ദോഹ: ജപ്പാനിലെ ഐച്ചി-നഗോയയിൽ ആരംഭിച്ച 20-ാമത് ഏഷ്യൻ ഗെയിംസിൽ വൻ താരനിരയുമായി ഖത്തർ പ്രതിനിധി സംഘം. 26 കായിക ഇനങ്ങളിലായി മാറ്റുരയ്ക്കുന്ന 243 കായികതാരങ്ങൾ ഉൾപ്പെടെ 427 അംഗങ്ങൾ അടങ്ങുന്ന വിപുലമായ സംഘത്തെയാണ് ഖത്തർ ഒളിമ്പിക് കമ്മിറ്റി ഗെയിംസിനായി അയച്ചിരിക്കുന്നത്. ഗെയിംസിന്റെ പ്രൗഢഗംഭീരമായ മാർച്ച് പാസ്റ്റിൽ പഡൽ താരം മുഹമ്മദ് സഅദൂൻ അൽ കുവാരിയും ഷൂട്ടിങ് താരം റീം അൽ ഷർഷാനിയും ഖത്തറിന്റെ ദേശീയ പതാകയേന്തി ടീമിനെ നയിച്ചു. ഖത്തറിന്റെ വനിതാ 3×3 ബാസ്കറ്റ്ബാൾ ടീം ഉൾപ്പെടെയുള്ള പ്രധാന സംഘങ്ങൾ നിലവിൽ ജപ്പാനിൽ എത്തിച്ചേർന്ന് പരിശീലനം ആരംഭിച്ചിട്ടുണ്ട്.
സെപ്റ്റംബർ 22-ന് നടക്കുന്ന ആദ്യ മത്സരത്തിൽ ശ്രീലങ്കയാണ് ഖത്തറിന്റെ എതിരാളികൾ. തുടർന്നുള്ള നിർണായക പോരാട്ടത്തിൽ കരുത്തരായ ചൈനയെയും ഖത്തർ നേരിടും. മികച്ച പരിശീലനവും മുൻനിര മത്സര പരിചയവുമായി എത്തുന്ന ഖത്തരി സംഘം അത്ലറ്റിക്സ്, ഷൂട്ടിംഗ്, ഹാൻഡ്ബോൾ, ബീച്ച് വോളിബോൾ ഉൾപ്പെടെയുള്ള നിരവധി കായിക ഇനങ്ങളിൽ മെഡൽ പ്രതീക്ഷ വെച്ചുപുലർത്തുന്നുണ്ട്. ഒക്ടോബർ 4 വരെ നീണ്ടുനിൽക്കുന്ന ഈ കായികമാമാങ്കത്തിൽ ഏഷ്യയിലെ 45 രാജ്യങ്ങളിൽ നിന്നായി പതിനൊറായിരത്തോളം കായികതാരങ്ങളാണ് പങ്കെടുക്കുന്നത്. 43 കായിക ഇനങ്ങളിലെ 469 മത്സരങ്ങളിലായാണ് അത്ലറ്റുകൾ മെഡലുകൾക്കായി മാറ്റുരയ്ക്കുന്നത്.
1958-ൽ ടോക്കിയോയിലും 1994-ൽ ഹിരോഷിമയിലും വേദിയൊരുക്കിയ ശേഷം ഇത് മൂന്നാം തവണയാണ് ഏഷ്യൻ ഗെയിംസിന് ജപ്പാൻ ആതിഥേയത്വം വഹിക്കുന്നത്. അഞ്ച് വർഷത്തിന് ശേഷം നടക്കാനിരിക്കുന്ന ‘ദോഹ 2030’ ഏഷ്യൻ ഗെയിംസിന് മുന്നോടിയായുള്ള ഖത്തറിന്റെ നിർണായക ചുവടുവെപ്പായാണ് ഈ ഗെയിംസിനെ കായിക ലോകം നോക്കിക്കാണുന്നത്.
