ലോസ് ആഞ്ചലസ്: ലോകകപ്പ് ഗ്രൂപ്പ് ജി മത്സരത്തിൽ ന്യൂസീലൻഡിനെതിരെ രണ്ടു തവണ പിന്നിലായ ശേഷം ശക്തമായി തിരിച്ചടിച്ച് ഇറാൻ 2-2 ന്റെ ആവേശ സമനില സ്വന്തമാക്കി. മത്സരത്തിന്റെ തുടക്കത്തിൽ തന്നെ ഏഴാം മിനിറ്റിൽ ഇലൈജ ജസ്റ്റിലൂടെ ന്യൂസീലൻഡ് മുന്നിലെത്തിയെങ്കിലും 32-ാം മിനിറ്റിൽ റാമിൻ റെസായൻ ഇറാനായി സമനില ഗോൾ നേടി.
തുടർന്ന് രണ്ടാം പകുതിയിൽ 54-ാം മിനിറ്റിൽ ഇലൈജ ജസ്റ്റ് വീണ്ടും ഗോൾ നേടി ന്യൂസീലൻഡിന് ലീഡ് സമ്മാനിച്ചെങ്കിലും, വെറും പത്തു മിനിറ്റുകൾക്കുള്ളിൽ (64-ാം മിനിറ്റ്) മുഹമ്മദ് മൊഹെബിയിലൂടെ ഇറാൻ വീണ്ടും സമനില പിടിക്കുകയായിരുന്നു. രാഷ്ട്രീയ സംഘർഷങ്ങളുടെയും യുഎസ്-ഇറാൻ സമാധാന ചർച്ചകളുടെയും പശ്ചാത്തലത്തിൽ ലോസ് ആഞ്ചലസ് സ്റ്റേഡിയത്തിൽ കനത്ത സുരക്ഷയിലാണ് മത്സരം അരങ്ങേറിയത്. ഗ്രൂപ്പിലെ മറ്റൊരു മത്സരത്തിൽ ഈജിപ്തും ബെൽജിയവും 1-1 ന് സമനിലയിൽ പിരിഞ്ഞതോടെ ഗ്രൂപ്പ് ജിയിലെ എല്ലാ ടീമുകൾക്കും നിലവിൽ ഓരോ പോയിന്റ് വീതമാണുള്ളത്. ഞായറാഴ്ച നടക്കുന്ന അടുത്ത മത്സരങ്ങളിൽ ഇറാൻ ബെൽജിയത്തെയും ന്യൂസീലൻഡ് ഈജിപ്തിനെയും നേരിടും.
