തിരുവനന്തപുരം: തലസ്ഥാനത്ത് പത്തു വയസ്സുകാരനെ ഒരു സംഘം ആളുകൾ ചേർന്ന് നിർബന്ധിതമായി ലഹരിമരുന്ന് നൽകി ക്രൂരമായ ലൈംഗിക പീഡനത്തിന് ഇരയാക്കിയതായി പരാതി. തിരുവനന്തപുരം പൂന്തുറ പോലീസ് സ്റ്റേഷൻ പരിധിയിലാണ് മനസ്സാക്ഷിയെ ഞെട്ടിക്കുന്ന ഈ സംഭവം റിപ്പോർട്ട് ചെയ്തിരിക്കുന്നത്. ഈ മാസം 14-ാം തീയതിയാണ് കേസിനാസ്പദമായ സംഭവം നടന്നത്. വഴിയിലൂടെ നടന്നുപോവുകയായിരുന്ന കുട്ടിയെ ഒരു സംഘം ആളുകൾ ബലപൂർവ്വം പിടിച്ചുകൊണ്ടുപോകുകയായിരുന്നു. തുടർന്ന് കുട്ടിക്ക് നിർബന്ധിതമായി ലഹരിമരുന്ന് നൽകിയ ശേഷമാണ് സംഘം ക്രൂരമായ ലൈംഗിക അതിക്രമത്തിന് ഇരയാക്കിയതെന്ന് പരാതിയിൽ വ്യക്തമാക്കുന്നു. സംഭവത്തിൽ പൂന്തുറ പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചിട്ടുണ്ട്.
സംഭവത്തിന് ശേഷം വീട്ടിലെത്തിയ കുട്ടിയുടെ പെരുമാറ്റത്തിൽ അസ്വാഭാവികത തോന്നിയതിനെ തുടർന്ന് മാതാപിതാക്കൾ കുട്ടിയെ ആശുപത്രിയിൽ പ്രവേശിപ്പിച്ചു. അവിടെ വച്ച് നടത്തിയ കൗൺസിലിംഗിലും വൈദ്യപരിശോധനയിലുമാണ് കുട്ടി നേരിട്ട ക്രൂരമായ പീഡനവിവരം പുറത്തറിയുന്നത്. തുടർന്ന് ആശുപത്രി അധികൃതർ ചൈൽഡ് ലൈനിലും പൊലീസിലും വിവരം അറിയിക്കുകയായിരുന്നു. വിവരമറിഞ്ഞ് ആശുപത്രിയിലെത്തിയ പൂന്തുറ പോലീസ് കുട്ടിയുടെ മൊഴി വിശദമായി രേഖപ്പെടുത്തി.
കുട്ടിയുടെ മൊഴിയുടെ അടിസ്ഥാനത്തിൽ പോക്സോ വകുപ്പുകൾ ഉൾപ്പെടെ ചുമത്തി പോലീസ് എഫ്.ഐ.ആർ രജിസ്റ്റർ ചെയ്തിട്ടുണ്ട്. പ്രതികളെ അടിയന്തരമായി തിരിച്ചറിയുന്നതിനായി പ്രദേശത്തെ സിസിടിവി ദൃശ്യങ്ങൾ കേന്ദ്രീകരിച്ചും ലഹരിവിൽപ്പനക്കാരെയും ലഹരിസംഘങ്ങളെയും കേന്ദ്രീകരിച്ചും പോലീസ് അന്വേഷണം വ്യാപിപ്പിച്ചു. പ്രതികൾക്കായി തെരച്ചിൽ ഊർജ്ജിതമാക്കിയതായും കുറ്റവാളികളെ ഉടൻ നിയമത്തിന് മുന്നിൽ കൊണ്ടുവരുമെന്നും പൂന്തുറ പോലീസ് അറിയിച്ചു.
