ടെഹ്റാൻ: ഹോർമുസ് കടലിടുക്ക് തുറക്കുന്നതുമായി ബന്ധപ്പെട്ട് അമേരിക്കൻ പ്രസിഡന്റ് ഡൊണാൾഡ് ട്രംപ് നൽകിയ അന്ത്യശാസനത്തിന് കടുത്ത ഭാഷയിൽ മറുപടി നൽകി ഇറാൻ. 48 മണിക്കൂറിനുള്ളിൽ നിർണ്ണായകമായ ഈ ജലപാത പൂർണ്ണമായും തുറന്നില്ലെങ്കിൽ ഇറാന്റെ വൈദ്യുതി നിലയങ്ങൾ ആക്രമിച്ചു തകർക്കുമെന്നായിരുന്നു ട്രംപിന്റെ സോഷ്യൽ മീഡിയ പോസ്റ്റിലൂടെയുള്ള ഭീഷണി. ഇതിന് മറുപടിയായി, ഇറാന്റെ ഇന്ധന-ഊർജ്ജ അടിസ്ഥാന സൗകര്യങ്ങൾ ലക്ഷ്യമിട്ടാൽ സകല പരിധികളും ലംഘിച്ചുള്ള നീക്കമുണ്ടാകുമെന്ന് ഇറാൻ മുന്നറിയിപ്പ് നൽകി.
അമേരിക്കയുടെയും മേഖലയിലെ മറ്റ് ഭരണകൂടങ്ങളുടെയും എല്ലാ ഊർജ്ജ കേന്ദ്രങ്ങളും വിവരസാങ്കേതികവിദ്യ സംവിധാനങ്ങളും ലക്ഷ്യമിട്ടായിരിക്കും ഇറാന്റെ നീക്കമെന്ന് ഖതം അൽ-അൻബിയ സെൻട്രൽ ആസ്ഥാന വക്താവ് ഇബ്രാഹിം സോൾഫാഗാരിയ വ്യക്തമാക്കി. ഗൾഫ് മേഖലയിലെ 80 ശതമാനം കുടിവെള്ളവും നൽകുന്ന ഉപ്പുവെള്ള ശുദ്ധീകരണ പ്ലാന്റുകൾ ഉൾപ്പെടെ ആക്രമിക്കപ്പെടുമെന്നും അദ്ദേഹം സന്ദേശത്തിൽ അറിയിച്ചു.
അതിനിടെ, മേഖലയിലെ സംഘർഷം പുതിയ തലത്തിലേക്ക് കടന്നുകൊണ്ട് ഇറാൻ ഇസ്രായേലിന് നേരെ ശക്തമായ ആക്രമണം നടത്തി. തെക്കൻ ഇസ്രായേലിലെ ഡിമോണ, അറാദ് നഗരങ്ങളിലുണ്ടായ ആക്രമണത്തിൽ നൂറിലധികം പേർക്ക് പരിക്കേറ്റതായാണ് റിപ്പോർട്ടുകൾ. ഈ സാഹചര്യത്തെ ‘യുദ്ധത്തിന്റെ ദുഷ്കരമായ സായാഹ്നം’ എന്നാണ് ഇസ്രായേൽ പ്രധാനമന്ത്രി ബെന്യാമിൻ നെതന്യാഹു വിശേഷിപ്പിച്ചത്.
അമേരിക്കയുടെയും ഇസ്രായേലിന്റെയും ആക്രമണങ്ങൾ ആരംഭിച്ചതിന് ശേഷം ഇതുവരെ ഇറാനിൽ 2,000-ത്തിലധികം പേർ കൊല്ലപ്പെട്ടതായും വിവിധ റിപ്പോർട്ടുകൾ സൂചിപ്പിക്കുന്നു. അന്താരാഷ്ട്ര തലത്തിൽ വലിയ ആശങ്കയുണ്ടാക്കുന്ന രീതിയിലാണ് പശ്ചിമേഷ്യയിലെ സൈനിക നീക്കങ്ങൾ പുരോഗമിക്കുന്നത്.
