ്പോൾ ലോക വിപണിയിൽ എണ്ണവില ബാരലിന് 120 ഡോളറിന് അടുത്തെത്തി നിൽക്കുകയാണ്. ഇറാനിലെ എണ്ണ സംഭരണ ശാലകൾക്ക് നേരെയുള്ള ആക്രമണം ആഗോള ഊർജ്ജ വിതരണത്തെ ഗുരുതരമായി ബാധിച്ചിട്ടുണ്ട്. അമേരിക്കയുടെ ലക്ഷ്യം ഇറാൻ്റെ ആണവ പദ്ധതിയല്ല, മറിച്ച് അവിടുത്തെ എണ്ണ സമ്പത്തും ഭൗമരാഷ്ട്രീയ നിയന്ത്രണവുമാണെന്ന് ഇറാനിയൻ നയതന്ത്രജ്ഞർ ചൂണ്ടിക്കാട്ടുന്നു. അതേസമയം, ഇറാനിലെ വിഘടനവാദി ഗ്രൂപ്പുകളെ സഹായിച്ചുകൊണ്ട് രാജ്യത്തെ അസ്ഥിരപ്പെടുത്താനാണ് പാശ്ചാത്യ ശക്തികൾ ശ്രമിക്കുന്നതെന്ന് ഇറാൻ ഭരണകൂടം ആവർത്തിച്ചു.
