കൊച്ചി: എറണാകുളം മഹാരാജാസ് കോളജിലെ എസ്.എഫ്.ഐ പ്രവർത്തകൻ അഭിമന്യു വധക്കേസിന്റെ വിചാരണ നടപടികൾക്ക് എറണാകുളം സെഷൻസ് കോടതിയിൽ തുടക്കമായി. ആക്രമണസമയത്ത് അഭിമന്യുവിനൊപ്പമുണ്ടായിരുന്ന കേസിലെ ഒന്നാം സാക്ഷി സുബീഷിനെയാണ് ആദ്യ ദിവസം കോടതി വിസ്തരിച്ചത്.
പോപ്പുലർ ഫ്രണ്ട് – കാമ്പസ് ഫ്രണ്ട് പ്രവർത്തകരായ 16 പ്രതികളും ഒരേ വേഷത്തിലാണ് ആദ്യ ദിവസം കോടതിയിൽ ഹാജരായത്. മാധ്യമങ്ങൾ ദൃശ്യങ്ങൾ പകർത്തുന്നത് ഒഴിവാക്കാനായി മുടി പറ്റെ വെട്ടി, താടി വടിച്ച്, വെള്ള ഷർട്ടും വെള്ള മുണ്ടും ധരിച്ച്, കറുത്ത മുഖംമൂടിയും തൊപ്പിയുമാണ് എല്ലാവരും അണിഞ്ഞിരുന്നത്. പ്രതികളുടെ ഈ നടപടി സാക്ഷികളിൽ ആശയക്കുഴപ്പമുണ്ടാക്കുമെന്ന് പ്രോസിക്യൂഷൻ കോടതിയിൽ വാദിച്ചു. തുടർന്ന്, വരുംദിവസങ്ങളിൽ ഇത് ആവർത്തിക്കരുതെന്നും കർശന നടപടിയുണ്ടാകുമെന്നും പ്രിൻസിപ്പൽ സെഷൻസ് ജഡ്ജി കെ.കെ. ബാലകൃഷ്ണൻ പ്രതികൾക്ക് മുന്നറിയിപ്പ് നൽകി.
കോടതി നിർദേശപ്രകാരം പ്രതികൾ മുഖംമൂടി മാറ്റിയതോടെ, അഭിമന്യുവിനെ ഇടിക്കട്ട കൊണ്ട് ആക്രമിച്ച റിയാസ് ഹുസൈൻ, കത്തി വീശിയ സനീഷ് എന്നിവരുൾപ്പെടെ 13 പേരെ സാക്ഷി സുബീഷ് തിരിച്ചറിഞ്ഞു. എന്നാൽ മൂന്ന് പേരെ തിരിച്ചറിയാൻ സാധിച്ചില്ലെന്നും അദ്ദേഹം വ്യക്തമാക്കി. പൊലീസിന് പ്രഥമ വിവരം നൽകിയതും സുബീഷാണ്. സുബീഷടക്കം എല്ലാ ദൃക്സാക്ഷികളെയും ഒരുമിച്ച് ക്രോസ് വിസ്താരം ചെയ്യണമെന്ന് പ്രതിഭാഗം ആവശ്യപ്പെട്ടെങ്കിലും അഭിമന്യുവിന്റെ കുടുംബം ഇതിനെ ശക്തമായി എതിർത്തു. സാക്ഷി വിസ്താരം തുടരുമെന്ന് കോടതി അറിയിച്ചു.
2018 ജൂലൈ രണ്ടിന് കോളജ് കവാടത്തിൽ ചുവരെഴുത്തുമായി ബന്ധപ്പെട്ട തർക്കത്തെത്തുടർന്നാണ് കാമ്പസ് ഫ്രണ്ട് പ്രവർത്തകരുടെ കുത്തേറ്റ് അഭിമന്യു കൊല്ലപ്പെട്ടത്. ആകെ 156 പ്രോസിക്യൂഷൻ സാക്ഷികളുള്ള കേസിൽ, കുറ്റകൃത്യത്തിൽ നേരിട്ട് പങ്കെടുത്തവരുടെ ആദ്യഘട്ട വിചാരണയാണ് ഇപ്പോൾ പുരോഗമിക്കുന്നത്. പ്രോസിക്യൂഷനുവേണ്ടി സ്പെഷ്യൽ പബ്ലിക് പ്രോസിക്യൂട്ടർ ജി. മോഹൻരാജും, പ്രതിഭാഗത്തിനായി അഡ്വ. ബി. രാമൻപിള്ളയും, അഭിമന്യുവിന്റെ കുടുംബത്തിനുവേണ്ടി അഡ്വ. കെ.എസ്. അരുൺകുമാറും കോടതിയിൽ ഹാജരായി.
