മദീന: ഈ വർഷത്തെ ഹജ്ജ് തീർത്ഥാടനത്തിനായി ഇന്ത്യയിൽ നിന്നുള്ള ആദ്യസംഘം ഹാജിമാർ സൗദി അറേബ്യയിലെ മദീനയിലെത്തി. ഏപ്രിൽ 18 ശനിയാഴ്ച ഇന്ത്യയിലെ വിവിധ എംബാർക്കേഷൻ പോയിന്റുകളിൽ നിന്ന് പുറപ്പെട്ട തീർത്ഥാടകരെ മദീനയിലെ പ്രിൻസ് മുഹമ്മദ് ബിൻ അബ്ദുൽ അസീസ് അന്താരാഷ്ട്ര വിമാനത്താവളത്തിൽ സൗദി അധികൃതരും ഇന്ത്യൻ ഹജ്ജ് മിഷൻ ഉദ്യോഗസ്ഥരും ചേർന്ന് ഹൃദ്യമായി സ്വീകരിച്ചു. പൂക്കളും ഈന്തപ്പഴവും ഉപഹാരങ്ങളും നൽകിയാണ് ഹാജിമാരെ മദീനയിലേക്ക് വരവേറ്റത്. വിമാനത്താവളത്തിലെ ഇമിഗ്രേഷൻ നടപടികൾ വേഗത്തിൽ പൂർത്തിയാക്കി ഹാജിമാരെ അവർക്കായി ഒരുക്കിയിട്ടുള്ള താമസസ്ഥലങ്ങളിലേക്ക് പ്രത്യേക ബസുകളിൽ എത്തിച്ചു. മക്കയിലും മദീനയിലും ഹാജിമാരെ സ്വീകരിക്കുന്നതിനായി ഇന്ത്യൻ അംബാസഡർ ഡോ. സുഹേൽ അജാസ് ഖാൻ്റെയും ജിദ്ദ കോൺസൽ ജനറലിൻ്റെയും നേതൃത്വത്തിൽ വിപുലമായ ഒരുക്കങ്ങളാണ് പൂർത്തിയാക്കിയിരിക്കുന്നത്.
ഇത്തവണ ഇന്ത്യയിൽ നിന്ന് ആകെ 1,75,025 തീർത്ഥാടകരാണ് വിശുദ്ധ ഹജ്ജ് കർമ്മത്തിനായി എത്തുന്നത്. ഡൽഹി, മുംബൈ, ഹൈദരാബാദ്, കോഴിക്കോട് ഉൾപ്പെടെയുള്ള 17 പ്രധാന കേന്ദ്രങ്ങൾ വഴിയാണ് വിമാന സർവീസുകൾ ക്രമീകരിച്ചിരിക്കുന്നത്. തീർത്ഥാടകരുടെ യാത്രയും താമസവും സുഗമമാക്കുന്നതിന് ‘ഹജ്ജ് സുവിധ’ മൊബൈൽ ആപ്പ്, സ്മാർട്ട് റിസ്റ്റ് ബാൻഡുകൾ തുടങ്ങിയ ഡിജിറ്റൽ സംവിധാനങ്ങൾ ഇത്തവണ ഏർപ്പെടുത്തിയിട്ടുണ്ട്. കൂടാതെ, 60,000-ത്തോളം ഹാജിമാർക്ക് മക്കയ്ക്കും മദീനയ്ക്കും ഇടയിൽ യാത്ര ചെയ്യാൻ ഹരമൈൻ അതിവേഗ ട്രെയിൻ സൗകര്യവും ലഭ്യമാക്കിയിട്ടുണ്ട്. മേഖലയിലെ രാഷ്ട്രീയ സാഹചര്യങ്ങൾക്കിടയിലും ഹാജിമാരുടെ സുരക്ഷയും സൗകര്യങ്ങളും ഉറപ്പാക്കാൻ ഇന്ത്യൻ എംബസിയും സൗദി ഹജ്ജ് മന്ത്രാലയവും സംയുക്തമായി പ്രവർത്തിക്കുന്നുണ്ടെന്നും വരും ദിവസങ്ങളിൽ കൂടുതൽ തീർത്ഥാടകർ സൗദിയിലെത്തുമെന്നും അധികൃതർ അറിയിച്ചു.
