സനാ: സൗദി അറേബ്യയ്ക്കെതിരെ സമുദ്ര ഉപരോധം പ്രഖ്യാപിച്ചതിന് പിന്നാലെ ചെങ്കടലിലൂടെ കടന്നുപോകുന്ന വാണിജ്യ കപ്പലുകൾക്ക് ടോൾ ഏർപ്പെടുത്താൻ യെമനിലെ ഹൂത്തികൾ നീക്കം നടത്തുന്നതായി റിപ്പോർട്ട്. ചെങ്കടലിനെയും ഏദൻ ഗൾഫിനെയും ബന്ധിപ്പിക്കുന്ന തന്ത്രപ്രധാനമായ ബാബ് എൽ-മന്ദബ് കടലിടുക്കിലൂടെ സഞ്ചരിക്കുന്ന കപ്പലുകളിൽ നിന്ന് ഫീസ് ഈടാക്കാനാണ് ഹൂത്തികളുടെ പദ്ധതി. ഈ നീക്കം ആഗോള ഊർജ്ജ ഗതാഗതത്തെയും വിതരണ ശൃംഖലയെയും അടിമുടി ബാധിച്ചേക്കാം. മുൻ ഇറാനിയൻ പരമോന്നത നേതാവ് ആയത്തുള്ള അലി ഖാംനഇയുടെ സംസ്കാര ചടങ്ങുകളിൽ പങ്കെടുക്കാൻ ഇറാനിലെത്തിയപ്പോഴാണ് ഹൂത്തി പ്രതിനിധികൾ ഈ വിഷയം ചർച്ച ചെയ്തതെന്നും, ടോൾ സംവിധാനം നിയന്ത്രിക്കുന്നതിന് അതോറിറ്റി രൂപീകരിക്കുന്നതിനായി ഇറാനിയൻ ഉപദേഷ്ടാക്കൾ ഹൂത്തികളെ സഹായിക്കുന്നതായും റിപ്പോർട്ടുകളുണ്ട്.
അമേരിക്കയിലെ ട്രംപ് ഭരണകൂടത്തിനും അവരുടെ പ്രാദേശിക സഖ്യകക്ഷികൾക്കും മേൽ ഭൗമരാഷ്ട്രീയ സമ്മർദ്ദം വർദ്ധിപ്പിക്കാനാണ് ഹൂത്തികൾ ശ്രമിക്കുന്നതെന്നാണ് വിലയിരുത്തപ്പെടുന്നത്. അതേസമയം, ചർച്ചകളുടെ അടിസ്ഥാനത്തിൽ സുരക്ഷിത യാത്ര ഉറപ്പാക്കുന്നതിന്റെ ഭാഗമായി ചൈനീസ് കപ്പലുകളെ ഈ ഫീസിൽ നിന്ന് ഒഴിവാക്കിയേക്കുമെന്നും സൂചനയുണ്ട്. എന്നാൽ ഈ നീക്കം ആഗോള വ്യാപാര വിതരണ ശൃംഖലയെ സാരമായി ബാധിക്കുമെന്ന് ഇന്റർനാഷണൽ ചേംബർ ഓഫ് ഷിപ്പിങ് മുന്നറിയിപ്പ് നൽകി. ഹോർമുസ് കടലിടുക്കിന് പകരമായി സൗദി അറേബ്യ ഉപയോഗിക്കുന്ന പ്രധാന പാതയാണിതെന്നിരിക്കെ, ബാബ് എൽ-മന്ദബ് വഴിയുള്ള ഗതാഗതം തടസ്സപ്പെടുന്നത് ആഗോള എണ്ണ വിതരണത്തെയും രൂക്ഷമായി ബാധിച്ചേക്കാം.
വർദ്ധിച്ചുവരുന്ന സുരക്ഷാ ഭീഷണിയും അസ്ഥിരതയും കണക്കിലെടുത്ത്, കടലിലെ ഉയർന്ന അപകടസാധ്യതയുള്ള പ്രദേശങ്ങളെ ഒഴിവാക്കാനായി അയൽരാജ്യങ്ങൾ പുതിയ പൈപ്പ്ലൈനുകൾ നിർമ്മിക്കുന്നതിലേക്ക് വൻതോതിൽ നിക്ഷേപം നടത്തുന്നുണ്ട്. ഗൾഫ്-യൂറോപ്യൻ രാജ്യങ്ങൾ ഈ നീക്കത്തെ ശക്തമായി എതിർക്കാൻ സാധ്യതയുണ്ടെങ്കിലും, അമേരിക്ക ഉൾപ്പെടെയുള്ള പാശ്ചാത്യ സഖ്യസേനകൾക്ക് ഈ പ്രധാന നാവികപാതയിൽ കപ്പലുകൾക്ക് പൂർണ്ണ സുരക്ഷ നൽകുന്നതിൽ നിലവിൽ പരിമിതികളുണ്ടെന്ന് നയതന്ത്രജ്ഞർ ചൂണ്ടിക്കാട്ടുന്നു. 2024-ൽ സുരക്ഷിതമായ യാത്രയ്ക്കായി ചില ഷിപ്പിങ് ഏജൻസികളിൽ നിന്ന് ഹൂത്തികൾ പണം ഈടാക്കിയതായും, ഇത്തരത്തിൽ ഏകദേശം 180 ദശലക്ഷം ഡോളർ വരെ ഹൂത്തികൾക്ക് ലഭിച്ചിട്ടുണ്ടാകാമെന്നും ഐക്യരാഷ്ട്രസഭയുടെ റിപ്പോർട്ടുകൾ സൂചിപ്പിച്ചിരുന്നെങ്കിലും ഇത് ഔദ്യോഗികമായി സ്ഥിരീകരിക്കപ്പെട്ടിട്ടില്ല.
