കൊച്ചി: വരാപ്പുഴ കൂനമ്മാവ് സ്വദേശികളായ രണ്ട് സ്കൂൾ വിദ്യാർഥിനികളെ കാണാതായി. 14 വയസ്സുള്ള രണ്ട് പെൺകുട്ടികളെയാണ് തിങ്കളാഴ്ച വൈകുന്നേരം മുതൽ കാണാതായത്. സ്കൂൾ സമയം കഴിഞ്ഞിട്ടും കുട്ടികൾ വീട്ടിലെത്താതിരുന്നതിനെ തുടർന്ന് ആശങ്കയിലായ രക്ഷിതാക്കൾ വരാപ്പുഴ പോലീസിൽ പരാതി നൽകുകയായിരുന്നു. സംഭവത്തിൽ കേസെടുത്ത പോലീസ് കുട്ടികൾക്കായി ഊർജ്ജിതമായ തിരച്ചിൽ ആരംഭിച്ചു.
കുട്ടികൾ പോകാൻ സാധ്യതയുള്ള പ്രധാന വഴികളിലെയും പൊതുസ്ഥലങ്ങളിലെയും സിസിടിവി ദൃശ്യങ്ങൾ പോലീസ് ശേഖരിച്ചുവരികയാണ്. നിലവിൽ കുട്ടികളെക്കുറിച്ച് മറ്റ് സൂചനകളൊന്നും ലഭിച്ചിട്ടില്ലെങ്കിലും തിരച്ചിൽ എല്ലാ ഭാഗങ്ങളിലേക്കും വ്യാപിപ്പിച്ചിട്ടുണ്ട്. ഇതിനിടെ, കഴിഞ്ഞ വെള്ളിയാഴ്ച തിരുവനന്തപുരം കരമനയിൽ നിന്ന് കാണാതായ 14-കാരിയെ ഹൈദരാബാദിൽ കണ്ടെത്താൻ സാധിച്ചത് പോലീസ് സംഘത്തിന് ആശ്വാസമായിട്ടുണ്ട്. ഹൈദരാബാദിലെ ഒരു സംരക്ഷണ കേന്ദ്രത്തിലുള്ള പെൺകുട്ടിയെ നാട്ടിലെത്തിക്കാൻ ബന്ധുക്കൾ അവിടേക്ക് പുറപ്പെട്ടിരിക്കുകയാണ്. വരാപ്പുഴയിൽ കാണാതായ കുട്ടികളെയും എത്രയും വേഗം കണ്ടെത്താനാകുമെന്ന പ്രതീക്ഷയിലാണ് പോലീസും വീട്ടുകാരും.
