ന്യൂഡൽഹി: രാത്രി സമയങ്ങളിൽ സ്ത്രീകൾ പുറത്തിറങ്ങുന്നതിനെ ചോദ്യം ചെയ്യുകയും നിയന്ത്രിക്കാൻ ശ്രമിക്കുകയും ചെയ്യുന്ന പോലീസ് സമീപനത്തിനെതിരെ കടുത്ത വിമർശനവുമായി സുപ്രീം കോടതി. രാത്രി 10 മണിക്കും സ്ത്രീകൾക്ക് ഭയമില്ലാതെ റോഡിലിറങ്ങി നടക്കാമെന്നും സ്വതന്ത്രമായി സഞ്ചരിക്കാനുള്ള അവകാശം എല്ലാവർക്കുമുണ്ടെന്നും നീതിപീഠം വ്യക്തമാക്കി. രാത്രി വൈകി സഞ്ചരിക്കുന്ന സ്ത്രീകളെയല്ല, മറിച്ച് കുറ്റവാളികളെയും ക്രിമിനലുകളെയുമാണ് പോലീസ് ഭയപ്പെടുത്തേണ്ടതെന്നും ഡൽഹി പോലീസിന് നിർദ്ദേശം നൽകവേ സുപ്രീം കോടതി ഓർമ്മിപ്പിച്ചു.
ഡൽഹി ജന്തർ മന്തറിൽ നടന്ന പ്രതിഷേധങ്ങൾക്കിടെ സ്വതന്ത്ര വനിതാ മാധ്യമപ്രവർത്തകർക്കും വിദ്യാർത്ഥിനികൾക്കും നേരെ നടന്ന പോലീസ് അതിക്രമവും അനാവശ്യ തടഞ്ഞുവെക്കലുകളും ചോദ്യം ചെയ്തുള്ള ഹർജികൾ പരിഗണിക്കവേയാണ് പരമോന്നത കോടതിയുടെ നിർണ്ണായക പരാമർശം. ക്രമസമാധാന പാലനത്തിന്റെയും സുരക്ഷയുടെയും പേരുപറഞ്ഞ് സ്ത്രീകളുടെ സഞ്ചാരസ്വാതന്ത്ര്യത്തിന്മേൽ തടസ്സങ്ങൾ സൃഷ്ടിക്കുന്നത് അംഗീകരിക്കാനാകില്ല. പൗരന്മാരുടെ സുരക്ഷ ഉറപ്പാക്കുക എന്നതാണ് പോലീസിന്റെ പ്രധാന ചുമതലയെന്നും, അല്ലാതെ രാത്രിയിൽ പുറത്തിറങ്ങുന്ന സ്ത്രീകളെ സംശയനിഴലിൽ നിർത്തുകയല്ല വേണ്ടതെന്നും കോടതി ഓർമ്മിപ്പിച്ചു.
പോലീസ് ഉദ്യോഗസ്ഥരുടെ ഭാഗത്തുനിന്നുണ്ടാകുന്ന നിയമവിരുദ്ധമായ പെരുമാറ്റങ്ങളും അതിക്രമങ്ങളും ക്രമസമാധാന സംവിധാനത്തിന് മേലുള്ള ജനങ്ങളുടെ വിശ്വാസം നഷ്ടപ്പെടുത്തുമെന്ന് കോടതി നിരീക്ഷിച്ചു. സ്ത്രീകളുടെ സുരക്ഷ ഉറപ്പാക്കുന്നതിൽ ഡൽഹി പോലീസ് കൂടുതൽ ജാഗ്രതയും ഉത്തരവാദിത്തവും പുലർത്തണമെന്ന് ആവശ്യപ്പെട്ട സുപ്രീം കോടതി, പരാതികളിൽ നിഷ്പക്ഷവും സമയബന്ധിതവുമായ അന്വേഷണം നടപ്പാക്കണമെന്നും കർശന നിർദ്ദേശം നൽകി.
