ന്യൂഡൽഹി: ലോക്സഭാ സ്പീക്കർ ഓം ബിർളയെ സ്ഥാനത്തുനിന്ന് നീക്കണമെന്ന് ആവശ്യപ്പെട്ട് പ്രതിപക്ഷം നൽകിയ അവിശ്വാസ പ്രമേയത്തിന്മേലുള്ള ചർച്ച മാർച്ച് ഒൻപതിന് നടന്നേക്കുമെന്ന് സൂചന. പാർലമെന്റ് നടപടികളിൽ സ്പീക്കർ പക്ഷപാതപരമായി പെരുമാറുന്നുവെന്ന് ആരോപിച്ചാണ് കോൺഗ്രസ് ഉൾപ്പെടെയുള്ള പ്രതിപക്ഷ പാർട്ടികൾ നോട്ടീസ് നൽകിയത്. സഭാനടപടികൾ സുതാര്യമായി മുന്നോട്ട് കൊണ്ടുപോകുന്നതിൽ സ്പീക്കർ പരാജയപ്പെട്ടുവെന്നും പ്രതിപക്ഷ അംഗങ്ങളുടെ അവകാശങ്ങൾ ഹനിക്കുന്നുവെന്നും നോട്ടീസിൽ ആരോപിക്കുന്നു.
ചർച്ചക്കുള്ള തീയതി സംബന്ധിച്ച് ഔദ്യോഗിക പ്രഖ്യാപനം വന്നിട്ടില്ലെങ്കിലും മാർച്ച് ആദ്യവാരം തന്നെ നടപടികൾ പൂർത്തിയാക്കാനാണ് സർക്കാർ നീക്കം. ചർച്ച നടക്കുകയാണെങ്കിൽ മോദി സർക്കാരിന്റെ മൂന്നാം ഊഴത്തിൽ സ്പീക്കർ നേരിടുന്ന വലിയൊരു രാഷ്ട്രീയ വെല്ലുവിളിയായി ഇത് മാറും. പ്രമേയത്തെ നേരിടാൻ ഭരണപക്ഷവും സഭയിൽ ഒത്തൊരുമിച്ച് നീങ്ങാൻ പ്രതിപക്ഷവും തന്ത്രങ്ങൾ മെനയുകയാണ്. വരാനിരിക്കുന്ന ദിവസങ്ങളിൽ സഭയിൽ ഇതുമായി ബന്ധപ്പെട്ട വലിയ തർക്കങ്ങൾക്ക് സാധ്യതയുണ്ട്.
