ന്യൂഡൽഹി: വനിതാ സംവരണവും മണ്ഡല പുനർനിർണ്ണയവും ലക്ഷ്യമിട്ടുള്ള നിർണ്ണായകമായ ഭേദഗതി ബില്ലുകളിൽ ലോകസഭയിൽ ഇന്ന് വോട്ടെടുപ്പ് നടക്കും. വൈകുന്നേരം നാല് മണിയോടെയാണ് വോട്ടെടുപ്പ് നിശ്ചയിച്ചിരിക്കുന്നത്. 2011-ലെ സെൻസസിന്റെ അടിസ്ഥാനത്തിൽ രാജ്യമൊട്ടാകെ മണ്ഡല പുനർനിർണ്ണയം നടത്തി ലോകസഭയിലെ സീറ്റുകളുടെ എണ്ണം 850 ആയി വർദ്ധിപ്പിക്കാനാണ് കേന്ദ്ര സർക്കാർ നീക്കം. ഇതിലൂടെ ലോകസഭയിലും നിയമസഭകളിലും 33 ശതമാനം വനിതാ സംവരണം ഉറപ്പാക്കുന്ന മൂന്ന് ബില്ലുകളാണ് സർക്കാർ സഭയിൽ അവതരിപ്പിച്ചത്. പുലർച്ചെ ഒരു മണി വരെ നീണ്ട സഭാ ചർച്ചയിൽ ഭരണ-പ്രതിപക്ഷ കക്ഷികൾ തമ്മിൽ കടുത്ത വാഗ്വാദങ്ങളാണ് നടന്നത്.
ഭരണഘടനാ ഭേദഗതി ബില്ലായതിനാൽ ഇത് പാസാക്കാൻ സഭയിൽ മൂന്നിൽ രണ്ട് ഭൂരിപക്ഷം ആവശ്യമാണ്. കുറഞ്ഞത് 360 എം.പിമാരുടെ പിന്തുണയെങ്കിലും ബില്ലിന് ലഭിക്കണം. എന്നാൽ എൻ.ഡി.എ സഖ്യത്തിന് നിലവിൽ 293 അംഗങ്ങൾ മാത്രമാണുള്ളത്. ബില്ല് അവതരിപ്പിച്ച വേളയിൽ 251 പേർ മാത്രമാണ് അനുകൂലമായി വോട്ട് ചെയ്തത് എന്നത് സർക്കാരിന് തുടക്കത്തിൽ തന്നെ വലിയ തിരിച്ചടിയായി. ഭൂരിപക്ഷം തികയ്ക്കാൻ 67 എം.പിമാരുടെ പിന്തുണ കൂടി അധികമായി വേണ്ടിവരുന്ന സാഹചര്യത്തിൽ പ്രതിപക്ഷ പാർട്ടികളുടെ നിലപാട് ഏറെ നിർണ്ണായകമാണ്. സംവരണം നടപ്പിലാക്കാൻ ലോകസഭാ സീറ്റുകളുടെ എണ്ണം 50 ശതമാനം വർദ്ധിപ്പിക്കാമെന്ന നിർദ്ദേശം കേന്ദ്ര ആഭ്യന്തര മന്ത്രി അമിത് ഷാ മുന്നോട്ടുവെച്ചെങ്കിലും പ്രതിപക്ഷം ഇത് തള്ളിക്കളഞ്ഞു.
വനിതാ സംവരണത്തെ മണ്ഡല പുനർനിർണ്ണയവുമായി കൂട്ടിക്കെട്ടുന്നത് രാഷ്ട്രീയ ലക്ഷ്യത്തോടെയാണെന്ന് കോൺഗ്രസ് ഉൾപ്പെടെയുള്ള പ്രതിപക്ഷ കക്ഷികൾ ആരോപിക്കുന്നു. നിലവിലുള്ള 543 സീറ്റുകളിൽ തന്നെ സംവരണം നടപ്പിലാക്കണമെന്നും പുതിയ മണ്ഡല പുനർനിർണ്ണയം ദക്ഷിണേന്ത്യൻ സംസ്ഥാനങ്ങളുടെ പ്രാതിനിധ്യം കുറയ്ക്കുമെന്നുമാണ് ഇവരുടെ ആശങ്ക. എന്നാൽ ദക്ഷിണേന്ത്യൻ സംസ്ഥാനങ്ങൾക്ക് അർഹമായ പ്രാതിനിധ്യം ഉറപ്പാക്കുമെന്നും സീറ്റുകളുടെ എണ്ണത്തിൽ വർദ്ധനവുണ്ടാകുമെന്നും അമിത് ഷാ സഭയ്ക്ക് ഉറപ്പുനൽകി. ഇന്നത്തെ വോട്ടെടുപ്പിലൂടെ 2029-ലെ പൊതുതിരഞ്ഞെടുപ്പിന് മുന്നോടിയായുള്ള രാജ്യത്തെ പുതിയ രാഷ്ട്രീയ സമവാക്യങ്ങൾ രൂപപ്പെടുമെന്നാണ് രാഷ്ട്രീയ കേന്ദ്രങ്ങൾ വിലയിരുത്തുന്നത്.
