തിരുവനന്തപുരം: സംസ്ഥാന സെക്രട്ടേറിയറ്റിലും ക്ലിഫ് ഹൗസിലുമടക്കം 102 കേന്ദ്രങ്ങളിൽ ബോംബ് വെച്ചിട്ടുണ്ടെന്ന് നിരന്തരം വ്യാജ ഭീഷണി സന്ദേശങ്ങൾ അയച്ച കേസിൽ ഒടുവിൽ പ്രതി പിടിയിൽ. തമിഴ്നാട് സ്വദേശിയും അമേരിക്കയിൽ സോഫ്റ്റ്‌വെയർ എൻജിനീയറുമായ ശരത് സുബ്രഹ്മണ്യനെയാണ് തമിഴ്നാട് ഭീകരവിരുദ്ധ സ്ക്വാഡ് (ATS) അറസ്റ്റ് ചെയ്തത്. തുടർന്ന് കേരളത്തെ ഞെട്ടിച്ച സംഭവത്തിൽ പ്രതിയെ തിരുവനന്തപുരം സിറ്റി പോലീസ് കസ്റ്റഡിയിൽ വാങ്ങിയിട്ടുണ്ട്. സെക്രട്ടേറിയറ്റിനും മുഖ്യമന്ത്രിയുടെ ഔദ്യോഗിക വസതിയായ ക്ലിഫ് ഹൗസിനും പുറമേ നിരവധി പ്രമുഖ വിദ്യാലയങ്ങൾക്കും ആശുപത്രികൾക്കും നേരെയും ഇയാൾ ഇമെയിൽ വഴി വ്യാജ ബോംബ് ഭീഷണി മുഴക്കിയിരുന്നു. കേരളത്തിൽ മാത്രം പ്രതിക്കെതിരെ ആകെ 102 കേസുകളാണ് രജിസ്റ്റർ ചെയ്തിട്ടുള്ളത്.
അമേരിക്കയിൽ ജോലി ചെയ്തിരുന്ന കാലത്താണ് ഇയാൾ വ്യാജ ഇമെയിൽ വിലാസങ്ങൾ ഉപയോഗിച്ച് തുടർച്ചയായി ബോംബ് ഭീഷണികൾ സന്ദേശങ്ങളായി അയച്ചിരുന്നത്. ഏകദേശം ഒന്നരമാസം മുൻപ് ചെന്നൈയിലെത്തിയ ഇയാളെ, തമിഴ്നാട് മുൻ മുഖ്യമന്ത്രി എം.കെ. സ്റ്റാലിന്റെ ഭാര്യയുടെ മോർഫ് ചെയ്ത ചിത്രം സമൂഹമാധ്യമങ്ങളിൽ പ്രചരിപ്പിച്ച കേസിൽ തമിഴ്നാട് എ.ടി.എസ് കസ്റ്റഡിയിലെടുത്തിരുന്നു. ആർട്ടിഫിഷ്യൽ ഇന്റലിജൻസിന്റെ ഭാഗമായ ചാറ്റ് ജി.പി.ടി (ChatGPT) ഉപയോഗിച്ചാണ് ഈ ചിത്രം നിർമ്മിച്ചതെന്ന് പിന്നീട് ചോദ്യം ചെയ്യലിൽ വ്യക്തമായി. തുടർന്ന് നടത്തിയ ആഴത്തിലുള്ള അന്വേഷണത്തിലും ചോദ്യം ചെയ്യലിലുമാണ് കേരളത്തിൽ വ്യാപകമായി ഭീതി പരത്തിയ 102 ബോംബ് ഭീഷണികൾക്ക് പിന്നിലും ഇയാളാണെന്ന ഞെട്ടിക്കുന്ന വിവരം പുറത്തുവന്നത്.
