ടെഹ്റാൻ: ഇറാൻ ഭരണനേതൃത്വത്തിനുള്ളിൽ കടുത്ത അഭിപ്രായവ്യത്യാസങ്ങളും അധികാരത്തർക്കങ്ങളും നിലനിൽക്കുന്നുണ്ടെന്ന അമേരിക്കൻ പ്രസിഡന്റ് ഡൊണാൾഡ് ട്രംപിന്റെ വാദങ്ങളെ ഇറാൻ വിദേശകാര്യ മന്ത്രാലയം ഔദ്യോഗികമായി തള്ളി. ഇറാൻ എന്ന രാജ്യം “ഒരൊറ്റ ആത്മാവായാണ്” നിലകൊള്ളുന്നതെന്നും ഭരണകൂടത്തിനുള്ളിൽ യാതൊരുവിധ ഭിന്നതകളുമില്ലെന്നും വിദേശകാര്യ വക്താവ് വ്യക്തമാക്കി. ഇറാനിലെ ചില നേതാക്കൾ സമാധാന ചർച്ചകൾക്ക് അനുകൂലമാണെന്നും എന്നാൽ മറ്റുള്ളവർ അത് തടയുകയാണെന്നുമുള്ള ട്രംപിന്റെ പ്രസ്താവനകൾ രാജ്യത്തെ തകർക്കാൻ ലക്ഷ്യമിട്ടുള്ള മനഃശാസ്ത്രപരമായ യുദ്ധതന്ത്രങ്ങൾ മാത്രമാണെന്ന് അൽ ജസീറ റിപ്പോർട്ട് ചെയ്യുന്നു.
അമേരിക്കൻ ഉപരോധവും സൈനിക സമ്മർദ്ദവും ശക്തമായി തുടരുന്ന സാഹചര്യത്തിൽ ഇറാന്റെ ആത്മവിശ്വാസം തകർക്കാനാണ് ഇത്തരം അടിസ്ഥാനരഹിതമായ പ്രചാരണങ്ങൾ നടത്തുന്നതെന്ന് ടെഹ്റാൻ ആരോപിച്ചു. ശത്രുക്കളുടെ ഏത് തരത്തിലുള്ള പ്രകോപനങ്ങളെയും നേരിടാൻ തങ്ങൾ ഒറ്റക്കെട്ടാണെന്നും സമാധാന ചർച്ചകളുടെ കാര്യത്തിൽ ഇറാന് വ്യക്തമായ ഒരൊറ്റ നിലപാട് മാത്രമേയുള്ളൂ എന്നും വക്താവ് കൂട്ടിച്ചേർത്തു.
അമേരിക്ക ഇറാൻ തുറമുഖങ്ങൾക്ക് മേൽ ഏർപ്പെടുത്തിയിരിക്കുന്ന നാവിക ഉപരോധം തുടരുന്നത് വെടിനിർത്തൽ കരാറിന്റെ ലംഘനമാണെന്ന് ആവർത്തിച്ച ഇറാൻ, തങ്ങളുടെ ആഭ്യന്തര കാര്യങ്ങളിൽ ഇടപെടാൻ വാഷിംഗ്ടണിന് അധികാരമില്ലെന്നും വ്യക്തമാക്കി. ഇറാൻ്റെ രാഷ്ട്രീയ നേതൃത്വത്തിൽ വിള്ളലുകൾ വീഴ്ത്തി ഭരണമാറ്റത്തിന് ശ്രമിക്കാനുള്ള ട്രംപിൻ്റെ തന്ത്രങ്ങൾ വിജയിക്കില്ലെന്നാണ് പുതിയ റിപ്പോർട്ടുകൾ സൂചിപ്പിക്കുന്നത്. വരും ദിവസങ്ങളിൽ ഇസ്ലാമാബാദിൽ നടക്കാനിരിക്കുന്ന ചർച്ചകളിൽ പങ്കെടുക്കുന്ന കാര്യത്തിലും ഇറാൻ ഭരണകൂടം ഉടൻ അന്തിമ തീരുമാനമെടുത്തേക്കും.
