ന്യൂഡൽഹി: മുൻ പഞ്ചാബ് മുഖ്യമന്ത്രി ക്യാപ്റ്റൻ അമരീന്ദർ സിങ് കോൺഗ്രസിലേക്ക് മടങ്ങിയെത്തുമെന്ന അഭ്യൂഹങ്ങൾക്കിടയിൽ നിർണായക പ്രതികരണവുമായി കോൺഗ്രസിന്റെ പഞ്ചാബ് സംസ്ഥാന ചുമതലയുള്ള നേതാവ് സച്ചിൻ പൈലറ്റ്. രാഷ്ട്രീയത്തിൽ ‘എന്തും സംഭവിക്കാൻ സാധ്യതയുണ്ട്’ എന്നാണ് ക്യാപ്റ്റന്റെ മടങ്ങിവരവിനെക്കുറിച്ചുള്ള ചോദ്യത്തിന് സച്ചിൻ പൈലറ്റ് മറുപടി നൽകിയത്. ബി.ജെ.പി നേതൃത്വവുമായി അമരീന്ദർ സിങ് ഇടഞ്ഞുനിൽക്കുന്ന പശ്ചാത്തലത്തിൽ പൈലറ്റിന്റെ പ്രസ്താവന ദേശീയ രാഷ്ട്രീയത്തിൽ വലിയ ചർച്ചകൾക്ക് തിരികൊളുത്തിയിട്ടുണ്ട്. ചെറുപ്പകാലം മുതൽ തനിക്ക് അമരീന്ദർ സിങ്ങുമായി വ്യക്തിപരമായ അടുപ്പമുണ്ടെന്നും ഉന്നതമായ വ്യക്തിത്വമുള്ള അദ്ദേഹം പഞ്ചാബിന് മികച്ച സേവനമാണ് നൽകിയതെന്നും പൈലറ്റ് അനുസ്മരിച്ചു. പാർട്ടി വിടുന്നതിനെക്കുറിച്ചോ പുതിയ നീക്കങ്ങളെക്കുറിച്ചോ തങ്ങൾ തമ്മിൽ ചർച്ചകളൊന്നും നടന്നിട്ടില്ലെന്നും എന്നാൽ രാഷ്ട്രീയത്തിൽ ഏത് സാഹചര്യവും പ്രതീക്ഷിക്കാമെന്നും അദ്ദേഹം വ്യക്തമാക്കി.
പഞ്ചാബിലെ കാര്യങ്ങളിൽ ബി.ജെ.പി കേന്ദ്ര നേതൃത്വം തന്റെ അഭിപ്രായം തേടുന്നില്ലെന്നും താൻ പ്രതിസന്ധി ഘട്ടത്തിലൂടെയാണ് കടന്നുപോകുന്നതെന്നും അമരീന്ദർ സിങ് കഴിഞ്ഞ മാസം പരസ്യമായി അമർഷം പ്രകടിപ്പിച്ചിരുന്നു. എങ്കിലും ബി.ജെ.പി വിടാൻ തൽക്കാലം തീരുമാനിച്ചിട്ടില്ലെന്നായിരുന്നു അദ്ദേഹത്തിന്റെ വിശദീകരണം. ആഗസ്റ്റിൽ രാഹുൽ ഗാന്ധി ഇൻസ്റ്റാഗ്രാം സെഷനിൽ ബി.ജെ.പിയിലെ തനിക്ക് ഏറ്റവും ഇഷ്ടപ്പെട്ട നേതാവായി അമരീന്ദർ സിങ്ങിന്റെ പേര് പരാമർശിച്ചതാണ് പുതിയ അഭ്യൂഹങ്ങൾക്ക് തുടക്കമിട്ടത്. ഇതിന് മറുപടിയായി ഗാന്ധി കുടുംബവുമായുള്ള ബന്ധം തുടരുമെന്ന് ക്യാപ്റ്റൻ പ്രതികരിച്ചിരുന്നു. 2021-ൽ കോൺഗ്രസ് വിട്ട അദ്ദേഹം പിന്നീട് പഞ്ചാബ് ലോക് കോൺഗ്രസ് രൂപീകരിക്കുകയും ആ പാർട്ടി ബി.ജെ.പിയിൽ ലയിക്കുകയുമായിരുന്നു. അമരീന്ദറിന്റെ ഭാര്യ പ്രണീത് കൗർ ഉൾപ്പെടെയുള്ള കുടുംബാംഗങ്ങളും നിലവിൽ ബി.ജെ.പിയിലാണ് പ്രവർത്തിക്കുന്നത്
