ടെഹ്റാൻ: തെക്കൻ ഇറാനിലെ സിരിക്കിലുള്ള (Sirik) ടെലികമ്മ്യൂണിക്കേഷൻ ടവറിന് നേരെയുണ്ടായ ആക്രമണത്തിന് തിരിച്ചടിയായി ബഹ്‌റൈനിലെ അമേരിക്കൻ ‘ഏർളി വാണിംഗ്’ (Early Warning) റഡാർ സംവിധാനം ലക്ഷ്യമിട്ട് ആക്രമണം നടത്തിയതായി ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സ് (IRGC) അറിയിച്ചു. അർദ്ധ-ഔദ്യോഗിക വാർത്താ ഏജൻസിയായ തസ്‌നിം ആണ് ഇക്കാര്യം റിപ്പോർട്ട് ചെയ്തത്.
ഹോർമുസ് കടലിടുക്കിലെ വ്യോമ പ്രകോപനങ്ങളും എണ്ണക്കടത്തും അവസാനിപ്പിക്കാൻ അധിനിവേശ ശത്രുക്കൾക്ക് നൽകുന്ന ഗൗരവകരമായ മുന്നറിയിപ്പാണിതെന്ന് ഐ.ആർ.ജി.സി പ്രസ്താവനയിൽ വ്യക്തമാക്കി. ഇത്തരം നിയമലംഘനങ്ങളും കടന്നുകയറ്റങ്ങളും ആവർത്തിക്കുകയാണെങ്കിൽ പരിധികളില്ലാതെ തിരിച്ചടിക്കാൻ ഐ.ആർ.ജി.സി എയറോസ്‌പേസ് ഫോഴ്‌സ് പൂർണ്ണ സജ്ജമാണെന്നും സൈന്യം മുന്നറിയിപ്പ് നൽകി.
വ്യാഴാഴ്ച ഹോർമുസ്ഗാൻ പ്രവിശ്യയിലെ തെക്കൻ തുറമുഖ നഗരമായ സിരിക്കിൽ ‘ശത്രുക്കളുടെ വെടിവെപ്പ്’ ഉണ്ടായതായി ഔദ്യോഗിക വൃത്തങ്ങളെ ഉദ്ധരിച്ച് ഇറാൻ സ്റ്റേറ്റ് വാർത്താ ഏജൻസിയായ ഇർന നേരത്തെ റിപ്പോർട്ട് ചെയ്തിരുന്നു. സെപ്റ്റംബർ ആദ്യത്തിന് ശേഷം ഗൾഫ് മേഖലയിലെ അമേരിക്കൻ സൈനിക ആസ്തികൾക്ക് നേരെ ആക്രമണം നടത്തിയതായി ഇറാൻ അവകാശപ്പെടുന്നത് ഇതാദ്യമായാണ്. അതേസമയം, ഇറാന്റെ ഈ അവകാശവാദത്തോട് അമേരിക്കയോ ബഹ്‌റൈനോ ഇതുവരെ ഔദ്യോഗികമായി പ്രതികരിച്ചിട്ടില്ല.
