ന്യൂഡൽഹി: പശ്ചിമ ബംഗാൾ നിയമസഭാ ഉപതെരഞ്ഞെടുപ്പിന് മുന്നോടിയായി തൃണമൂൽ കോൺഗ്രസിന്റെ പേരും ‘ഇരട്ടപ്പൂവും പുല്ലും’ അടങ്ങുന്ന തെരഞ്ഞെടുപ്പ് ചിഹ്നവും ഉപയോഗിക്കുന്നതിൽ നിന്ന് ഇരുവിഭാഗങ്ങളെയും വിലക്കിയ തെരഞ്ഞെടുപ്പ് കമ്മീഷന്റെ നടപടിയെ രൂക്ഷമായി വിമർശിച്ച് ലോക്സഭാ പ്രതിപക്ഷ നേതാവ് രാഹുൽ ഗാന്ധി. പ്രതിപക്ഷ പാർട്ടികളെ പിളർത്താനും അവയുടെ ചിഹ്നങ്ങൾ തട്ടിയെടുക്കാനും ബി.ജെ.പിയും തെരഞ്ഞെടുപ്പ് കമ്മീഷനും പരസ്പരം കൈകോർത്ത് പ്രവർത്തിക്കുകയാണെന്ന് അദ്ദേഹം ആരോപിച്ചു. രാഹുൽ ഗാന്ധി തന്റെ ‘എക്സ്’ ഹാൻഡിലിൽ പങ്കുവെച്ച കുറിപ്പിലൂടെയാണ് കമ്മീഷന്റെ തീരുമാനത്തിനെതിരെ ശക്തമായ പ്രതിഷേധം രേഖപ്പെടുത്തിയത്.
ശിവസേന, നാഷണലിസ്റ്റ് കോൺഗ്രസ് പാർട്ടി (NCP) എന്നിവയിൽ നടന്ന സമാന സംഭവങ്ങൾക്ക് ശേഷമാണ് ഇപ്പോൾ തൃണമൂൽ കോൺഗ്രസിനും ഇതേ അനുഭവം നേരിടേണ്ടി വന്നിരിക്കുന്നതെന്ന് രാഹുൽ ചൂണ്ടിക്കാട്ടി. “ആദ്യം ശിവസേന, പിന്നെ എൻ.സി.പി, ഇപ്പോൾ തൃണമൂൽ കോൺഗ്രസ്; എല്ലാതവണയും ഒരേ രീതി തന്നെയാണ്. ബി.ജെ.പിയും തെരഞ്ഞെടുപ്പ് കമ്മീഷനും ചേർന്ന് പ്രതിപക്ഷ പാർട്ടികളെ തകർക്കുകയും തുടർന്ന് അവരുടെ തെരഞ്ഞെടുപ്പ് ചിഹ്നങ്ങൾ മോഷ്ടിക്കുകയും ചെയ്യുന്നു,” എന്ന് രാഹുൽ ഗാന്ധി കുറ്റപ്പെടുത്തി. ‘വോട്ട് ചോരി’ക്കും (വോട്ട് മോഷണം), ‘സർക്കാർ ചോരി’ക്കും (ഭരണം തട്ടിയെടുക്കൽ) ശേഷം ഇപ്പോൾ നടക്കുന്നത് ‘പാർട്ടി ചോരി’യാണെന്നും (പാർട്ടി മോഷണം) ഇത് രാജ്യത്തെ ജനാധിപത്യ തകർച്ചയുടെ ആഴം വ്യക്തമാക്കുന്നുവെന്നും അദ്ദേഹം കൂട്ടിച്ചേർത്തു.
ജനവിധി സംരക്ഷിക്കേണ്ട ഭരണഘടനാപരമായ ഉത്തരവാദിത്തമുള്ള തെരഞ്ഞെടുപ്പ് കമ്മീഷൻ, അതിന് വിരുദ്ധമായി ജനവിധി അട്ടിമറിക്കുന്ന ശക്തികളെ സഹായിക്കുകയാണെന്ന് രാഹുൽ ഗാന്ധി വിമർശിച്ചു. മമത ബാനർജിയുടെ പാർട്ടി നേരിടുന്ന ഈ പ്രതിസന്ധി അവരുടെ മാത്രം പോരാട്ടമല്ലെന്നും സ്വതന്ത്രവും നീതിയുക്തവുമായ തെരഞ്ഞെടുപ്പ് ആഗ്രഹിക്കുന്ന ഇന്ത്യയിലെ ഓരോ രാഷ്ട്രീയ പാർട്ടിയുടെയും ജനാധിപത്യ വിശ്വാസികളുടെയും പോരാട്ടമാണെന്നും അദ്ദേഹം വ്യക്തമാക്കി. ഉപതെരഞ്ഞെടുപ്പിൽ മമത ബാനർജിയുടെയും അരുപ് റോയിയുടെയും നേതൃത്വത്തിലുള്ള വിഭാഗങ്ങൾ തമ്മിലുള്ള തർക്കം നിലനിൽക്കുന്നതിനാലാണ് കമ്മീഷൻ താത്കാലികമായി ചിഹ്നം മരവിപ്പിച്ചത്.
