ബെയ്റൂത്ത്/ടെഹ്റാൻ: അമേരിക്കയും ഇറാനും തമ്മിൽ പശ്ചിമേഷ്യൻ യുദ്ധം അവസാനിപ്പിക്കുന്നതിനുള്ള നയതന്ത്ര ചർച്ചകളിൽ നിർണ്ണായക പുരോഗതിയുണ്ടായെന്ന റിപ്പോർട്ടുകൾ പുറത്തുവരുന്നതിനിടയിലും, ലെബനനിൽ ആക്രമണം ശക്തമാക്കി ഇസ്രായേൽ. തെക്കൻ ലെബനന്റെ വിവിധ ഭാഗങ്ങളിൽ ഇസ്രായേൽ സൈന്യം നടത്തിയ മാരകമായ വ്യോമാക്രമണങ്ങളിലും ഡ്രോൺ വർഷങ്ങളിലുമായി കുറഞ്ഞത് അഞ്ച് പലസ്തീൻ-ലെബനീസ് പൗരന്മാർ കൊല്ലപ്പെട്ടു. അമേരിക്കൻ പ്രസിഡന്റ് ഡൊണാൾഡ് ട്രംപ് ഇറാമുമായുള്ള സമാധാന കരാർ അതിന്റെ അവസാന ഘട്ടത്തിലാണെന്ന് വൈറ്റ് ഹൗസിൽ വെച്ച് പ്രഖ്യാപിച്ചതിന് തൊട്ടുപിന്നാലെയാണ്, അന്താരാഷ്ട്ര സമൂഹത്തിന്റെ സമാധാന പ്രതീക്ഷകളെ അസ്ഥാനത്താക്കിക്കൊണ്ട് ഇസ്രായേൽ ലെബനനിൽ വീണ്ടും ചോരപ്പുഴയൊഴുക്കിയത്.
തെക്കൻ ലെബനനിലെ നബാതിയ, ടൈറ എന്നീ തന്ത്രപ്രധാന ജില്ലകളെ കേന്ദ്രീകരിച്ചായിരുന്നു ഇസ്രായേൽ വ്യോമസേനയുടെ പ്രധാന സൈനിക നീക്കം. നബാതിയ പ്രവിശ്യയിലെ ഹബൂഷ് നഗരത്തിൽ ഇസ്രായേൽ ഡ്രോൺ നടത്തിയ മിസൈലാക്രമണത്തിൽ പതിനാറുകാരനായ ഒരു ലെബനീസ് കൗമാരക്കാരൻ കൊല്ലപ്പെട്ടു. കൂടാതെ, അദ്ഷിത് മേഖലയിലെ ഒരു കൃഷിയിടം ലക്ഷ്യമിട്ടുണ്ടായ വ്യോമാക്രമണത്തിൽ ഒരു കർഷകനും, കാഫർ റുമ്മാൻ നഗരത്തിലെ അൽ-മർജ് ജനവാസ മേഖലയിൽ പുലർച്ചെയുണ്ടായ ഡ്രോൺ ആക്രമണത്തിൽ മറ്റ് രണ്ടുപേരും കൊല്ലപ്പെട്ടതായി ലെബനന്റെ ഔദ്യോഗിക വാർത്താ ഏജൻസിയായ എൻ.എൻ.എ സ്ഥിരീകരിച്ചു. തീരദേശ നഗരമായ ടൈറയിലെ ജനസാന്ദ്രതയേറിയ റെസിഡൻഷ്യൽ കെട്ടിടങ്ങൾക്ക് നേരെയും ഇസ്രായേൽ യുദ്ധവിമാനങ്ങൾ കനത്ത ബോംബുകൾ വർഷിച്ചു. ഇവിടെ തകർന്ന കെട്ടിടങ്ങൾക്കിടയിൽ നിന്നും രക്ഷാപ്രവർത്തകർ ഒരാളുടെ മൃതദേഹം കൂടി കണ്ടെടുത്തതോടെയാണ് ആകെ മരണസംഖ്യ അഞ്ചായി ഉയർന്നത്.
പശ്ചിമേഷ്യൻ യുദ്ധത്തിന്റെ പശ്ചാത്തലത്തിൽ ഒമാന്റെ മധ്യസ്ഥതയിൽ വാഷിംഗ്ടണിൽ വെച്ച് യു.എസും ഇറാനും തമ്മിൽ അഞ്ചാം വട്ട ചർച്ചകൾ പുരോഗമിക്കുകയാണ്. പശ്ചിമേഷ്യയിലെ വലിയൊരു സമാധാന കരാറിൽ ലെബനനും ഉൾപ്പെടുമെന്ന് മുതിർന്ന യു.എസ് ഉദ്യോഗസ്ഥർ സൂചിപ്പിക്കുന്നുണ്ടെങ്കിലും, ലെബനീസ് അതിർത്തിയിൽ ഇസ്രായേൽ നടത്തുന്ന ഈ വ്യവസ്ഥാപിതമായ ആക്രമണങ്ങൾ നയതന്ത്ര ചർച്ചകളെ പ്രകോപിപ്പിക്കാൻ ലക്ഷ്യമിട്ടുള്ളതാണെന്ന് രാഷ്ട്രീയ നിരീക്ഷകർ വിലയിരുത്തുന്നു. താൽക്കാലിക വെടിനിർത്തൽ കരാറുകൾ നിലവിലുണ്ടായിട്ടും, ലെബനനിലെ നഗരങ്ങൾ ഒന്നടങ്കം ഒഴിഞ്ഞുപോയെന്ന് കാണിച്ച് ഇസ്രായേൽ സൈന്യം ഭീഷണി തുടരുകയാണ്. ഇസ്രായേലിന്റെ ഈ ഏകപക്ഷീയമായ അധിനിവേശത്തിനെതിരെ ഹിസ്ബുള്ളയും അതിർത്തിയിൽ പ്രതിരോധം ശക്തമാക്കിയിട്ടുണ്ട്.
