ശ്രീനഗർ: ദക്ഷിണ കശ്മീരിലെ അനന്ത്നാഗിൽ അമർനാഥ് യാത്രാ ഡ്യൂട്ടിയിലുണ്ടായിരുന്ന പോലീസ് ഹെഡ് കോൺസ്റ്റബിൾ ഭീകരാക്രമണത്തിൽ വീരമൃത്യു വരിച്ച സംഭവത്തിന് പിന്നാലെ ജമ്മു-കശ്മീരിൽ സുരക്ഷാ സേന പരിശോധനകളും കടുത്ത നടപടികളും ഊർജ്ജിതമാക്കി. താഴ്വരയിലാകെ തുടരുന്ന വ്യാപകമായ റെയ്ഡുകളിൽ ഭീകരബന്ധം സംശയിക്കുന്ന രണ്ടായിരത്തിലധികം പേരെയാണ് ഇതുവരെ സേന കസ്റ്റഡിയിലെടുത്തത്. ഇതിനുപുറമെ, ഭീകരവാദികളുമായി ബന്ധമുള്ള ഹസൻപോറ, ബിജ്ബെഹാറ എന്നിവിടങ്ങളിലെ രണ്ടു വീടുകൾ സുരക്ഷാ സേന പൂർണ്ണമായി തകർക്കുകയും ചെയ്തു.
ഇന്ത്യൻ റിസർവ് പോലീസ് ഉദ്യോഗസ്ഥനും സ്പെഷ്യൽ ഓപ്പറേഷൻ ഗ്രൂപ്പ് അംഗവുമായ ബുഡ്ഗാം സ്വദേശി ആഷിഖ് ഹുസൈൻ ഖുറേഷിയാണ് ആക്രമണത്തിൽ കൊല്ലപ്പെട്ടത്. മോശം കാലാവസ്ഥയെ തുടർന്ന് അമർനാഥ് യാത്ര നിർത്തിവെച്ചിരുന്ന സമയത്താണ് ജനവാസ മേഖലയിൽ വെച്ച് ഒറ്റയ്ക്കത്തിയ ഭീകരൻ ഇദ്ദേഹത്തിന് നേരെ തൊട്ടടുത്തുനിന്ന് വെടിയുതിർത്തത്. ഇതിന്റെ സി.സി.ടി.വി ദൃശ്യങ്ങൾ പുറത്തുവന്നിട്ടുണ്ട്.
അതേസമയം, താഴ്വരയിൽ ആയിരക്കണക്കിന് ആളുകളെ കൂട്ടത്തോടെ കസ്റ്റഡിയിലെടുക്കുന്ന സുരക്ഷാ സേനയുടെ നടപടിയെ വിമർശിച്ച് ജമ്മു കശ്മീർ മുഖ്യമന്ത്രി ഉമർ അബ്ദുള്ള രംഗത്തെത്തി. സാധാരണക്കാരെ കൂടെ നിർത്താതെയോ വിശ്വാസത്തിലെടുക്കാതെയോയുള്ള ഇത്തരം കൂട്ടനടപടികൾ പ്രശ്നങ്ങൾക്ക് ശാശ്വത പരിഹാരമാകില്ലെന്നും, ഇത് ജനങ്ങളിൽ കൂടുതൽ അമർഷത്തിനും ഭരണകൂടത്തോടുള്ള അകൽച്ചയ്ക്കും വഴിവെക്കുമെന്നും അദ്ദേഹം മുന്നറിയിപ്പ് നൽകി. നിലവിൽ അനന്ത്നാഗ് ഉൾപ്പെടെയുള്ള പ്രദേശങ്ങൾ കനത്ത സുരക്ഷാ വലയത്തിലാണ്. ഭീകരർക്കായുള്ള തെരച്ചിൽ ഊർജ്ജിതമാക്കിയതായി ഉന്നത പോലീസ് വൃത്തങ്ങൾ വ്യക്തമാക്കി.
