വാഷിംഗ്ടൺ: യു.എസ് സ്റ്റേറ്റ് സെക്രട്ടറി മാർക്കോ റൂബിയോയും സൗദി വിദേശകാര്യ മന്ത്രി ഫൈസൽ ബിൻ ഫർഹാൻ അൽ സൗദും തമ്മിൽ വാഷിംഗ്ടണിൽ നിർണ്ണായക കൂടിക്കാഴ്ച നടത്തി. ചർച്ച സംബന്ധിച്ച ഔദ്യോഗിക വിവരങ്ങൾ ഇരുവിഭാഗവും പുറത്തുവിട്ടിട്ടില്ലെങ്കിലും, ഗൾഫ് മേഖലയിലെ പ്രതിരോധ സഹകരണം, ഹോർമുസ് കടലിടുക്കിലെ നാവിക സുരക്ഷ, പ്രാദേശിക സ്ഥിരത തുടങ്ങിയ സുപ്രധാന വിഷയങ്ങൾ കൂടിക്കാഴ്ചയിൽ ചർച്ചയായതായാണ് റിപ്പോർട്ടുകൾ സൂചിപ്പിക്കുന്നത്.
പശ്ചിമേഷ്യൻ മേഖലയുടെ ചുമതലയുള്ള യു.എസ് മിലിട്ടറി ടോപ്പ് കമാൻഡർ അഡ്മിറൽ ബ്രാഡ് കൂപ്പർ ഈ മാസം ആദ്യം സൗദി അറേബ്യ സന്ദർശിച്ച് സുരക്ഷാ സാഹചര്യങ്ങളും ഹൂതികൾക്കെതിരായ പോരാട്ടങ്ങളും വിലയിരുത്തിയിരുന്നു. ഇതിന് തൊട്ടുപിന്നാലെയാണ് വിദേശകാര്യ മന്ത്രിതലത്തിലുള്ള ചർച്ചകൾ നടന്നത്. ആവശ്യമെങ്കിൽ സൗദി അറേബ്യയുമായുള്ള പ്രതിരോധ കരാറുകളിലെ വാഗ്ദാനങ്ങൾ പൂർണ്ണമായും പാലിക്കാൻ യു.എസ് സൈന്യം സജ്ജമാണെന്നും, നൽകിയ ഉറപ്പുകൾ അമേരിക്ക പാലിക്കുമെന്നും മുതിർന്ന ഭരണകൂട ഉദ്യോഗസ്ഥൻ വ്യക്തമാക്കി.
അടുത്തിടെ മേഖലയിൽ നിലനിൽക്കുന്ന യുദ്ധസാഹചര്യങ്ങളും എണ്ണ വിതരണ പാതകളിലെ സുരക്ഷാ ആശങ്കകളും മുൻനിർത്തി ഇരുരാജ്യങ്ങളും തമ്മിലുള്ള തന്ത്രപ്രധാന സഹകരണം കൂടുതൽ ശക്തമാക്കാനാണ് ഈ നീക്കത്തിലൂടെ ലക്ഷ്യമിടുന്നത്.
