ബംഗളൂരു: കർണാടകയിലെ യലഹങ്കയിൽ സർക്കാർ ഭൂമി കൈയേറി താമസിച്ചവരെ ഒഴിപ്പിക്കുന്നതുമായി ബന്ധപ്പെട്ട തർക്കത്തിൽ കടുത്ത നിലപാടുമായി ബി.ജെ.പി എം.എൽ.എ ഭരത് ഷെട്ടി. അനധികൃതമായി താമസമുറപ്പിച്ചവർക്ക് പുനരധിവാസ സൗകര്യങ്ങൾ ഒരുക്കിക്കൊടുക്കാനുള്ള സർക്കാർ നീക്കത്തെ അദ്ദേഹം ശക്തമായി എതിർത്തു. നിയമലംഘനം നടത്തിയവർക്ക് ആനുകൂല്യങ്ങൾ നൽകുന്നത് തെറ്റായ കീഴ്വഴക്കം സൃഷ്ടിക്കുമെന്നും, അർഹരായവർക്ക് ലഭിക്കേണ്ട ആനുകൂല്യങ്ങൾ ഇത്തരം കൈയേറ്റക്കാർ തട്ടിയെടുക്കുന്നത് അനുവദിക്കാനാവില്ലെന്നും അദ്ദേഹം വ്യക്തമാക്കി.
കൈയേറ്റക്കാരെ ഒഴിപ്പിക്കാൻ സർക്കാർ തയ്യാറാകണമെന്നും അവർക്ക് പ്രത്യേക പരിഗണന നൽകുന്നത് വോട്ടുബാങ്ക് രാഷ്ട്രീയത്തിന്റെ ഭാഗമാണെന്നും ഭരത് ഷെട്ടി ആരോപിച്ചു. യലഹങ്കയിലെ വിവിധ ഭാഗങ്ങളിൽ സർക്കാർ ഭൂമി വ്യാപകമായി കൈയേറപ്പെട്ടിട്ടുണ്ടെന്നും ഇതിനെതിരെ കർശന നടപടി വേണമെന്നും അദ്ദേഹം ആവശ്യപ്പെട്ടു. വിഷയത്തിൽ സർക്കാരിന്റെ ഭാഗത്തുനിന്നുണ്ടാകുന്ന മൃദുസമീപനം സാധാരണക്കാരായ പൗരന്മാരോടുള്ള അനീതിയാണെന്ന് അദ്ദേഹം കൂട്ടിച്ചേർത്തു. ഒഴിപ്പിക്കൽ നടപടികൾ ഊർജ്ജിതമാക്കണമെന്ന് ആവശ്യപ്പെട്ട് ബി.ജെ.പി പ്രതിഷേധം ശക്തമാക്കാനാണ് നീക്കം.
