ഇസ്ലാമാബാദ്/അങ്കാറ: ഗാസയിലും അധിനിവിഷ്ട വെസ്റ്റ് ബാങ്കിലും ഇസ്രായേൽ തുടരുന്ന സൈനിക നടപടികളിലും, കിഴക്കൻ ജറുസലേമിലെ അൽ-അഖ്സ പള്ളി വളപ്പിൽ നടക്കുന്ന തുടർച്ചയായ ലംഘനങ്ങളിലും കടുത്ത ആശങ്ക രേഖപ്പെടുത്തി പാകിസ്താനും തുർക്കിയും. വിഷയത്തിൽ ഇരുരാജ്യങ്ങളുടെയും വിദേശകാര്യ മന്ത്രിമാർ ഫോണിൽ സംസാരിക്കുകയും ഫലസ്തീൻ ജനതയുടെ ന്യായമായ അവകാശങ്ങൾക്ക് പൂർണ്ണ പിന്തുണ പ്രഖ്യാപിക്കുകയും ചെയ്തു. പാകിസ്താൻ ഉപപ്രധാനമന്ത്രിയും വിദേശകാര്യ മന്ത്രിയുമായ ഇഷാഖ് ദാറും തുർക്കി വിദേശകാര്യ മന്ത്രി ഹക്കാൻ ഫിദാനും തമ്മിൽ നടന്ന ഫോൺ സംഭാഷണത്തിലാണ് മേഖലയിലെ നിലവിലെ സ്ഥിതിഗതികൾ ചർച്ചയായത്.
ഫലസ്തീനിൽ ദിനംപ്രതി വഷളായിക്കൊണ്ടിരിക്കുന്ന മാനുഷിക പ്രതിസന്ധിയെക്കുറിച്ചും ഇരുവരും വിശദമായി സംസാരിച്ചു. ഫലസ്തീനികൾക്ക് അനുകൂലമായ നയതന്ത്ര ശ്രമങ്ങൾ ഏകോപിപ്പിക്കുന്നതിനായി അറബ്-ഇസ്ലാമിക് രാജ്യങ്ങളുടെ അടിയന്തര യോഗം വിളിച്ചുചേർക്കണമെന്ന ജോർദാന്റെ നിർദ്ദേശവും നേതാക്കൾ ചർച്ച ചെയ്തു.ഗാസയിലും വെസ്റ്റ് ബാങ്കിലുമുള്ള സാധാരണക്കാർ നേരിടുന്ന ദുരിതങ്ങൾക്ക് അടിയന്തര പരിഹാരം കാണണമെന്നും അന്താരാഷ്ട്ര സമൂഹം ഇതിനായി ശക്തമായി ഇടപെടണമെന്നും ഇരു നേതാക്കളും ആവശ്യപ്പെട്ടു. മേഖലയിൽ സമാധാനം പുനഃസ്ഥാപിക്കുന്നതിനും ഫലസ്തീൻ ജനതയ്ക്ക് സഹായങ്ങൾ എത്തിക്കുന്നതിനും ഉഭയകക്ഷി നയതന്ത്ര നീക്കങ്ങൾ ശക്തമായി തുടരുമെന്ന് ഇരുരാജ്യങ്ങളും വ്യക്തമാക്കി.
