പാലക്കാട്: ജില്ലയിലെ സ്കൂൾ വിദ്യാർഥിനികളെ പീഡിപ്പിച്ച പരാതിയിൽ കായിക അധ്യാപകനെതിരെ ഒരു പോക്സോ കേസ് കൂടി രജിസ്റ്റർ ചെയ്തു. പാലക്കാട് സൗത്ത് പോലീസാണ് അധ്യാപകനെതിരെ മൂന്നാമത്തെ കേസ് എടുത്തത്. സ്കൂളിലെ വിദ്യാർഥിനിയെ അധ്യാപകൻ ലൈംഗികമായി പീഡിപ്പിച്ചു എന്ന പരാതിയിലാണ് പുതിയ നടപടി. നേരത്തെ ഇതേ സ്കൂളിലെ രണ്ട് കുട്ടികൾ നൽകിയ പരാതിയുടെ അടിസ്ഥാനത്തിൽ ഇയാൾക്കെതിരെ രണ്ട് പോക്സോ കേസുകൾ രജിസ്റ്റർ ചെയ്തിരുന്നു.
പരാതികൾ വർദ്ധിച്ചതോടെ പ്രതിയെ പിടികൂടാനുള്ള അന്വേഷണം പോലീസ് ഊർജ്ജിതമാക്കിയിട്ടുണ്ട്. നിലവിൽ ഒളിവിൽ കഴിയുന്ന അധ്യാപകനായി ലുക്ക്ഔട്ട് നോട്ടീസ് പുറപ്പെടുവിക്കാനുള്ള നീക്കത്തിലാണ് അധികൃതർ. പ്രതിയെ സ്കൂൾ മാനേജ്മെന്റ് നേരത്തെ തന്നെ സസ്പെൻഡ് ചെയ്തിരുന്നു. കുട്ടികൾക്ക് നേരെ അധ്യാപകന്റെ ഭാഗത്തുനിന്ന് തുടർച്ചയായി ഇത്തരം അതിക്രമങ്ങൾ ഉണ്ടായ സംഭവം നാട്ടുകാർക്കിടയിൽ വലിയ പ്രതിഷേധത്തിന് കാരണമായിട്ടുണ്ട്. ചൈൽഡ് ലൈൻ പ്രവർത്തകർ കുട്ടികൾക്ക് ആവശ്യമായ കൗൺസിലിംഗ് നൽകിവരികയാണ്.
