ടെഹ്റാൻ: അമേരിക്കയും ഇറാനും തമ്മിൽ പാകിസ്ഥാനിൽ വെച്ച് നടക്കാനിരിക്കുന്ന രണ്ടാം ഘട്ട സമാധാന ചർച്ചകൾക്ക് മുന്നോടിയായി, 270 ബില്യൺ ഡോളർ (ഏകദേശം 22 ലക്ഷം കോടി രൂപ) നഷ്ടപരിഹാരം ആവശ്യപ്പെട്ട് ഇറാൻ രംഗത്തെത്തി. അമേരിക്കയുടെ സൈനികാക്രമണങ്ങളെത്തുടർന്ന് രാജ്യത്തെ എണ്ണ കേന്ദ്രങ്ങൾക്കും അടിസ്ഥാന സൗകര്യങ്ങൾക്കും സമ്പദ്വ്യവസ്ഥയ്ക്കും ഉണ്ടായ വൻ നാശനഷ്ടങ്ങൾക്ക് പകരമായി ഈ തുക നൽകണമെന്നാണ് ഇറാന്റെ ആവശ്യം. നഷ്ടപരിഹാരം സംബന്ധിച്ച കാര്യത്തിൽ വ്യക്തമായ തീരുമാനം ഉണ്ടാകാതെ ചർച്ചകളിൽ മുന്നോട്ടുപോക്ക് സാധ്യമാകില്ലെന്ന കർശന നിലപാടാണ് ഇറാൻ സ്വീകരിച്ചിരിക്കുന്നത്. വരും ദിവസങ്ങളിൽ ഇസ്ലാമാബാദിൽ വെച്ച് നടക്കാനിരിക്കുന്ന നിർണ്ണായകമായ ചർച്ചകളിൽ ഈ വിഷയം പ്രധാന അജണ്ടയായിരിക്കുമെന്ന് അൽ ജസീറ റിപ്പോർട്ട് ചെയ്തു.
യുദ്ധം അവസാനത്തോടടുക്കുകയാണെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് കഴിഞ്ഞ ദിവസം ശുഭപ്രതീക്ഷ പ്രകടിപ്പിച്ചിരുന്നുവെങ്കിലും ഇറാന്റെ ഈ പുതിയ സാമ്പത്തിക ആവശ്യം ചർച്ചകളെ എങ്ങനെ ബാധിക്കുമെന്നത് നയതന്ത്ര വൃത്തങ്ങളിൽ ആശങ്കയുണ്ടാക്കുന്നുണ്ട്. പാകിസ്ഥാൻ സൈനിക മേധാവി ഫീൽഡ് മാർഷൽ അസിം മുനീറിന്റെ മധ്യസ്ഥതയിൽ നടക്കുന്ന ഈ ചർച്ചകളിൽ അമേരിക്കൻ വൈസ് പ്രസിഡന്റ് ജെ.ഡി. വാൻസും ഇറാന്റെ പാർലമെന്റ് സ്പീക്കർ മുഹമ്മദ് ബാഗർ ഖാലിബാഫുമാണ് തങ്ങളുടെ രാജ്യങ്ങളെ പ്രതിനിധീകരിക്കുന്നത്.
ആദ്യഘട്ട ചർച്ചകളിൽ ചില പ്രാഥമിക ധാരണകൾ കൈവരിച്ചുവെങ്കിലും സാമ്പത്തിക നഷ്ടപരിഹാരവും ഉപരോധങ്ങൾ നീക്കുന്നതും ഉൾപ്പെടെയുള്ള സങ്കീർണ്ണമായ വിഷയങ്ങളിൽ ഇരുരാജ്യങ്ങളും തമ്മിൽ ഇപ്പോഴും വലിയ ഭിന്നത നിലനിൽക്കുന്നുണ്ട്. പശ്ചിമേഷ്യയിൽ ശാശ്വതമായ സമാധാനം കൊണ്ടുവരാൻ ലക്ഷ്യമിട്ടുള്ള ഈ ഉന്നതതല നീക്കങ്ങളെ ലോകരാഷ്ട്രങ്ങൾ അതീവ ഗൗരവത്തോടെയാണ് ഉറ്റുനോക്കുന്നത്.
