ടെഹ്റാൻ: ലബനൻ തലസ്ഥാനമായ ബെയ്റൂത്തിൽ ഇസ്രായേൽ നടത്തിയ കടുത്ത ആക്രമണങ്ങൾക്ക് മറുപടിയായി ഇസ്രായേൽ മണ്ണിലേക്ക് നേരിട്ട് മിസൈൽ വർഷിച്ചതിന് പിന്നാലെ, തങ്ങളുടെ സൈനിക തന്ത്രങ്ങളിൽ വലിയ മാറ്റം വന്നതായി ഇറാൻ ഔദ്യോഗികമായി പ്രഖ്യാപിച്ചു. ബെയ്റൂത്ത് ആക്രമണം എല്ലാ ചുവപ്പുരേഖകളും മറികടന്നതാണെന്ന് ചൂണ്ടിക്കാട്ടിയാണ് ഇറാൻ തങ്ങളുടെ പുതിയ ‘തന്ത്രപ്രധാന സിദ്ധാന്തം’ വ്യക്തമാക്കിയത്. മുൻപ് പ്രാദേശിക സായുധ ഗ്രൂപ്പുകളെ ഉപയോഗിച്ച് പരോക്ഷമായി പ്രതിരോധം തീർത്തിരുന്ന നയത്തിൽ നിന്നും മാറി, തങ്ങളുടെ സഖ്യകക്ഷികളെ സംരക്ഷിക്കാൻ സ്വന്തം സൈനിക ശേഷി നേരിട്ട് ഉപയോഗിക്കുമെന്ന പുതിയ നയത്തിലേക്കാണ് ഇറാൻ ചുവടുവെച്ചിരിക്കുന്നത്. ഇസ്രായേലിന്റെ നെവാതിം, തെൽ നോഫ് വ്യോമതാവളങ്ങളെ ലക്ഷ്യമിട്ട് ഇറാൻ നടത്തിയ ‘ഓപ്പറേഷൻ നസർ’ തങ്ങളുടെ അതിശക്തമായ പ്രതിരോധ ശേഷിയുടെ തെളിവാണെന്ന് ഇറാന്റെ വൈസ് പ്രസിഡന്റ് മുഹമ്മദ് ആരിഫ് പ്രസ്താവിച്ചു. തങ്ങൾ യുദ്ധം ആഗ്രഹിക്കുന്നില്ലെന്നും എന്നാൽ സ്വന്തം മണ്ണും തത്വങ്ങളും സംരക്ഷിക്കാൻ മടിക്കില്ലെന്നും അദ്ദേഹം വ്യക്തമാക്കി.
അമേരിക്കയുടെയും പാകിസ്ഥാന്റെയും മധ്യസ്ഥതയിൽ ഏപ്രിലിൽ രൂപീകരിച്ച താൽക്കാലിക വെടിനിർത്തൽ കരാർ പൂർണ്ണമായി തകരുന്ന സാഹചര്യത്തിലാണ് പുതിയ മാറ്റങ്ങൾ. ലബനനിലെ സൈനിക നീക്കങ്ങളും അമേരിക്കയുമായുള്ള സമാധാന ചർച്ചകളും തമ്മിൽ വേർപെടുത്താൻ കഴിയില്ലെന്ന ശക്തമായ നിലപാടിലാണ് ഇറാൻ. ലബനനിൽ ഇസ്രായേൽ ആക്രമണം തുടരുന്നിടത്തോളം കാലം യു.എസുമായി ഒരു ചർച്ചയ്ക്കും തങ്ങളില്ലെന്ന് ഇറാന്റെ പാർലമെന്റ് സ്പീക്കറും മുഖ്യ ചർച്ചക്കാരനുമായ മുഹമ്മദ് ബാഗർ ഗാലിബാഫ് വ്യക്തമാക്കി. അമേരിക്കയ്ക്ക് സമാധാന ചർച്ചകളിലോ വെടിനിർത്തലിലോ യഥാർത്ഥ താല്പര്യമില്ലെന്നും, അതിനാൽ ഇറാനിയൻ ജനതയുടെ അവകാശങ്ങൾ സംരക്ഷിക്കാൻ ശക്തമായ തിരിച്ചടി നൽകുകയേ നിവൃത്തിയുള്ളൂ എന്നും അദ്ദേഹം കൂട്ടിച്ചേർത്തു. അതേസമയം, ഇസ്രായേൽ വീണ്ടും ലബനനിലോ ഇറാന്റെ മണ്ണിലോ ആക്രമണം നടത്തിയാൽ ഇതിലും മാരകമായ പ്രത്യാഘാതം നേരിടേണ്ടിവരുമെന്ന് ഇറാന്റെ സായുധ സേന മുന്നറിയിപ്പ് നൽകിയിട്ടുണ്ട്.
ഇറാൻ അനുകൂല പ്രതിരോധ സഖ്യം കൂടുതൽ ശക്തമായ ഏകോപനത്തോടെയാണ് മുന്നോട്ട് പോകുന്നതെന്ന് ഇറാന്റെ ഖുദ്സ് ഫോഴ്സ് തലവൻ ഇസ്മായിൽ ഖാനി വ്യക്തമാക്കി. ഹോർമുസ് കടലിടുക്ക് മുതൽ ബാബ് അൽ-മന്ദബ് കടലിടുക്ക് വരെ വ്യാപിച്ചുകിടക്കുന്ന പുതിയൊരു ‘സുരക്ഷാ വലയം’ മേഖലയിൽ രൂപപ്പെടുന്നുണ്ടെന്ന് അദ്ദേഹം അമേരിക്കയ്ക്കും ഇസ്രായേലിനും മുന്നറിയിപ്പ് നൽകി. ചെങ്കടലിൽ ഇസ്രായേൽ കപ്പലുകൾക്ക് നിരോധനം ഏർപ്പെടുത്തിയ യെമനിലെ ഹൂത്തികളുടെ കൃത്യസമയത്തുള്ള നടപടി പ്രതിരോധ സഖ്യത്തിന്റെ കരുത്ത് തെളിയിക്കുന്നതാണെന്നും, ആവശ്യമെങ്കിൽ കൂടുതൽ പ്രാദേശിക ശക്തികൾ ഈ സഖ്യത്തിൽ ചേരുമെന്നും അദ്ദേഹം കൂട്ടിച്ചേർത്തു. എന്നാൽ, ഇറാൻ ഒരു പുതിയ യുദ്ധ സമവാക്യം അടിച്ചേൽപ്പിക്കാൻ ശ്രമിക്കുകയാണെന്നും അത് അംഗീകരിക്കാൻ കഴിയില്ലെന്നും ഇസ്രായേൽ പ്രധാനമന്ത്രി ബെന്യാമിൻ നെതന്യാഹു പ്രതികരിച്ചു. ഇസ്രായേലിന് നേരെ ഇനിയൊരു നീക്കമുണ്ടായാൽ കനത്ത പ്രത്യാക്രമണം ഉണ്ടാകുമെന്നും അദ്ദേഹം മുന്നറിയിപ്പ് നൽകി. നിലവിലെ കടുത്ത യുദ്ധസാഹചര്യത്തിൽ ഇരുപക്ഷത്തോടും സംയമനം പാലിക്കാൻ യു.എസ് പ്രസിഡന്റ് ഡൊണാൾഡ് ട്രംപ് ആവശ്യപ്പെട്ടിട്ടുണ്ട്.
