ന്യൂഡൽഹി: ജന്തർമന്തറിൽ അതിക്രമിച്ചുകയറി ദേശീയ പതാക വീശി പ്രതിഷേധിച്ച കേസിൽ അറസ്റ്റിലായ കോക്രോച്ച് ജനതാ പാർട്ടി (സി.ജെ.പി) വക്താക്കൾക്ക് മോചനം. സൗരവ് ദാസ്, അശുതോഷ് റാങ്ക എന്നിവരെ ഏഴു ദിവസത്തെ ജയിൽവാസത്തിന് ശേഷം മോചിപ്പിക്കാൻ ഡൽഹിയിലെ സ്പെഷ്യൽ എക്‌സിക്യൂട്ടീവ് മജിസ്‌ട്രേറ്റ് ഉത്തരവിട്ടു. സമരം ചെയ്യാനുള്ള ഔദ്യോഗിക കേന്ദ്രങ്ങളുടെ പട്ടികയിൽ നിന്ന് ജന്തർമന്തറിന്റെ പദവി എടുത്തുമാറ്റിയതിൽ പ്രതിഷേധിച്ചായിരുന്നു ഇവരുടെ നടപടി.
കഴിഞ്ഞ ഒക്ടോബർ 13-നാണ് പൂട്ടിയിട്ടിരുന്ന ജന്തർമന്തറിന്റെ ഗേറ്റുകൾ ചാടിക്കടന്ന് സൗരവ് ദാസും അശുതോഷ് റാങ്കയും അകത്തുകയറി ദേശീയ പതാക വീശി പ്രതിഷേധിച്ചത്. നേരത്തെ ഒക്ടോബർ 10-ന് പോലീസ് കസ്റ്റഡിയിലെടുത്തപ്പോൾ ഇരുവരും ഒപ്പുവെച്ച സമാധാന ബോണ്ടിന്റെ ലംഘനമായാണ് അധികൃതർ ഈ പ്രവൃത്തിയെ കണ്ടത്. തുടർന്ന് ഒക്ടോബർ 14-ന് സ്പെഷ്യൽ എക്‌സിക്യൂട്ടീവ് മജിസ്‌ട്രേറ്റിന് മുന്നിൽ ഹാജരാക്കിയ ഇവരെ അഞ്ച് ദിവസത്തെ ജുഡീഷ്യൽ കസ്റ്റഡിയിൽ വിടുകയും, തിങ്കളാഴ്ച കസ്റ്റഡി കാലാവധി രണ്ടു ദിവസത്തേക്ക് കൂടി നീട്ടിനൽകുകയുമായിരുന്നു. ഒക്ടോബർ 14 മുതൽ ആരംഭിച്ച ജുഡീഷ്യൽ കസ്റ്റഡിയുടെ ഏഴു ദിവസത്തെ കാലാവധി പൂർത്തിയായതിനെ തുടർന്നാണ് ഇപ്പോൾ മോചന ഉത്തരവുണ്ടായിരിക്കുന്നത്.
അതേസമയം, ജാമ്യവ്യവസ്ഥകൾ ലംഘിച്ച് അനുമതിയില്ലാതെ ജന്തർമന്തറിൽ അതിക്രമിച്ചുകയറിയ നേതാക്കളുടെ നടപടിയെ ഡൽഹി ഹൈക്കോടതി രൂക്ഷമായി വിമർശിച്ചു. സൗരവ് ദാസും അശുതോഷ് റാങ്കയും ‘ജെൻ സി’ (Gen Z) കുട്ടികളല്ലെന്ന് നിരീക്ഷിച്ച ജസ്റ്റിസ് സുബ്രഹ്മണ്യം പ്രസാദ്, വിദേശരാജ്യങ്ങളിൽ വിദ്യാർഥി പ്രക്ഷോഭങ്ങളായി തുടങ്ങിയ പല സംഭവങ്ങളും പിന്നീട് വലിയ അക്രമങ്ങളിലേക്കും തീവെപ്പിലേക്കും വഴിമാറിയത് ചൂണ്ടിക്കാട്ടി. ജാമ്യവ്യവസ്ഥകൾ ആവർത്തിച്ച് ലംഘിച്ച സാഹചര്യത്തിൽ ഇവർക്കെതിരെ കൂടുതൽ കർശനമായ തെളിവുകൾ ആവശ്യപ്പെടാൻ അധികാരികൾക്ക് അവകാശമില്ലേ എന്നും കോടതി ചോദിച്ചു.
ഇതിനിടെ, കസ്റ്റഡി നീട്ടിയ ഒക്ടോബർ 19-ലെ ഉത്തരവ് നിയമപരമായി നിലനിൽക്കില്ലെന്ന് നേതാക്കൾക്ക് വേണ്ടി ഹാജരായ അഭിഭാഷകൻ അഭീക് ചിംനി വാദിച്ചു. കൂടാതെ, സൗരവ് ദാസിനും അശുതോഷ് റാങ്കയ്ക്കുമെതിരെയുള്ള രണ്ടാമത്തെ കേസിന്റെ അന്വേഷണ ചുമതലയും ഡൽഹി പോലീസ് ക്രൈം ബ്രാഞ്ചിന് കൈമാറിയിട്ടുണ്ട്. ഇതോടെ നേതാക്കൾക്കെതിരായ രണ്ട് കേസുകളും ക്രൈം ബ്രാഞ്ചാണ് അന്വേഷിക്കുന്നത്.
