വിയന്ന/തിരുവനന്തപുരം: ആഗോള മയക്കുമരുന്ന് വിപണി വലിയ രീതിയിലുള്ള പരിവർത്തനങ്ങൾക്ക് വിധേയമായിക്കൊണ്ടിരിക്കുകയാണെന്ന് ഐക്യരാഷ്ട്രസഭയുടെ മയക്കുമരുന്ന്-കുറ്റകൃത്യ പ്രതിരോധ ഓഫീസ് (യു എൻ ഓ ഡി സി ) പുറത്തുവിട്ട 2026-ലെ ലോക മയക്കുമരുന്ന് റിപ്പോർട്ട്. ആഗോളതലത്തിലുണ്ടാകുന്ന രാഷ്ട്രീയ അസ്ഥിരതകളും അതിവേഗം വളരുന്ന സാങ്കേതികവിദ്യകളും ചൂഷണം ചെയ്ത് അന്താരാഷ്ട്ര ലഹരിക്കടത്തുകാർ വിപണിയിൽ പുതിയ ലഹരിവസ്തുക്കൾ എത്തിക്കുകയാണെന്നും റിപ്പോർട്ട് മുന്നറിയിപ്പ് നൽകുന്നു.
ലോകമെമ്പാടും മയക്കുമരുന്ന് മാഫിയകൾ ഇത്തരത്തിൽ കണ്ണികൾ വ്യാപിപ്പിക്കുമ്പോൾ, അതിനെ ചെറുക്കാൻ സംസ്ഥാന ചരിത്രത്തിലെ തന്നെ ഏറ്റവും വലിയ ആന്റി-നാർക്കോട്ടിക് കാമ്പെയ്നായ ‘ഓപ്പറേഷൻ തൂഫാൻ: ദി നാർക്കോ ഹണ്ട്’ എന്ന കർശന പ്രതിരോധ നടപടിയുമായി കേരള സർക്കാരും സജീവമായി രംഗത്തുണ്ട്.
ആഗോള വിപണിയിൽ മുൻപെങ്ങുമില്ലാത്ത വിധം പുതിയ ഇനം മയക്കുമരുന്നുകളുടെ വർദ്ധനവാണ് ദൃശ്യമാകുന്നതെന്നും ഇവയിൽ ഭൂരിഭാഗവും മുൻപുണ്ടായിരുന്നവയേക്കാൾ അതീവ മാരകവും അപകടകരവുമാണെന്നും യുഎൻഒഡിസി എക്സിക്യൂട്ടീവ് ഡയറക്ടർ മോണിക്ക ജുമ ആശങ്ക പ്രകടിപ്പിച്ചു. ഇത് ദശലക്ഷക്കണക്കിന് ആളുകളുടെ അകാല മരണത്തിനും കമ്മ്യൂണിറ്റികളുടെ തകർച്ചയ്ക്കും ക്രമസമാധാന പ്രശ്നങ്ങൾക്കും കാരണമാകുന്നു. ആഗോളതലത്തിലെ ഭീതിദമായ സാഹചര്യം തന്നെയാണ് കേരളത്തിലും പ്രതിഫലിക്കുന്നത്. സിന്തറ്റിക് മയക്കുമരുന്നുകളുടെ ഉപയോഗവും കടത്തും തടയുക, വിതരണ ശൃംഖലകൾ തകർക്കുക, വിദ്യാലയ കേന്ദ്രീകൃതമായ ലഹരി വില്പന തടയുക എന്നീ ലക്ഷ്യങ്ങളോടെയാണ് കേരളത്തിൽ പോലീസ്-എക്സൈസ് വകുപ്പുകളുടെ സംയുക്ത ആഭിമുഖ്യത്തിൽ ‘ഓപ്പറേഷൻ തൂഫാൻ’ ആരംഭിച്ചിരിക്കുന്നത്.
ഐക്യരാഷ്ട്രസഭയുടെ റിപ്പോർട്ട് പ്രകാരം കഞ്ചാവാണ് ലോകത്തിൽ ഏറ്റവും കൂടുതൽ ആളുകൾ ഉപയോഗിക്കുന്ന ലഹരിവസ്തു. ഇതിന് പിന്നാലെ ഒപ്പിയോയിഡുകൾ, ആംഫെറ്റാമൈനുകൾ, കൊക്കെയ്ൻ എന്നിവയും വ്യാപകമായി ഉപയോഗിക്കപ്പെടുന്നു. വിപണിയിലെ കടുത്ത നിയന്ത്രണങ്ങൾ മറികടക്കാൻ കൃത്രിമമായി നിർമ്മിക്കുന്ന സിന്തറ്റിക് ഒപ്പിയോയിഡുകളുടെ എണ്ണത്തിൽ വലിയ വർദ്ധനവാണ് ലോകത്തുണ്ടായിരിക്കുന്നത്. പ്രത്യേകിച്ച് എംഡിഎംഎ, മെത്താംഫെറ്റാമൈൻ തുടങ്ങിയ കൃത്രിമ രാസലഹരികളുടെ ആഗോള വ്യാപനം ചെറുപ്പക്കാരെയാണ് കൂടുതലായി ലക്ഷ്യം വയ്ക്കുന്നത്. ആഗോള പ്രവണതയെ സാധൂകരിക്കുന്നതാണ് കേരളത്തിൽ അടുത്തിടെ രജിസ്റ്റർ ചെയ്യപ്പെട്ട കേസുകളുടെ എണ്ണവും. ഇതുകൊണ്ടുതന്നെയാണ് ‘ഓപ്പറേഷൻ തൂഫാൻ’ വഴി കൃത്രിമ ലഹരിമരുന്നുകൾക്കെതിരെ കേരള പോലീസ് കർശനമായ നിരീക്ഷണവും റെയ്ഡുകളും ശക്തമാക്കിയിരിക്കുന്നത്.
അഫ്ഗാനിസ്ഥാനിലെ നിരോധനം മൂലം ഹെറോയിൻ ലഭ്യതയിൽ അന്താരാഷ്ട്രതലത്തിൽ കുറവുണ്ടായെങ്കിലും മ്യാൻമർ പോലുള്ള രാജ്യങ്ങളിൽ ഉത്പാദനം വർദ്ധിച്ചിട്ടുണ്ട്. കുറവ് നികത്താൻ ആഗോള മാഫിയകൾ സിന്തറ്റിക് മയക്കുമരുന്നുകളിലേക്ക് സ്ഥിരമായി ചുവടുമാറുകയാണ്. ആഫ്രിക്ക, യൂറോപ്പ് എന്നിവിടങ്ങളിലേക്ക് ഇതിന്റെ കടത്ത് ശക്തമായിട്ടുണ്ട്. കൊക്കെയ്ൻ ഉത്പാദനത്തിലും കഴിഞ്ഞ പത്ത് വർഷത്തിനിടയിൽ നാലിരട്ടി വർദ്ധനവാണ് രേഖപ്പെടുത്തിയിരിക്കുന്നത്.
പരമ്പരാഗത വിപണികൾക്ക് പുറമെ ഏഷ്യൻ രാജ്യങ്ങളിലേക്കും വിപണി വ്യാപിപ്പിക്കാൻ ഇത്തരം സംഘങ്ങൾ ശ്രമിക്കുന്നു. അന്താരാഷ്ട്ര തലത്തിലുള്ള ലഹരിക്കടത്തിന്റെ ആഗോള ശൃംഖലയെ പ്രതിരോധിക്കാൻ സംസ്ഥാന അതിർത്തികളിലും റെയിൽവേ സ്റ്റേഷനുകളിലും വിമാനത്താവളങ്ങളിലും ‘ഓപ്പറേഷൻ തൂഫാൻ’ വലിയ തോതിലുള്ള പരിശോധനകളാണ് ഉറപ്പാക്കുന്നത്.
ലഹരി ഉപയോഗം വ്യക്തികളുടെ ആരോഗ്യത്തെ മാത്രമല്ല, സമൂഹത്തിലെ കുറ്റകൃത്യങ്ങൾ വർദ്ധിപ്പിക്കുന്നതിനും ഗാർഹിക അക്രമങ്ങൾക്കും സുരക്ഷാ ഭീഷണികൾക്കും കാരണമാകുന്നുവെന്ന് യുഎൻഒഡിസി റിപ്പോർട്ട് അടിവരയിടുന്നു. ദാരിദ്ര്യം, മാനസികാരോഗ്യ പ്രശ്നങ്ങൾ തുടങ്ങിയ സാമൂഹിക സാഹചര്യങ്ങളും ഇതിന് കാരണമാകുന്നുണ്ട്. അതുകൊണ്ട് തന്നെ കേവലം ഒരു പോലീസ് നടപടി എന്നതിലുപരി, പൊതുജന പങ്കാളിത്തത്തോടെയുള്ള ബോധവൽക്കരണം, സ്കൂളുകൾ കേന്ദ്രീകരിച്ചുള്ള പ്രതിരോധ പ്രവർത്തനങ്ങൾ, ലഹരിവിമുക്ത ചികിത്സകൾ എന്നിവ സമന്വയിപ്പിച്ചാണ് കേരളം ‘ഓപ്പറേഷൻ തൂഫാൻ’ നടപ്പിലാക്കുന്നത്. ആഗോള തലത്തിൽ ലഹരി മാഫിയകൾ പുതിയ സാങ്കേതിക വിദ്യകളിലൂടെ പിടിമുറുക്കുമ്പോൾ, ശക്തമായ നിയമപാലനത്തിലൂടെയും സാമൂഹിക ഇടപെടലുകളിലൂടെയും മാത്രമേ ലഹരി എന്ന മഹാവിപത്തിനെ തടയാനാകൂ എന്നാണ് ലോക റിപ്പോർട്ടും കേരളത്തിന്റെ പ്രതിരോധ നടപടികളും വ്യക്തമാക്കുന്നത്.
