ന്യൂഡൽഹി: ഗസയിൽ ഇസ്രായേൽ നടത്തുന്ന ആക്രമണങ്ങൾക്കും വംശഹത്യക്കും ഉപയോഗിക്കാൻ ഇന്ത്യയിൽ നിന്ന് വൻതോതിൽ ആയുധങ്ങളും സൈനിക ഉപകരണങ്ങളും തുടർച്ചയായി അയച്ചിരുന്നതായി മനുഷ്യാവകാശ സംഘടനയായ ആംനസ്റ്റി ഇന്റർനാഷണലിന്റെ പുതിയ റിപ്പോർട്ട്. ‘ഇന്ത്യയിൽ നിർമ്മിച്ചത്: ഇസ്രായേലിലേക്കുള്ള ആയുധങ്ങളുടെയും വെടിക്കോപ്പുകളുടെയും വിതരണം’ എന്ന തലക്കെട്ടിൽ പുറത്തിറക്കിയ റിപ്പോർട്ടിൽ, 2023 ഒക്ടോബർ 7 മുതൽ 2025 നവംബർ 30 വരെയുള്ള കാലയളവിൽ ഇന്ത്യയിൽ നിന്ന് ഇസ്രായേലിലേക്ക് കുറഞ്ഞത് 2,596 ചരക്കുനീക്കങ്ങളിലൂടെ നൂറുകണക്കിന് ടൺ ആയുധങ്ങളും സൈനിക സാമഗ്രികളും കയറ്റുമതി ചെയ്തതായി വെളിപ്പെടുത്തുന്നു. ഹാർമോണൈസ്ഡ് സിസ്റ്റം കസ്റ്റംസ് കോഡുകൾ വിശകലനം ചെയ്ത് വളരെ കരുതലോടെ തയ്യാറാക്കിയ ഈ പഠനത്തിൽ മെഷീൻ ഗൺ ഭാഗങ്ങൾ, എൽബിറ്റ് സിസ്റ്റംസിന് നൽകിയ 155 എം.എം അതിപ്രഹര ശേഷിയുള്ള പീരങ്കി ഷെല്ലുകൾ, ഖാൻ യൂനിസിലെ അവശിഷ്ടങ്ങൾക്കിടയിൽ കണ്ടെത്തിയ സ്കൈസ്ട്രൈക്കർ കാമികാസെ ഡ്രോണുകൾക്കുള്ള സ്ഫോടക വാർഹെഡുകൾ, കവചിത വാഹന ഭാഗങ്ങൾ എന്നിവ ഉൾപ്പെടുന്നു.
ഗസയിൽ ഫലസ്തീനികൾക്കെതിരെ നരഹത്യ നടക്കാനുള്ള സാധ്യത മുന്നറിയിപ്പ് നൽകി അന്താരാഷ്ട്ര നീതിന്യായ കോടതി (ICJ) താൽക്കാലിക ഉത്തരവുകൾ പുറപ്പെടുവിച്ചിട്ടും ഇസ്രായേലിലേക്ക് ആയുധ കൈമാറ്റം തുടരുന്നത് അന്താരാഷ്ട്ര നിയമങ്ങളുടെയും ജനീവ കൺവെൻഷന്റെയും കടുത്ത ലംഘനമാണെന്ന് ആംനസ്റ്റി ചൂണ്ടിക്കാട്ടുന്നു. ഇസ്രായേൽ സൈന്യത്തിന്റെ മരണവേട്ടയ്ക്കിടയിലും ഇന്ത്യൻ കമ്പനികൾ ലാഭം കൊയ്യുകയാണെന്ന് ആംനസ്റ്റി സെക്രട്ടറി ജനറൽ ആഗ്നസ് കാലമാർഡ് കുറ്റപ്പെടുത്തി. ഇന്ത്യയിൽ ആയുധ കയറ്റുമതിയിൽ കൃത്യമായ സുതാര്യതയോ മനുഷ്യാവകാശ പരിശോധനാ മാനദണ്ഡങ്ങളോ ഇല്ലെന്നും റിപ്പോർട്ട് വിമർശിക്കുന്നു. വിഷയത്തിൽ വിശദീകരണം തേടി ഇന്ത്യൻ സർക്കാരിനും പങ്കാളികളായ ഒമ്പത് കമ്പനികൾക്കും കത്തയച്ചെങ്കിലും മറുപടി ലഭിച്ചില്ലെന്നും, ഇസ്രായേലിലേക്കുള്ള എല്ലാവിധ ആയുധ കൈമാറ്റവും ഉടനടി നിർത്തിവെച്ച് സമഗ്രമായ ആയുധ ഉപരോധം ഏർപ്പെടുത്തണമെന്നും ആംനസ്റ്റി ആവശ്യപ്പെട്ടു.
അതേസമയം, പ്രധാനമന്ത്രി നരേന്ദ്ര മോദിയുടെയും ബെഞ്ചമിൻ നെതന്യാഹുവിന്റെയും നേതൃത്വത്തിൽ ഇന്ത്യ-ഇസ്രായേൽ പ്രതിരോധ ബന്ധം സമീപകാലത്ത് കൂടുതൽ ശക്തമായിട്ടുണ്ട്. ഇസ്രായേലിലേക്ക് കയറ്റുമതി ചെയ്യുന്ന സൈനിക സാമഗ്രികൾ നിർത്തിവെക്കണമെന്ന് ആവശ്യപ്പെട്ടുള്ള ഹരജികൾ വിദേശനയം സർക്കാരിന്റെ പരിധിയിൽ വരുന്നതാണെന്ന് ചൂണ്ടിക്കാട്ടി സുപ്രീം കോടതി തള്ളിയിരുന്നു. കൂടാതെ, ഇന്ത്യയുടെ ആയുധ കയറ്റുമതി ദേശീയ സുരക്ഷയും ദേശീയ താൽപ്പര്യങ്ങളും മുൻനിർത്തിയാണെന്ന് വിദേശകാര്യ മന്ത്രി എസ്. ജയ്ശങ്കറും വ്യക്തമാക്കിയിരുന്നു. എന്നാൽ, കസ്റ്റംസ് ഡാറ്റയും മുൻപ് അൽ ജസീറ ഉൾപ്പെടെയുള്ള അന്താരാഷ്ട്ര മാധ്യമങ്ങൾ നടത്തിയ അന്വേഷണങ്ങളും ശരിവെക്കുന്ന തരത്തിലാണ് ആംനസ്റ്റിയുടെ ഇപ്പോഴത്തെ വെളിപ്പെടുത്തലുകൾ പുറത്തുവന്നിരിക്കുന്നത്.
