കൊച്ചി: ലൈംഗിക അതിക്രമ പരാതിയെ തുടർന്ന് സുരേഷ് ബാബുവിനെ സി.പി.എം പാലക്കാട് ജില്ലാ സെക്രട്ടറി സ്ഥാനത്തുനിന്ന് നീക്കിയ പാർട്ടി നടപടി സ്വാഗതാർഹമാണെങ്കിലും, അത് കൊണ്ടുമാത്രം മതിയാകില്ലെന്നും ക്രിമിനൽ നടപടികളിലേക്ക് പോലീസ് കടക്കണമെന്നും മുൻ ഇടത് എം.പിയും പ്രമുഖ അഭിഭാഷകനുമായ ഡോ. സെബാസ്റ്റ്യൻ പോൾ. ‘പരിഹാരം പാർട്ടിയിൽ പോരാ; വേണ്ടത് നിയമനടപടി’ എന്ന തലക്കെട്ടിൽ ‘മലയാള മനോരമ’യിൽ എഴുതിയ ലേഖനത്തിലാണ് അദ്ദേഹം ഇക്കാര്യം തുറന്നടിച്ചത്. മുഖ്യമന്ത്രി പിണറായി വിജയൻ നേരിട്ടിടപെട്ട് വേഗത്തിലെടുത്ത തീരുമാനം പാർട്ടിക്കുള്ളിലെ തിരുത്തൽ നടപടിയായി കാണാമെങ്കിലും, നാടിന്റെ നിയമമനുസരിച്ചുള്ള ക്രിമിനൽ ശിക്ഷ ഉറപ്പാക്കേണ്ട ബാധ്യത പോലീസിനുണ്ടെന്ന് അദ്ദേഹം ഓർമ്മിപ്പിച്ചു.
തൊഴിലിടങ്ങളിലോ മേലധികാരികൾക്കോ മുന്നിലെത്തുന്ന ലൈംഗിക അതിക്രമ പരാതികൾ നിയമപ്രകാരം പോലീസിന് കൈമാറാൻ ഭരണഘടനാപരമായ ബാധ്യതയുണ്ട്. അഭിഭാഷകയായ പരാതിക്കാരിക്ക് നേരിട്ട് പോലീസിനെയോ കോടതിയെയോ സമീപിക്കാമെങ്കിലും, പരാതി ലഭിച്ചയുടൻ അത് നിയമസംവിധാനങ്ങൾക്ക് മുന്നിലെത്തിക്കാൻ പാർട്ടി തയ്യാറാകണം. പ്രതിയെ സംരക്ഷിക്കാൻ പാർട്ടി ശ്രമിക്കുന്നുവെന്ന ആക്ഷേപത്തിന് ഇടനൽകരുത്. മുൻകാലങ്ങളിൽ സമാനസാഹചര്യങ്ങളിൽ പ്രമാണിമാരായ നേതാക്കളുടെ കാര്യത്തിൽ സ്വീകരിച്ച നിലപാടിൽ നിന്ന് വ്യത്യസ്തമായ സമീപനമാണ് പാലക്കാട്ട് കണ്ടതെന്നും, പ്രതിയെ നിയമത്തിന്റെ കരങ്ങളിൽ ഏൽപ്പിച്ചുകൊടുക്കാനുള്ള ബാധ്യത പാർട്ടി നിറവേറ്റണമെന്നും അദ്ദേഹം വ്യക്തമാക്കി.
പാർട്ടിയിലെ പദവിയുടെ പ്രഭാവം ഉപയോഗിച്ച് സ്ത്രീകളെ ലൈംഗിക ചൂഷണത്തിന് വിധേയമാക്കുന്നു എന്ന ആക്ഷേപം കടുത്ത ആശങ്ക ഉണ്ടാക്കുന്നതാണ്. ഇതൊരു പ്രണയമോ സൗഹൃദമോ അല്ല. പാർട്ടിയുടെ ഉന്നത പദവികളിൽ ഇരിക്കുന്നവരിൽ ആദരണീയമായ സദാചാരബോധം വളർത്തിയെടുക്കണം. ഏതു പ്രായത്തിലുള്ള സ്ത്രീക്കും ഏതു സമയത്തും പാർട്ടി ഓഫീസുകളിൽ നിർഭയം കടന്നുചെല്ലാൻ കഴിയുന്ന അന്തരീക്ഷം ഉണ്ടാകണം. പ്രവർത്തകർ പാർട്ടി ഓഫീസുകൾക്ക് നൽകുന്ന വിശുദ്ധിയെ ഇത്തരം അനാശാസ്യ പ്രവർത്തനങ്ങൾക്ക് ദുരുപയോഗം ചെയ്യരുതെന്നും സെബാസ്റ്റ്യൻ പോൾ ലേഖനത്തിൽ ചൂണ്ടിക്കാട്ടി.
