മലപ്പുറം: മോട്ടോർ വാഹന വകുപ്പ് (എം.വി.ഡി) ഉദ്യോഗസ്ഥരുടെ അഴിമതിയിലും വേട്ടയാടലിലും മനംനൊന്ത് കിഴിശ്ശേരി മുണ്ടംപറമ്പ് സ്വദേശിയായ ഓട്ടോ ഡ്രൈവർ ഷൗക്കത്ത് ജീവനൊടുക്കിയ സംഭവത്തിൽ ഗതാഗത കമ്മീഷണർ സർക്കാരിന് പ്രാഥമിക റിപ്പോർട്ട് സമർപ്പിച്ചു. ഓട്ടോറിക്ഷയിൽ വരുത്തിയ രൂപമാറ്റം ഒഴിവാക്കാൻ ആവശ്യപ്പെട്ടിട്ടും അതിന് തയ്യാറാകാത്തതിനാലാണ് ഫിറ്റ്നസ് സർട്ടിഫിക്കറ്റ് നിഷേധിച്ചതെന്നാണ് കമ്മീഷണറുടെ റിപ്പോർട്ടിലെ പ്രധാന കണ്ടെത്തൽ. കൈക്കൂലി നൽകാത്തതിനെ തുടർന്ന് കഴിഞ്ഞ പത്ത് മാസമായി ഫിറ്റ്നസ് നൽകാതെ ഉദ്യോഗസ്ഥരും ഏജന്റുമാരും പീഡിപ്പിക്കുകയായിരുന്നുവെന്നും, വരുമാനം നിലച്ച് വായ്പാ തിരിച്ചടവുകൾ മുടങ്ങി കടുത്ത സാമ്പത്തിക-മാനസിക പ്രതിസന്ധിയിലായെന്നും വ്യക്തമാക്കുന്ന വിശദമായ ഫെയ്സ്ബുക്ക് കുറിപ്പ് പങ്കുവെച്ച ശേഷമായിരുന്നു ഷൗക്കത്തിന്റെ ആത്മഹത്യ.
സംഭവം അങ്ങേയറ്റം ദൗർഭാഗ്യകരമാണെന്നും ഉദ്യോഗസ്ഥരുടെ ഭാഗത്തുനിന്ന് വീഴ്ചയോ മാനസിക പീഡനമോ ഉണ്ടായിട്ടുണ്ടോ എന്ന് സമഗ്രമായി പരിശോധിക്കുമെന്നും ഗതാഗതമന്ത്രി പ്രതികരിച്ചു. ഷൗക്കത്ത് സോഷ്യൽ മീഡിയയിൽ പങ്കുവെച്ച വിവരങ്ങളും അന്വേഷണത്തിന്റെ ഭാഗമാക്കുമെന്നും കുറ്റക്കാർക്കെതിരെ മുഖംനോക്കാതെ കർശന നടപടിയെടുക്കുമെന്നും മന്ത്രി കൂട്ടിച്ചേർത്തു. സാധാരണക്കാരെ ദ്രോഹിക്കുന്ന സമീപനം ഉദ്യോഗസ്ഥരുടെ ഭാഗത്തുനിന്ന് ഉണ്ടാകരുതെന്ന് സർക്കാരിന്റെ കർശന നിർദ്ദേശമുണ്ട്. ഷൗക്കത്തിന്റെ മരണത്തിൽ കുറ്റക്കാർക്കെതിരെ ശക്തമായ നടപടി ഉറപ്പാക്കുമെന്നും സമഗ്ര അന്വേഷണം നടത്തുമെന്നും കൊണ്ടോട്ടി എം.എൽ.എയും വ്യക്തമാക്കി. എം.വി.ഡി ഉദ്യോഗസ്ഥർക്കെതിരെ പ്രദേശവാസികളിൽ നിന്നും വ്യാപക പ്രതിഷേധമാണ് ഉയരുന്നത്.
