പത്തനംതിട്ട: കണ്ണൂരിൽ വെച്ച് നടന്ന കരിങ്കൊടി പ്രതിഷേധത്തിനിടെ മുൻ ആരോഗ്യ മന്ത്രി വീണാ ജോർജിനെ കെ.എസ്.യു പ്രവർത്തകർ ആക്രമിച്ചെന്ന കേസിൽ അന്വേഷണം ഊർജ്ജിതമാക്കി പ്രത്യേക അന്വേഷണ സംഘം. കേസിന്റെ ഭാഗമായി പത്തനംതിട്ടയിലെ വീട്ടിലെത്തിയാണ് അന്വേഷണ സംഘം വീണാ ജോർജിന്റെ മൊഴി രേഖപ്പെടുത്തിയത്. എസ്.ഐ.ടി തലവൻ യു. പ്രേമന്റെ നേതൃത്വത്തിലുള്ള ഉദ്യോഗസ്ഥ സംഘമാണ് മൊഴിയെടുക്കൽ നടപടികൾ പൂർത്തിയാക്കിയത്.
കഴിഞ്ഞ ഫെബ്രുവരി 25-നായിരുന്നു കേസിനാസ്പദമായ സംഭവം. കണ്ണൂർ റെയിൽവേ സ്റ്റേഷനിൽ വെച്ച് അന്ന് മന്ത്രിയായിരുന്ന വീണാ ജോർജിനെതിരെ കെ.എസ്.യു പ്രവർത്തകർ കരിങ്കൊടി പ്രതിഷേധം നടത്തുകയായിരുന്നു. വധശ്രമം ഉൾപ്പെടെയുള്ള ഗുരുതരമായ വകുപ്പുകൾ ചുമത്തി രജിസ്റ്റർ ചെയ്ത ഈ കേസിൽ കെ.എസ്.യു പ്രവർത്തകർ 16 ദിവസത്തോളം റിമാൻഡിൽ കഴിഞ്ഞിരുന്നു. തുടർന്ന് അധികാരത്തിലെത്തിയ പുതിയ സർക്കാരാണ് സംഭവത്തെക്കുറിച്ച് സമഗ്രമായി അന്വേഷിക്കാൻ പ്രത്യേക അന്വേഷണ സംഘത്തെ ചുമതലപ്പെടുത്തിയത്.
അന്ന് മന്ത്രിയുടെ കൂടെയുണ്ടായിരുന്ന ഗൺമാൻ ഉൾപ്പെടെയുള്ളവർ ആയുധങ്ങൾ ഉപയോഗിച്ച് പരിക്കേൽപ്പിച്ചതായി നേരത്തെ മൊഴി നൽകിയിരുന്നു. സംഭവത്തിൽ വധശ്രമം ഉൾപ്പെടെയുള്ള കടുത്ത വകുപ്പുകൾ ചുമത്താൻ നിർദ്ദേശം നൽകിയത് ആരാണ് എന്ന കാര്യവും നിലവിൽ പ്രത്യേക അന്വേഷണ സംഘം വിശദമായി പരിശോധിച്ചു വരികയാണ്.
