ന്യൂഡൽഹി/തിരുവനന്തപുരം: കേരളം ഉൾപ്പെടെ അഞ്ച് സംസ്ഥാനങ്ങളിൽ നടന്ന നിയമസഭാ വോട്ടെടുപ്പ് പൂർത്തിയായതിന് പിന്നാലെ പുറത്തുവന്ന എക്സിറ്റ് പോൾ ഫലങ്ങൾ കേരളത്തിൽ യുഡിഎഫിന് ഭരണസാധ്യത പ്രവചിക്കുന്നു. ശക്തമായ ഭരണവിരുദ്ധ തരംഗം നിലനിൽക്കുന്ന സംസ്ഥാനത്ത് എൽഡിഎഫിന് അധികാരം നഷ്ടമാകുമെന്നാണ് ഭൂരിഭാഗം സർവേകളും സൂചിപ്പിക്കുന്നത്. ആക്സിസ് മൈ ഇന്ത്യ, ഇന്ത്യ ടുഡേ സർവേകൾ യുഡിഎഫിന് 78 മുതൽ 90 വരെ സീറ്റുകൾ പ്രവചിക്കുമ്പോൾ, ടൈംസ് നൗ (72-84), ന്യൂസ് 18 (70-80) എന്നീ ഏജൻസികളും യുഡിഎഫ് തരംഗമാണ് പ്രവചിക്കുന്നത്. അതേസമയം, എൽഡിഎഫ് 50-65 സീറ്റുകളിലേക്ക് ചുരുങ്ങുമെന്നും എൻഡിഎ പൂജ്യം മുതൽ 5 സീറ്റുകൾ വരെ നേടിയേക്കാമെന്നും സർവേകൾ വ്യക്തമാക്കുന്നു.
കേരളത്തിൽ യുഡിഎഫ് മുന്നേറ്റം പ്രവചിക്കുമ്പോഴും ദേശീയ രാഷ്ട്രീയത്തിൽ ബിജെപിക്ക് കരുത്തുപകരുന്ന റിപ്പോർട്ടുകളാണ് പുറത്തുവരുന്നത്. പശ്ചിമ ബംഗാളിൽ മമതാ ബാനർജിയുടെ തൃണമൂൽ കോൺഗ്രസിനെ അട്ടിമറിച്ച് ബിജെപി അധികാരം പിടിച്ചെടുക്കുമെന്ന് ‘പോൾ ഡയറി’ ഉൾപ്പെടെയുള്ള സർവേകൾ സൂചിപ്പിക്കുന്നു. അസമിലും ബിജെപിക്ക് തന്നെയാണ് മുൻതൂക്കം. ബംഗാളിലെ രണ്ടാം ഘട്ട വോട്ടെടുപ്പ് പൂർത്തിയായതിന് പിന്നാലെയാണ് വിവിധ ഏജൻസികൾ ഈ ഫലങ്ങൾ പുറത്തുവിട്ടത്. തമിഴ്നാട്ടിൽ ഡിഎംകെ മുന്നണിക്ക് തന്നെയാണെങ്കിലും നടൻ വിജയ്യുടെ ടിവികെ (TVK) നിർണ്ണായക സ്വാധീനം ചെലുത്തുമെന്നും ചില എക്സിറ്റ് പോളുകൾ വിലയിരുത്തുന്നു.
അനുകൂലമായ എക്സിറ്റ് പോൾ ഫലങ്ങൾ പുറത്തുവന്നതോടെ യുഡിഎഫ് ക്യാമ്പുകളിൽ ആവേശം അണപൊട്ടുകയാണ്. 85-ൽ അധികം സീറ്റുകൾ നേടി അധികാരം പിടിക്കുമെന്ന കണക്കുകൂട്ടലിൽ കോൺഗ്രസ് കേന്ദ്രങ്ങളിൽ മുഖ്യമന്ത്രി ചർച്ചകൾ സജീവമായിക്കഴിഞ്ഞു. എന്നാൽ, എക്സിറ്റ് പോൾ പ്രവചനങ്ങളെ തള്ളിക്കളയുന്ന നിലപാടാണ് എൽഡിഎഫ് സ്വീകരിക്കുന്നത്. നേരിയ ഭൂരിപക്ഷത്തോടെയാണെങ്കിലും ഭരണത്തുടർച്ചയുണ്ടാകുമെന്ന ഉറച്ച വിശ്വാസത്തിലാണ് മുഖ്യമന്ത്രി പിണറായി വിജയനും മറ്റ് ഇടത് നേതാക്കളും. മറുഭാഗത്ത്, എൻഡിഎ തങ്ങളുടെ സീറ്റ് നില വർധിപ്പിച്ച് നിയമസഭയിൽ കരുത്ത് തെളിയിക്കാനാവുമെന്ന പ്രതീക്ഷയിലാണ്. വരും ദിവസങ്ങളിൽ പുറത്തുവരുന്ന വോട്ടെണ്ണൽ ഫലങ്ങൾക്കായി രാജ്യം ഉറ്റുനോക്കുകയാണ്.
