ടോക്കിയോ: പശ്ചിമേഷ്യൻ യുദ്ധം അവസാനിപ്പിക്കാനും ഹോർമുസ് കടലിടുക്ക് പുനഃസ്ഥാപിക്കാനും ഇറാൻ മുന്നോട്ടുവെച്ച സമാധാന നിർദ്ദേശം അമേരിക്കൻ പ്രസിഡന്റ് ഡൊണാൾഡ് ട്രംപ് തള്ളിയതോടെ ഏഷ്യൻ വിപണിയിൽ ക്രൂഡ് ഓയിൽ വില വീണ്ടും കുതിച്ചുയർന്നു. ടെഹ്റാൻ മുന്നോട്ടുവെച്ച ഏഴ് ഉപാധികൾ അംഗീകരിക്കാൻ അമേരിക്ക തയ്യാറാകാതിരുന്നതാണ് വിപണിയിൽ പെട്ടെന്നുള്ള വ്യതിയാനത്തിന് കാരണമായത്.
റോയിട്ടേഴ്സ് പുറത്തുവിട്ട റിപ്പോർട്ടുകൾ പ്രകാരം, അന്താരാഷ്ട്ര വിപണിയിലെ ബെഞ്ച്മാർക്കായ ബ്രെന്റ് ക്രൂഡ് ഫ്യൂച്ചേഴ്സ് വില ഒരു ശതമാനത്തിലധികം വർദ്ധിച്ച് ബാരലിന് 105.64 ഡോളറിലെത്തി. അമേരിക്കൻ വെസ്റ്റ് ടെക്സസ് ഇന്റർമീഡിയറ്റ് (WTI) ക്രൂഡ് വില അര ശതമാനത്തിലധികം ഉയർന്ന് ബാരലിന് 93.11 ഡോളറിലെത്തിയിട്ടുണ്ട്.
ചർച്ചയ്ക്കുള്ള ഇറാന്റെ നീക്കങ്ങൾ പരാജയപ്പെടുകയും വാഷിംഗ്ടൺ നിലപാട് കടുപ്പിക്കുകയും ചെയ്തതോടെ, ലോകത്തിലെ ഏറ്റവും സുപ്രധാന സമുദ്ര എണ്ണപാതയായ ഹോർമുസ് കടലിടുക്കിലൂടെയുള്ള എണ്ണ വിതരണം ഇനിയും തടസ്സപ്പെടുമെന്ന ആശങ്കയിലാണ് ആഗോള സാമ്പത്തിക രംഗം. എണ്ണ വിതരണ തടസ്സം നീണ്ടുനിന്നാൽ വരും ദിവസങ്ങളിൽ ക്രൂഡ് ഓയിൽ വില ഇനിയും ഉയരാനാണ് സാധ്യതയെന്ന് വിപണി വിദഗ്ദ്ധർ ചൂണ്ടിക്കാട്ടുന്നു.
